ភ្នំពេញ ៖ ខណៈថ្ងៃបុណ្យចូលឆ្នាំថ្មីឈានជិតមកដល់ ប្រជាពលរដ្ឋ និងពលករចំណាក់ស្រុកខ្មែរ បាននិងរៀបចំខ្លួនវិលត្រលប់មកស្រុកកំណើតវិញតាមទន្លាប់ ដើម្បីជួបជុំក្រុមគ្រួសារ សាច់ញ្ញាតិ ប្រពន្ធ កូន ក្នុងឱកាសបុណ្យចូលឆ្នាំខ្មែរខាងមុខនេះ។ ប៉ុន្តែអ្វីដែលគួរឲ្យកត់សម្គាល់នៅពេលនេះ គឺតម្លៃរថយន្តឈ្នួលគ្រប់ប្រភេទ កំពុងតែនាំគ្នាឡើងថ្លៃខ្ពស់ ហួសពីការស្មាន ហើយក៏ពុំមានការទប់ស្កាត់ពីអាជ្ញាធរ ឬ មន្រ្តីមានសមត្ថកិច្ច ស្ថាប័នណាមួយ នៅឡើយទេ។
ចំណែកនៅក្រុងប៉ោយប៉ែត ខេត្តបន្ទាយមានជ័យឯណ្ណោះវិញ នៅព្រឹកថ្ងៃទី០២ ខែមេសា នេះ គេឃើញពលករខ្មែរដែលបានធ្វើចំណាកស្រុក ស្វែងរកការងារធ្វើនៅប្រទេសជិតខាង បានសម្រុកនាំគ្នាមកស្រុកកំណើតវិញ តាមច្រករបៀង និងច្រកអន្តរជាតិគ្រប់ទីកន្លែង ។ ប៉ុន្តែគួរឲ្យសោកស្តាយអ្វីដែលជាបញ្ហាសម្រាប់ពួកគាត់នាពេលនេះ គឺតម្លៃរថយន្តឈ្នួលគ្រប់ប្រភេទកំពុងឡើងថ្លៃយ៉ាងគំហុក ធ្វើឲ្យពួកគាត់នាំគ្នារិះគន់ចំពោះសមត្ថកិច្ចថាគ្មានចំណាត់ការ បណ្តែតបណ្តោយឲ្យពួកគេ(ក្រុមរថយន្តឈ្នួល)ឡើងថ្លៃស្រេចតែអំពើចិត្ត ធ្វើបាបប្រជាជន ខ្លួនឯងដែលខិតខំទៅធ្វើការឲ្យគេទាំងស្របច្បាប់ និង មិនស្របច្បាប់ ដើម្បីសន្សំប្រាក់កាសបានបន្តិចបន្តួចយកមកចិញ្ចឹមប្រពន្ធ និងកូនចៅរៀនសូត្រនោះ។
តាមការបំភ្លឺពីពលករខ្មែរ១រូប ដែលមកពីរកស៊ីក្នុងប្រទេសថៃនោះ បានបញ្ជាក់ថា ពួកគាត់ខ្លះត្រូវបានថៅកែថៃ អនុញ្ញាតិឲ្យឈប់សំរាក រយៈពេលម៉ាបុណ្យចូលឆ្នាំថ្មីនេះ ដើម្បីមកជួបជុំសាច់ញាតិ ក្នុងស្រុកកំណើត ។ ពលករខាងលើបានបន្តទៀតថា ពេលពួកគាត់ មកដល់ច្រករបៀងបង់លុយជូនសមត្ថកិច្ច ក្នុងម្នាក់៤០០បាត ដើម្បីចូលមកស្រុកកំណើតវិញ មកដល់ស្រុកខ្មែរហើយ បែរជាតម្លៃឡានក្រុងនិងឡានតាក់ស៊ី នាំគ្នាកៀបក មិនខុសពីមន្ត្រីប៉ូលិសតាមច្រកព្រំដែននោះទេ ព្រោះថាតម្លៃសំបុត្រមួយសន្លឹក ពីប៉ោយប៉ែត មកភ្នំពេញមានតម្លៃរហូតដល់ទៅ៥០០បាត ពីប៉ោយប៉ែតទៅបាត់ដំបង ២៥០បាត។ បើធៀបទៅនិងតម្លៃថ្ងៃធម្មតានោះ គឺតម្លៃរថយន្តក្រុងមួយសន្លឹកតែ៣ម៉ឺនរៀលអាចស្មើនិងជាង២០០បាតប៉ុណ្ណោះ ចំណែករថយន្តតាក់ស៊ីវិញម្នាក់ចាប់ពី៧០០ទៅ៩០០បាត ខុសពីតម្លៃថ្ងៃធម្មតាតែ៤ម៉ឺនជាងទៅ៥ម៉ឺនរៀលប៉ុណ្ណោះ ។
ក្រៅពីឡើងថ្លៃចំពោះដំណើរទៅកាន់រាជធានី\ខេត្តផ្សេងៗទៀតនោះ តម្លៃឡានតាក់ស៊ីនៅក្នុងខេត្តនេះផ្ទាល់ក៏ឡើងថ្លៃកប់ពពកដែរ គឺពីប៉ោយប៉ែតទៅក្នុងទីរួមខេត្តបន្ទាយមានជ័យ ពី២ទៅ២ម៉ឺនរៀលជាងឯណ្ណោះ ដែលខុសពីតម្លៃធម្មតាក្នុងម្នាក់តែ៨ពាន់ទៅ១ម៉ឺនរៀល។
លោក ងោ ម៉េងជ្រួង អភិបាលក្រុងប៉ោយប៉ែតបានឲ្យដឹងនៅពេលថ្មីនេះថា លោកបានកោះប្រជុំម្ចាស់ក្រុមហ៊ុន លក់សំបុត្ររថយន្តក្រុងរួចហើយ គឺសុំឲ្យលក់តម្លៃសំបុត្រធម្មតាប៉ុណ្ណោះ មិនត្រូវឡើងថ្លៃឡើយ បើសិនជាអ្នកណាហ៊ានលក់ខុសតម្លៃក្នុងបន្ទុកនោះ គឺត្រូវតែទទួលខុសត្រូវចំពោះមុខច្បាប់។ ចំពោះតម្លៃរថយន្តតាក់ស៊ីវិញនោះ លោកថា ខាងលោកមិនអាចគ្រប់គ្រងបានទេ ពីព្រោះវាស្ថិតខាងក្រៅប្រព័ន្ធសាធារណៈគ្រប់គ្រង។ យ៉ាងណាលោបានអំពាវនាវឲ្យប្រជាពលរដ្ឋទាំងអស់ មិនថាតែពលករខ្មែរនោះទេគឺចូលរួមរាយកាផ្តល់ព័ត៌មាន អំពីរថយន្តក្រុងលក់សំបុត្រថ្លៃ មកអាជ្ញាធរឲ្យបានភ្លាមៗ ដើម្បីយើងមានវិធានការទប់ស្តាត់ និងផាកពិន័យចំពោះក្រុមហ៊ុនណាដែលមិនគោរពតាមសៀវភៅបន្ទុករបស់រដ្ឋបានកំណត់៕
ដោយ៖ សស្អាត