ភ្នំពេញ៖ អង្គការសុខភាពពិភពលោក និងក្រសួងសុខាភិបាល បានចេញសេចក្តីថ្លែការណ៍រួម គ្នាមួយកាលពីថ្ងៃទី១១ ខែមីនា នេះថា មានករណីជំងឺផ្ដាសាយបក្សីចំនួន ២ករណីថ្មីទៀត ត្រូវបានអះអាងថា វិជ្ជមានវីរុសផ្ដាសាយបក្សី H5N1នៅក្នុងប្រទេសកម្ពុជា។ករណីថ្មីទាំងពីរនេះ មកពីខេត្តកណ្ដាល និងកំពង់ឆ្នាំង ៤៣ករណី ក្នុងចំណោមករណីផ្ដាសាយបក្សីទាំង៥៥ ដែលកើតមានឡើងកម្ពុជា កើតលើកុមារអាយុក្រោម១៤ឆ្នាំ និង២៩ករណី ក្នុងចំណោមករណីផ្ដាសាយបក្សីទាំង៥៥ជានារី ហើយមាន១៩ករណី មានជីវិតចាប់តាំងពីមានជំងឺផ្ដាសាយបក្សី លើកដំបូងក្នុងឆ្នាំ២០០៥ នៅព្រះរាជាណាចក្រកម្ពុជា ។ករណីទី៧ កើតលើកុមារា អាយុ៨ ឆ្នាំ ដែលមានទីលំនៅ ក្នុងភូមិស្ពានដែក ឃុំព្រែកទន្លាប់ ស្រុកលើកដែក ខេត្តកណ្ដាល ត្រូវបានរកឃើញ ដោយវិទ្យាស្ថានប៉ាស្ទ័រកម្ពុជា នៅថ្ងៃទី៦ ខែមីនា ឆ្នាំ២០១៤ ថា មានជំងឺផ្ដាសាយបក្សី H5N1 ។ កុមារានេះ ចាប់ផ្ដើមមានគ្រុនក្ដៅ រងារញាក់ ហូរសំបោរ ឈឺក និងក្អក នៅថ្ងៃទី២៤ ខែកុម្ភៈ ឆ្នាំ២០១៤ ហើយឪពុកម្ដាយ ស្វែងរកការព្យាបាល នៅគ្លីនិកឯកជន ។ ដោយសារស្ថានភាពសុខភាពរបស់កុមារា កាន់តែធ្ងន់ធ្ងរ កុមារានេះត្រូវបានដាក់ឲ្យសម្រាកនៅមន្ទីរពេទ្យគន្ធបុប្ផា នៅថ្ងៃទី៤ ខែមីនា ឆ្នាំ២០១៤។ វត្ថុវិភាគត្រូវបានយកនៅថ្ងៃទី៥ ខែមីនា និងឱសថ Tamiflu ត្រូវបានផ្ដល់ឲ្យនៅថ្ងៃដដែល កុមារាបានធូរស្បើយ។
ករណីទី៨ កើតលើកុមារា អាយុ ១១ ឆ្នាំ ដែលមានទីលំនៅក្នុងភូមិទឹកល្អក់ ឃុំទឹកហូត ស្រុករលាប្អៀរ ខេត្តកំពង់ឆ្នាំង ត្រូវបានរកឃើញ ដោយវិទ្យាស្ថានប៉ាស្ទ័រកម្ពុជា នៅថ្ងៃទី៦ ខែមីនា ឆ្នាំ២០១៤ ថា មានជំងឺផ្ដាសាយបក្សី H5N1។ កុមារានេះ ចាប់ផ្ដើមមានគ្រុនក្ដៅ និងឈឺក្បាល នៅថ្ងៃទី៣ ខែមីនា ឆ្នាំ២០១៤ ហើយឪពុកម្ដាយ ស្វែងរកការព្យាបាល នៅគ្លីនិកឯកជន ក្បែរផ្ទះ នៅថ្ងៃដដែល និងថ្ងៃបន្ទាប់ដោយស្ថានភាពសុខភាពកាន់តែធ្ងន់ធ្ងរ កុមារានេះ ត្រូវបានដាក់ឲ្យសម្រាក នៅមន្ទីរពេទ្យខេត្តកំពង់ឆ្នាំង នៅថ្ងៃទី៦ ខែមីនា កុមារមានរោគសញ្ញា គ្រុនក្ដៅ ក្អក និងដង្ហើមហត់ និងបានបន្តបញ្ជូនមកមន្ទីរពេទ្យគន្ធបុប្ផា ។ កុមារបានបាត់បង់ជិវិត ក្រោយពីបានដាក់ឲ្យសម្រាកពេទ្យបានប៉ុន្មានម៉ោងថ្ងៃដដែល។ នៅដើមខែកុម្ភៈ សត្វមាន់បានចាប់ផ្ដើមងាប់ នៅក្នុងភូមិ និងនៅផ្ទះ និងបន្តងាប់ រយៈពេលមួយខែ។ កុមារាបានជួយបោច និងចំអិនមាន់ និងទាងាប់ និងហូបជាអាហារ។ ក្រុមឆ្លើយតបបន្ទាន់ របស់ក្រសួងសុខាភិបាលថ្នាក់ជាតិ និងថ្នាក់មូលដ្ឋាន បាននិងកំពុងធ្វើការអង្កេត ស្រាវជ្រាវការរាតត្បាតនិងឆ្លើយតបទៅតាមនីតិវិធីរបស់ជាតិ។ លោក ម៉ម ប៊ុនហេង រដ្ឋមន្ត្រីក្រសួងសុខាភិបាល បានមានប្រសាសន៍ថា ជំងឺ ផ្ដាសាយបក្សី H5N1 នៅតែបន្តគំរាមកំហែង ដល់សុខភាពប្រជាពលរដ្ឋកម្ពុជា និងកើតមានច្រើនលើកុមារ ដែលជាអ្នកមានភាពងាយរងគ្រោះច្រើន និងមានហានិភ័យខ្ពស់។ លោកបានរំលឹក ឪពុកម្ដាយ និងអ្នកថែទាំកុមារទាំងអស់ ត្រូវដាក់កុមារនៅឲ្យឆ្ងាយ ពីសត្វបក្សីឈឺឬងាប់ និងព្យាយាមឲ្យកុមារលេង ឲ្យឆ្ងាយពីមាន់និងទា។ ឪពុកម្ដាយ និងអ្នកត្រូវប្រាកដថា កុមារលាងដៃជាមួយសាប៊ូនឹងទឹក មុនពេលបរិភោគ និងបន្ទាប់ពីប៉ះជាមួយបសុបក្សី ។ ព្រោះវីរុសនេះ មិនអាចមើលឃើញ ដោយភ្នែកទទេដឹងទេ។ ប្រសិនបើពួកគេ មានដង្ហើមញាប់ ឬពិបាកដកដង្ហើម ត្រូវនាំកុមារទៅរកការព្យាបាលជាបន្ទាន់ នៅគ្រឹះស្ថានសុខាភិបាល ដែលនៅជិតផ្ទះរបស់លោកអ្នកបំផុត ហើយត្រូវប្រាប់មន្ត្រីសុខាភិបាល អំពីប្រវត្តិប៉ះពាល់ ជាមួយសត្វបក្សីឈឺឬងាប់។ សូមរំលឹកថា រាជរដ្ឋាភិបាលបានចេញនូវសារអប់រំដល់ប្រជាពលរដ្ឋ ក្នុងនោះរួមមាន៖ លាងដៃឲ្យបានញឹកញាប់ជាមួយសាប៊ូ និងទឹកមុនពេលបរិភោគ និងបន្ទាប់ពីប៉ះពាល់ជាមួយបសុបក្សី ដាក់កុមារនៅឆ្ងាយពីសត្វបក្សី ដាក់សត្វបក្សី នៅឲ្យឆ្ងាយពីកន្លែងរស់នៅ កុំបរិភោគ សត្វបក្សីឈឺ ឬងាប់ និងរាល់សត្វបក្សី ដែលធ្វើសម្រាប់បរិភោគ ត្រូវចំអិនឲ្យឆ្អិនល្អ៕
ដោយ៖ ស.ស្អាត