ភ្នំពេញ៖  អត្រាឈឺនិងស្លាប់ដោយជំងឺគ្រុនចាញ់ ក្នុងរយៈពេល៣ឆ្នាំ ចាប់ពីឆ្នាំ២០១១-២០១៣ នេះ មានការថយ ចុះគួរឲ្យកត់សម្គាល់ និងស្មានមិនដល់ បើប្រៀបធៀបទៅនឹងទស្សវត្សរ៍ ឆ្នាំ២០០០-២០១០កន្លងទៅនោះ។នេះបើ តាមរបាយការណ៍ផ្សព្វផ្សាយរបស់មជ្ឈមណ្ឌល​ជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្រ្ត និងបាណកសាស្រ្ត កម្ពុជា នៅថ្ងៃទី២០ ខែ មករា ឆ្នាំ២០១៤នេះ។

របាយការណ៍ផ្សព្វផ្សាយខាងលើបានឲ្យដឹងថា ចំនួនស្លាប់ដោយគ្រុនចាញ់ និងស្ថិតិប្រជាជន​តាមឆ្នាំនីមួយៗ អត្រា ស្លាប់ដោយគ្រុនចាញ់ ក្នុងទស្សវត្សឆ្នាំ២០០០-២០១០ ត្រូវបានកាត់​បន្ថយប្រមាណ៧.៧ ភាគរយប៉ុណ្ណោះគិត ជា មធ្យម ។ បន្ទាប់មកក្នុងរយៈពេល៣ឆ្នាំដំបូង នៃការអនុវត្តន៍ផែនការយុទ្ធសាស្ត្រជាតិ លុបបំបាតជំងឺគ្រុនចាញ់ ឆ្នាំ ២០១១-២០២៥ របស់​រាជរដ្ឋាភិបាល អត្រាស្លាប់នេះ បានថយចុះកាន់តែលឿនគួរឲ្យកត់សម្គាល់ គឺកាត់បន្ថយអស់ រហូតដលទៅ៤០ភាគរយក្នុងឆ្នាំ២០១១ហើយ៥១ភាគរយក្នុងឆ្នាំ២០១២ និង៧៤ភាគរយ​នៅ​ឆ្នាំ​២០១៣ កន្លងទៅថ្មី ៗនេះ។មជ្ឈមណ្ឌលជាតិប្រយុទ្ធនឹងជំងឺគ្រុនចាញ់បានឲ្យដឹងទៀតថា ឆ្នាំ២០០០ មានអ្នកស្លាប់ដោយ​សារជំងឺនេះចំ​នួន​​៦០៨ នាក់ ហើយរយៈពេល១០ឆ្នាំក្រោយ នៅឆ្នាំ២០១០មានអ្នកស្លាប់១៥១​នាក់ ចំណែកអ្នកស្លាប់​ដោយ​គ្រុន​ចាញ់​​ឆ្នាំ២០១១មានចំនួន៩៣នាក់ ក្នុងឆ្នាំ២០១២មាន៤៦​នាក់ និងឆ្នាំ២០១៣មានចំនួន១២នាក់តែប៉ុណ្ណោះ។

មានន័យថាចំនួនស្លាប់ដោយគ្រុនចាញ់ ក្នុងប្រជាជន១សែននាក់ ជាសូចនាករស្នួល១ នៃគោលដៅអភិវឌ្ឍន៍​សហ​ស្ស​វត្សកម្ពុជា បាន​ថយចុះពី ៥,១៦នាក់ នាឆ្នាំ២០០០ មកនៅត្រឹម១,០៩នាក់ នាឆ្នាំ២០១០ និង ០,៦៦នាក់​នា​ឆ្នាំ​២០១១គឺទាបជាង០,៧៨នាក់ ដែលជាគោលដៅអភិវឌ្ឍន៍សហស្សវត្ស២០១៥ ហើយបន្ទាប់​មកបានបន្តចុះ​កាន់តែ​លឿន​រហូតមកដល់០,៣២នាក់ នាឆ្នាំ២០១២ និងដល់០,០៨នាក់ នាឆ្នាំ​២០១៣។ដោយឡែកទាក់ទិន​និងករណី​គ្រុន​ចាញ់ដែលព្យាបាល ដោយសេវាសាធារណៈ ឬភ្នាក់ងារ​ស្ម័គ្រ​ចិត្តភូមិក្នុង​ឆ្នាំ​២០១៣ មានចំនួន៤១,៨៤៩ករណី គឺ​ថយ​ចុះ៤០ភាគរយ បើប្រៀបធៀប​ឆ្នាំ២០១២ដែលមាន៦៩,៥៥១ករណី។

ចំណែកករណីគ្រុនចាញ់ ដែលព្យាបាលដោយសេវា​សាធារណៈ ក្នុងប្រជាជន១០០០នាក់ ដែលជាសូច​នាករ​តាម​ដាន១ នៃគោលដៅអភិវឌ្ឍន៍​សហស្សវត្សកម្ពុជា បានថយចុះពី១១,០​ករណីនាឆ្នាំ២០០០ មកនៅត្រឹម៤,២ នាឆ្នាំ​២០១០ និង៤,០ករណី ឆ្នាំ២០១១ គឺស្មើ​គោលដៅ​ឆ្នាំ២០២៥ បន្ទាប់មកបន្តចុះកាន់តែលឿនជាង​មុន​មកដល់ ២,៨ និង១,៥ករណី នាឆ្នាំ ២០១២ និងឆ្នាំ២០១៣។

គួរបញ្ជាក់ថា មកដល់ពេលនេះ កម្ពុជាបានអនុវត្តន៍សម្រេចមុនផែនការ គោលដៅអភិវឌ្ឍន៍​សហស្សវត្សកម្ពុជា​ឆ្នាំ២០១៥ ដែលទាក់ទិននឹងអត្រាឈឺនិងស្លាប់ ដោយជំងឺគ្រុនចាញ់ ប៉ារ៉ា​ស៊ីត​សាស្រ្តនិងបាណកសាស្រ្តនៅឆ្នាំ​២០១១ ពោលក្នុងរយៈពេល៣ឆ្នាំមុន​រយៈកាលកំណត់៕​ ដោយ៖ សស្អាត