ទំនាស់ដីធ្លីដ៏រ៉ាំរ៉ៃរបស់អ្នកភូមិបឹងកក់ ទំនងជាអាចទទួលបានដំណោះស្រាយឆាប់ៗនេះ បន្ទាប់ពីកូនប្រុសច្បងរបស់សម្តេចនាយករដ្ឋមន្ត្រី ហ៊ុន សែន គឺ លោក ហ៊ុន ម៉ាណែត ចេញមុខ ចូលមកជួយអន្តរាគមន៍ ។នៅថ្ងៃទី៤ខែកក្កដានេះតំណាងអ្នកភូមិបឹងកក់ចំនួន៣នាក់បានជួបជាមួយអភិបាលរាជធានីភ្នំពេញនិង លោក ហ៊ុន ម៉ាណែត នៅរសៀលថ្ងៃបន្ទាប់និងមានជំជាថ្មីម្តងទៀតរវាងអាជ្ញាធររាជធានីជាមួយអ្នកភូមិបឹងកក់។
តំណាងអ្នកភូមិបឹងកក់ លោក ចាន់ ពុទ្ធស័ក្តិបានឲ្យដឹងថា នៅព្រឹកថ្ងៃព្រហស្បតិ៍នេះលោកនិងតំណាងអ្នកភូមិពីរនាក់ទៀតបានជួបពិភាក្សាដោយផ្ទាល់មាត់ជាមួយអភិបាលរាជធានីភ្នំពេញ លោក ប៉ា សុជាតិវង្ស និងលោក ហ៊ុន ម៉ាណែតនៅក្នុងសាលារាជធានីភ្នំពេញ។ ក្នុងជំនួបនោះ លោក ហ៊ុនម៉ាណែតបានសន្យាថានឹងស្នើឲ្យក្រុមហ៊ុនបញ្ចូលឈ្មោះគ្រួសារអ្នកភូមិចំនួន៤៨ គ្រួសារដែលមិនទាន់បានដីទៅក្នុងបញ្ជីដែលត្រូវទទួលបានដី។
តំណាងអ្នកភូមិបឹងកក់នឹងត្រូវជួបជាមួយតំណាងសាលារាជធានីភ្នំពេញម្តងទៀតនៅថ្ងៃបន្ទាប់។ សកម្មជនបឹងកក់បានសម្តែងក្តីសង្ឃឹមថាបញ្ហានឹងអាចដោះស្រាយបានប្រសិនបើមានកិច្ចអន្តរាគមន៍ដោយសុឆន្ទៈរបស់លោក ហ៊ុន ម៉ាណែត។
សូមរំលឹកថា តំបន់បឹងកក់ដែលមានទំហំផ្ទៃដីជាង១០០ហិកតាត្រូវបានរាជរដ្ឋាភិបាលប្រគល់ឲ្យក្រុមហ៊ុនសម្បទានឈ្មោះស៊ូកាគូអ៊ីន អភិវឌ្ឍន៍ក្នុងរយៈពេល៩០ឆ្នាំ។គម្រោងនេះបានធ្វើឲ្យប៉ះពាល់ប្រជាជនជាង៤០០០គ្រួសារ។ ប៉ុន្តែប្រជាជនមួយភាគធំបានយល់ព្រមចាកចេញនិងទទួលយកគោលនយោបាយរបស់រដ្ឋាភិបាល។ ចុងក្រោយនេះនៅសល់អ្នកភូមិ៤៨គ្រួសារដែលបន្តការតវ៉ារហូតមកទល់សព្វថ្ងៃ។
កិច្ចអន្តរាគមន៍ដោះស្រាយបញ្ហាបឹងកក់បានធ្វើឡើងខណៈដែលការបោះឆ្នោតកាន់តែខិតចូលមកដល់និងក្រោយពេលក្រុមអ្នកភូមិបានចេញមុខតវ៉ាជាបន្តបន្ទាប់ពេលយុទ្ធនាការឃោសនាបោះឆ្នោត។ លោក ចាន់ សូវ៉េតមន្ត្រីអ្នកស៊ើបអង្កេតរបស់សមាគមអាដហុកដែលបានតាមដានបញ្ហានេះបានបញ្ជាក់ថា ពិតជាមានវត្តមានលោក ហ៊ុនម៉ាណែត ចូលអន្តរាគមន៍ដោះស្រាយបញ្ហានេះមែន។ លោកក៏សង្ឃឹមដែរថាបញ្ហានឹងអាចដោះស្រាយបានប្រសិនបើអាជ្ញាធរមានចេតនាដោះស្រាយមែននោះ៕
ដោយ៖ស.ស្អាត