សកម្មជនដីធ្លី នៅតំបន់បឹងកក់ ដែលទើបទទូលបានពានរង្វាន់ ពីសហរដ្ឋអាមេរិក និងបណ្តាប្រទេសមួយចំនួនទៀត ពីភាពក្លាហាន ហ៊ានប្រឆាំងនឹងការបណ្តេញចេញ អះអាងថា នឹងបន្តដឹកនាំសកម្មភាពនេះបន្តទៀត ដ៏រាបណាការរំលោភសិទ្ធិមនុស្ស នៅតែបន្តកើតមាននៅកម្ពុជា។
អ្នកស្រី ទេព វន្នី ដែលទើបវិលត្រឡប់មកពីទទួលពានរង្វាន់ នៅសហរដ្ឋអាមេរិក និងប្រទេសហូឡង់ ពីភាពក្លាហានហ៊ានប្រឆាំងនឹងការបណ្តេញចេញ ឲ្យដឹងនៅថ្ងៃទី១២ខែមេសានេះថា អ្នកស្រីនៅតែបន្តធ្វើសកម្មភាពនេះបន្តទៀត ដើម្បីទាមទាររកយុត្តិធម៌ រឿងជម្លោះដីធ្លី និងការគោរពសិទ្ធិមនុស្ស ៖ "ចាស សម្រាប់ខ្ញុំផ្ទាល់ ក៏ដូចសហគមន៍ខ្ញុំ គឺគាត់អត់នៅស្ងៀមទេ ព្រោះរឿងនេះវាអយុត្តិធម៌ខ្លាំងណាស់ សម្រាប់អ្នកស្រី យ៉ោម បុប្ផា ក៏ដូចជាពួកខ្ញុំដែលធ្លាប់ជាប់ឃុំខ្លួន ចំនួន១៥នាក់ អញ្ចឹងពួកខ្ញុំហ្នឹងប្រើយុទ្ធសាស្រ្ដ គ្រាប់វិធីសាស្ដ្រទាំងអស់ដោយស្របតាមច្បាប់ និងសន្ដិវិធីធ្វើម៉េច ឲ្យតែតុលាការហ្នឹង គាត់ផ្ដល់យុត្ដិធម៌ឲ្យអ្នកស្រី យ៉ោម បុប្ផា គាត់រួចខ្លួនឡើងវិញ"។
បន្ទាប់ពីជាប់ពន្ធនាគារជាង៣០ថ្ងៃ អ្នកស្រី ទេព វន្នី បានទទួលពានរង្វាន់ចំនួនពីរ គឺមួយនៅប្រទេសហូឡង់ ដែលពានរង្វាន់នោះមានឈ្មោះថា មេអំបៅមាស និងពានរង្វាន់មួយទៀត នៅសហរដ្ឋអាមេរិក ឈ្មោះថាស្ត្រីភាពជាមេដឹកនាំដឹកនាំពិភពលោក។ ពានរង្វាន់ទាំងនោះ ឲ្យតម្លៃទៅលើភាពក្លាហានរបស់សកម្មជនដីធ្លី ហ៊ានតតាំងជាមួយកម្លាំងសមត្ថកិច្ច រហូតជាប់ពន្ធនាគារ ដើម្បីការពារសិទ្ធិរស់នៅស្របច្បាប់ក្នុងសហគមន៍ ។
អ្នកនាំពាក្យសាលារាជធានីភ្នំពេញ លោក ឡុង ឌីម៉ង់ ស្វាគមន៍រាល់ការអះអាងរបស់ម្ចាស់ពានរង្វាន់ពិភពលោកនេះ ហើយលោកក៏អះអាងថា ខណៈនេះរាជរដ្ឋាភិបាលកំពុងអនុវត្តលិទ្ធិប្រជាធិបតេយ្យ សេរីពហុបក្សស្រាប់។ ប៉ុន្តែលោកថា សិទ្ធិសម្តែងមតិណាមួយដែលហួសដែនកំណត់ នោះក៏ត្រូវប្ររឈមមុខច្បាប់ដែរ។ លោក ឡុង ឌីម៉ង់ បន្តថា អ្វីដែលនៅខ្វះចន្លោះមិនទាន់បានដោះស្រាយ រឿងជម្លោះដីធ្លីនៅសហគមន៍មួយចំនួន ក្នុងរាជធានីភ្នំពេញ គឺមន្ត្រីពាក់ព័ន្ធកំពុងបន្តសិក្សា និងស្វែងរកដំណោះស្រាយ ៖ "យើងកំពុងតែធ្វើការហើយបង ព្រោះវាជាលក្ខណៈមួយ ធ្វើអោយមានភាពសុក្រិត ដូច្នេះចង់ឫមិនចង់យើងកំពុងតែធ្វើការ ប៉ុន្ដែអ្វីដែលជាការសំណូមពរលើសពីលទ្ធភាពយើងអាចដោះស្រាយជូនបាន គឺយើងមិនមានលទ្ធភាពទេបាទ អាហ្នឹងយើងអាចសុំគោលការទៅថ្នាក់លើទៀត សុំគោលការទៅរដ្ឋាភិបាល" ។
យ៉ាងណាក៏ដោយ នាយកលេខាធិការដ្ឋាន នៃក្រុមការងារពិសេសសិទ្ធិលំនៅឋាន លោកសៀ ភារម្យ ដែលបានអមដំណើរ អ្នកស្រី ទេព វន្នី ទៅទទួលពានរង្វាន់ដែរនោះ ពន្យល់ថា កម្ពុជាមានកិច្ចព្រមព្រៀងមួយជាមួយអន្តរជាតិ ស្តីពីការគោរពសិទ្ធិមនុស្ស និងលិទ្ធិប្រជាធិបតេយ្យ។ លោកថា ប្រទេសទាំងនោះសន្យាតាមឃ្លាំមើល ការវិវត្តន៍របស់កម្ពុជាលើកចិ្ចព្រមព្រៀងនេះ ៖ "អ្នកដឹកនាំកំពូលដូចជា លោក ជូបាយឌិន ដូចជា អ្នកស្រី ហ៊ីល ឡារីគ្លីនតុន ជាដើមគាត់បានថ្លែង ជា commitment ជាការប្ដេជ្ញាចិត្តថា ពួកគាត់គឺនៅពីក្រោយ គាំទ្រការពារចំពោះអ្នកទាំងឡាយ ដែលហ៊ានក្លាហានដើម្បីសេរីភាព ដើម្បីយុត្ដិធម៌ គឺគាត់នូវគាំទ្រ ជានិច្ច ក្នុងស្ថានភាពយ៉ាងណាក៏ដោយឲ្យតែអ្នកទាំងនោះ បានប្រើបា្រស់នូវសិទ្ធសេរីភាពរបស់ខ្លួនស្របទៅតាមច្បាប់" ។
តាមសកម្មជនដីធ្លី ឲ្យដឹងថា សហគមន៍ជាច្រើនដែលប្រឈម នឹងការបណ្តេញចេញ និងត្រូវបានបណ្តេញចេញហើយ នៅមិនទាន់បានដោះស្រាយនៅឡើយ បើទោះជាជម្លោះនោះបានអូសបន្លាយច្រើនឆ្នាំក៏ដោយ ដូចជា តំបន់បឹងកក់ បុរីកីឡា សហគមន៍ថ្មគោល បឹងឈូក និងសហគមន៍មួយចំនួនទៀត ៕
ប្រភព៖VOD