ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន បានប្រាប់ក្រុមអ្នកវិនិយោគវិស័យឯកជនថា រាជរដ្ឋាភិបាលគ្មានគោលការណ៍តម្លើងពន្ធដូចការចោទប្រកាន់នៅតាមទីផ្សារថា រដ្ឋកំពុងតម្លើងពន្ធនាំចូលនោះឡើយ ផ្ទុយទៅវិញសម្តេចបាន បញ្ជាក់ថា រដ្ឋកំពុងអនុវត្តច្បាប់ដើម្បីប្រមូលពន្ធឱ្យអស់តែប៉ុណ្ណោះ។ថ្លែងក្នុងវេទិការាជរដ្ឋាភិបាលនិងវិស័យឯកជន នៅព្រឹកថ្ងៃអង្គារនេះ សម្តេចអគ្គមហាសេនាបតីតេជោ ហ៊ុន សែន បានបញ្ជាក់ថា រដ្ឋាភិបាលគ្មានគោលការណ៍តម្លើងពន្ធលើការនាំចូលទេលើកលែងតែទំនិញមួយចំនួនប៉ុណ្ណោះ ដែលពាក់ព័ន្ធនិងសុខមាលភាព ដូចជា បារីនិងស្រា ជាដើម ព្រោះទំនិញទាំងនេះវាមិនប៉ះពាល់ដល់ជីវភាពប្រជាពលរដ្ឋធម្មតានោះទេ ប៉ុន្តែអ្វីដែលរដ្ឋាភិបាលយកចិត្តទុកដាក់នោះ គឹប្រមូលពន្ធឱ្យអស់។
សម្តេចក៏បានអំពាវនាវឱ្យ រោងចក្រ សហគ្រាសវិស័យទាំងអស់ ត្រូវសម្តែងការស្មោះត្រង់ទាំងអស់គ្នាក្នុងការបង់ពន្ធ រដ្ឋនឹងចាត់វិធានការម៉ឺងម៉ាត់ កែលំអផ្នែកអភិបាលកិច្ច ផ្នែកគយ និងផ្នែកពន្ធដារ។ជាមួយគ្នានេះ រដ្ឋាភិបាលនឹងកែសម្រួលនិតិវិធីច្បាប់ បទបញ្ញត្តិ ដើម្បីបង្កបរិស្ថានវិនិយោគឱ្យកាន់តែល្អប្រសើរផងដែរ៕
ដោយ៖ រតនា