ភ្នំពេញ ៖ នៅក្នុងពិធីអញ្ជើញទៅទទួលព្រះរាជដំណើរ យាងនិវត្តន៍របស់ព្រះមហាក្សត្រ ព្រះករុណា ព្រះបាទសម្តេច ព្រះបរមនាថ នរោត្តម សីហមុនី និងព្រះមហាក្សត្រិយ៍ ព្រះវររាជមាតាជាតិខ្មែរ សម្តេចព្រះនរោត្តម មុនីនាថសីហនុ កាលពីរសៀលថ្ងៃទី១១ ខែកញ្ញា សម្តេចតេជោ ហ៊ុន សែន នាយករដ្ឋមន្រ្តី និងជាអនុប្រធានគណបក្ស ប្រជាជនកម្ពុជា និងលោក សម រង្ស៊ី ប្រធានគណបក្សសង្រ្គោះជាតិរួមគ្នានៅព្រលានយន្តហោះអន្តរជាតិភ្នំពេញ។ ប៉ុន្តែបើតាមការសង្កេតរបស់ក្រុមអ្នកកាសែតគេមិនបានឃើញមេដឹកនាំបក្សទាំងពីររូបជួបចាប់ដៃគ្នា និង និយាយរកគ្នានោះទេ។នៅរសៀលថ្ងៃដដែលនោះ ឥស្សរជនដែលបានអញ្ជើញទៅទទួលព្រះរាជដំណើរយាងនិវត្តន៍ របស់ព្រះ មហាក្សត្រ និង ព្រះមហាក្សត្រិយ៍ គេសង្កេតឃើញមានវត្តមានព្រះញាតិវង្សានុវង្ស មន្ត្រីព្រះបរមរាជវាំង សម្តេចប្រធានរដ្ឋសភា សម្តេចនាយករដ្ឋ មន្ត្រីកម្ពុជា សម្តេចប្រធានកាកបាទក្រហម និងមន្ត្រីជាន់ខ្ពស់ នៃរាជរដ្ឋាភិបាលកម្ពុជាជាច្រើនរូប រួមទាំងមេដឹកនាំបក្សនយោបាយ២ទៀតគឺបក្សសង្រ្គោះជាតិ និងបក្សរាជានិយមហ៊្វុនស៊ិនប៉ិច។
ដោយឡែកក្រុមអ្នកកាសែត និងមន្ដ្រីថ្នាក់ល្មមៗ មិនត្រូវបានអនុញ្ញាតឱ្យចូលទៅក្នុង បន្ទប់ VIP នោះទេ។ ប៉ុន្ដែបើតាមប្រភពព័ត៌មាន ដែលគេផ្ដល់ចេញពីក្នុងបន្ទប់ VIP នោះថា បើទោះជាអ្នកនយោបាយខាងលើនៅក្នុងបន្ទប់ VIP ជាមួយគ្នាក៏ពិតមែន ជាពិសេស សម្ដេចតេជោ ហ៊ុន សែន និង លោក សម រង្ស៊ី មិនបានស្វាគមន៍ ឬ និយាយរកគ្នានោះទេ គឺផ្ទុយពីការ រំពឹងទុកជាមុនថា នឹងមានការជួបពិភាក្សាគ្នា ដើម្បីបន្ធូរកំដៅនយោបាយរបស់ក្រុមអ្នកកាសែត និងអ្នកតាមដានស្ថានការណ៍នយោបាយនៅកម្ពុជា។រហូតដល់ដំណើរយាងនិវត្តន៍មកដល់របស់ព្រះករុណា ព្រះ មហាក្សត្រ និង ព្រះមហាក្សត្រិយ៍បន្ទាប់ពីធ្វើបដិសណ្ឋាកិច្ចរួចហើយ ឥស្សរជនខាងលើក៏មិនបានផ្ដល់ការអត្ថាធិប្បាយអ្វី ដល់អ្នកកាសែតវែងឆ្ងាយនោះដែរ ។ព្រះរាជដំណើរយាងនិវត្តន៍របស់ព្រះ មហាក្សត្រ បានក្លាយជាព្រះរាជដំណើរដ៏ចាប់អារម្មណ៍មួយ សម្រាប់ក្រុមអ្នកសារព័ត៌មាន និងអ្នកតាមដានស្ថានការណ៍នយោបាយនៅកម្ពុជា ព្រោះជាការបង្ហាញព្រះវត្តមាន ដ៏មហាសែនកក់ក្តៅសម្រាប់ប្រជានុរាស្រ្តខ្មែរខណៈស្ថានការណ៍នយោបាយ កំពុងជួបភាពតានតឹង។ ហើយក៏ជាប្រទីបដ៏ភ្លឺបំផុតសម្រាប់ដោះបញ្ហាជាប់គាំងនយោបាយនាពេលបច្ចុប្បន្នយ៉ាងណាក៏ដោយក៏ចាត់ទុកថានេះជាជំនួបដំបូងរវាងសម្តេចតេជោ ហ៊ុន សែន និងលោក សម រង្ស៊ី បន្ទាប់ ពីសម្តេចតេជោ ហ៊ុន សែន បានស្នើសុំព្រះមហាក្សត្រ ព្រះរាជទានលើកលែងទោសជូន លោក សម រង្ស៊ី និងផ្តល់ឱកាសឲ្យលោកបានវិលចូលប្រទេសកម្ពុជាវិញ បន្ទាប់ ពីនិរទេសនៅ ក្រៅប្រទេសអស់រយៈពេលជិត៤ឆ្នាំ ព្រមទាំងបានចូលរួមក្នុងយុទ្ធនាការស្វែងរកការគាំទ្រនិងបោះឆ្នោតទៀតផង។សូមបញ្ជាក់ថា ក្រោយពេលបញ្ចប់ពិធីទទួល ព្រះរាជដំណើរហើយគេឃើញសម្តេចតេជោ ហ៊ុន សែន និងលោក សម រង្ស៊ី បានឡើងរថយន្តធ្វើដំណើរចេញទៅរៀងៗខ្លួន។ ប៉ុន្ដែខណៈកំពុងធ្វើដំណើរចាកចេញលោក សម រង្ស៊ី បានថ្លែងប្រាប់អ្នកកាសែតពីក្នុងរថយន្ដថា រូបលោក និង លោក កឹម សុខា មិនបានជួប សម្ដេច ហ៊ុន សែន នោះទេ ដោយលោកបញ្ជាក់ថា ការមកព្រលានយន្ដ ហោះពេលនេះ ក្នុងគោលបំណងតែមួយគត់ គឺទទួលព្រះរាជដំណើររបស់ព្រះមហាក្សត្រ និង សម្ដេចម៉ែ តែប៉ុណ្ណោះ៕
ដោយ ៖ សស្អាត