ភ្នំពេញ៖  ប្រទេស CLMV កម្ពុជា ឡាវ មីយ៉ាន់ម៉ា និងវៀតណាម​ដែលស្ថិតក្នុងតំបន់ដង​ទន្លេ​មេគង្គ បានបង្ហាញ​ការ​ព្រួយបារម្ភ ដូចគ្នាទៅលើបញ្ហាសន្តិសុខស្បៀង ទឹក និងថាមពល​អគ្គីសនី ខណៈដែលបញ្ហា ការប្រែប្រួល​អាកាស​​​​ធាតុ​​និងកក្តាមនុស្សកំពុងបង្កការគំរាម​កំហែង​កាន់តែខ្លាំងឡើងៗឥតឈប់ឈរ។

        ថ្លែងក្នុងសនិ្នសីទថ្នាក់តំបន់នៅព្រឹកថ្ងៃទីថ្ងៃទី៣ ខែមេសា ឆ្នាំ២០១៤នេះ សម្តេច នរោត្តម​ សិរីវុឌ្ឍ ទីប្រឹក្សាផ្ទាល់ ព្រះមហាក្សត្រ នៃព្រះរាជាណាចក្រកម្ពុជា និងជាព្រះប្រធាន​ក្រុមប្រឹក្សាភិបាល នៃឧត្តមក្រុមប្រឹក្សា ព្រះមហាក្សត្រ មានបន្ទូលថា ទឹក ស្បៀង និងថាមពល​ជាបញ្ហាដ៏សំខាន់ត្រូវតែធ្វើការដោះស្រាយ ដោយមិនត្រឹមតែ​នៅថ្នាក់​មូល​ដ្ឋាន​​ប៉ុណ្ណោះទេ គឺ​កម្រិត​តំបន់ផងដែរ គឺវាធានាបាននូវការជួយជំរុញ កំណើនសេដ្ឋកិច្ចជាតិ។

ការលើកឡើងដូច្នេះ បានធ្វើឡើងខណៈដែលប្រទេសនានាក្នុងតំបន់មេគង្គ កំពុងតែ​ចាប់​​ផ្តើមសាងសង់​ទំនប់​វារី​អគ្គី​សនី កាត់តាមទន្លេមេនៃដងទន្លេមេគង្គ ដើម្បីទាញយក​ថាមពលអគ្គិសនីបំពេញសេចក្តីត្រូវការរៀងខ្លួន ប៉ុន្តែ​វានឹង រង​ផលប៉ៈពាល់រយៈពេល​វែង​ប្រើ​សិនបើបញ្ហា​ទឹក និងសន្តិសុខស្បៀង​មិនត្រូវបានពិចារណា​ឲ្យបានដិត​ដល់​ទេ​នោះ។

សម្តេចបានបញ្ជាក់ថា បញ្ហាទឹកស្បៀង និងថាមពលអាចមាននិរន្តរភាព ទៅបានទាល់ តែវិស័យទាំងបីនេះ​មាន​ដំណើរ​​​ការល្អប្រសើរព្រមគ្នា ដូច្នេះសន្និសីទថ្នាក់តំបន់នេះ ​ត្រូវតែ​ពិភាក្សាគ្នាឲ្យបានស៊ីជម្រៅ ដើម្បីស្វែងរកជំរើស​នយោបាយ និងបច្ចេកវិទ្យាឲ្យសមស្រប សម្រាប់​ឆ្លើយតបទៅ នឹងបញ្ហាខាងលើ។

លោក​ Wolhem Hofeimster ប្រធានមូលនិធិខុនរ៉ាដ​ ប្រចាំ​ប្រទេសសិង្ហបុរី និងជា​ប្រធាន​កិច្ចពិភាក្សាកម្មវិធី​នយោបាយ​ប្រចាំតំបន់អាស៊ី ​មានប្រសាសន៍ថា ការពិភាក្សាគ្នា​ជា​លក្ខណៈតំបន់នាពេលនេះ ពិតជាមានសារៈ សំខាន់​ណាស់ ដើម្បីរួមគ្នាស្វែងរកយន្តការ ឆ្លើយតបឲ្យកាន់តែមានប្រសិទ្ធិភាព ដោយសារតែប្រ ទេសទាំង៤​នេះ​ងាយ​ប្រឈម​ខ្ពស់លើ​បញ្ហា អសន្តិសុខស្បៀង។

លោក ស៊ីន ខណ្ឌី អនុរដ្ឋលេខាធិការក្រសួងបរិស្ថាន​ មានប្រសាសន៍ថា​សម្រាប់​ប្រទេស​កម្ពុជា សន្តិសុខទឹក និង​សន្តិសុខថាមពល នៅជាបញ្ហាប្រឈមនៅឡើយ ដោយសារ​តែប្រទេសកម្ពុជាបានពឹងផ្អែក ទាំងសុ្រងលើ​ប្រពន្ធ័​អាង​ទឹកដែលមានលក្ខណៈឆ្លងដែន ចំណែក​ ថាមពលមានតម្លៃថ្លៃបើធៀបទៅនឹងប្រទេសជិតខាងផ្សេងទៀត។

លោកបញ្ជាក់ថា រាល់ការអភិវឌ្ឍនានា ដូចជាវារីអគ្គីសនី រាជរដ្ឋាភិបាលបានគិតគូរ លើបញ្ហាគ្រប់វិស័យជានិច្ច ដោយ​​មិនភ្លេចលើវិស័យណាមួយឡើយ ព្រោះវានឹង ធ្វើឲ្យធន​ធាន​ទាំងនោះ នៅតែមាន​និរន្តរភាពសម្រាប់​ប្រជា​​​​​​​ជា​តិ​​។​

សូមបញ្ជាក់ថា សន្និសីទថ្នាក់តំបន់ ដើម្បីរួមគ្នាដោះស្រាយបញ្ហាប្រឈមលើបញ្ហា​សន្តិ​​សុខ​ទឹក ស្បៀង និងថាម​ពលនេះ មានរយៈពេល២ថ្ងៃ ដែលរៀបចំឡើងដោយវិទ្យាស្ថានខ្មែរ​សម្រាប់សហប្រតិបត្តិការនិងសន្តិភាព ហើយ​គ្រោង​​ប្រមូលយកលទ្ធផលនៃកិច្ចប្រជុំ​ទាំងនេះ​បញ្ជូនទៅគ្រប់ក្រសួងស្ថាបន័ពាក់ពន្ធ័តាមប្រទេសនិមួយៗ សម្រាប​រៀបចំជាគោល នយោ​បាយ​​ឆ្លើយតបចំពោះមុខ និងទៅថ្ងៃខាងមុខ៕ ដោយ ៖​​​​ សស្អាត