ភ្នំពេញ៖ រាជរដ្ឋាភិបាលជប៉ុនបានសម្រេចផ្តល់ជំនួយកម្ចីសម្បទានប្រាក់យ៉េនជប៉ុនរបស់ខ្លួនដែលមានចំនួនសរុបទាំងអស់ ប្រាំបីពាន់ ប្រាំបីរយហាសិបពីរលាន យ៉េន ប្រហាក់ប្រហែលស្មើនឹង៩០លានដុល្លារអាមេរិក ដល់រាជរដ្ឋាភិបាលកម្ពុជា សម្រាប់អនុវត្តគម្រោងលំអផ្លូវជាតិលេខ៥ ចាប់ពីកំណាត់ផ្លូវបាត់ដំបង ដល់សិរីសោភ័ណ្ឌ។
សេចក្តីប្រកាសរបស់ស្ថានទូតជប៉ុនប្រចាំកម្ពុជា កាលពីព្រឹកមិញនេះបង្ហាញថាកម្ចីសម្បទានរបស់ជប៉ុននេះជាការឆ្លើយតបទៅ នឹងសំណើសុំរបស់រាជរដ្ឋាភិបាលកម្ពុជា និងដោយឈរនៅលើទស្សនៈដើម្បីពង្រឹងទំនាក់ទំនងមិត្តភាព និងសហប្រតិបត្តិការរវាងប្រទេសជប៉ុននិងព្រះរាជាណាចក្រកម្ពុជា។
សូមបញ្ជាក់ថា លិខិតប្តូរសារលើប្រាក់កម្ចីសម្បទាននោះនឹងត្រូវចុះហត្ថលេខារវាង លោកហោណាំហុង ឧបនាយករដ្ឋមន្ត្រីរដ្ឋមន្ត្រីការបរទេស និងលោកគូម៉ាម៉ារ៉ុយូជិ( Kumamaru Yuji ) ឯកអគ្គរាជទូតវិសាមញ្ញ និងពេញសមត្ថភាពរបស់ជប៉ុនប្រចាំកម្ពុជា ក្រោមអធិបតីភាពដ៏ខ្ពង់ខ្ពស់របស់ សម្តេចហ៊ុនសែន នៅម៉ោង៩ព្រឹកថ្ងៃទី៣០ខែមេសាឆ្នាំ២០១៣នៅទីស្តីការក្រសួងការបរទេស និងសហប្រតិបត្តិការអន្តរជាតិក្នុងរាជធានីភ្នំពេញ៕
ដោយ ស.ស្អាត