ភ្នំពេញ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក(គ.ស.ច.គ) និងអង្គការដៃគូរម្ចាស់ជំនួយ កំពុងជម្រុញការយកចិត្តទុកដាក់ បង្កើនសុវត្ថិភាពចរាចរណ៍ នៅក្នុងឱកាសពិធីបុណ្យចូលឆ្នាំខ្មែរ ឆ្នាំមមី ឆស័ក ព.ស.២៥៥៨ ដែលនឹងចូលមកក្នុងពេលដ៏ខ្លីនេះ ដើម្បីរួមចំណែកកាត់បន្ថយ គ្រោះថ្នាក់ចរាចរណ៍ឲ្យនៅកម្រិតទាប តាមពាក្សស្លោករបស់ប្រមុខរាជរដ្ឋាភិបាលដែលបានលើកឡើងថា ថ្ងៃនេះ និង ថ្ងៃស្អែក កុំឲ្យមានគ្រោះថ្នាក់ចរាចរណ៍ ។
ក្នុងសិក្ខាសាលា លើកកម្ពស់ការយល់ដឹងអំពីការពាក់មួកសុវត្ថិភាព និងការមិនបើកបរក្រោមឥទ្ធិពលគ្រឿងស្រវឹង ក្នុងចំណោមមន្ត្រី នៃអគ្គស្នងការដ្ឋាននគរបាលជាតិ និងចែកមួកសុវត្ថិភាពដល់នាយនគរបាល នៃនាយកដ្ឋានអង្គរក្សជាង១០០នាក់ ដើម្បីធ្វើជាគំរូសម្រាប់ប្រជាពលរដ្ឋ ដែលបានធ្វើឡើងនៅថ្ងៃទី២ ខែ មេសា ២០១៤ នៅអគ្គស្នងការនគរបាលជាតិ។
.jpg)
លោក ពៅ ម៉ាលី អគ្គលេខធិការ នៃគណៈកម្មាធិការជាតិ សុវត្ថិភាពចរាចរណ៍ផ្លូវគោគ បានមានប្រសាសន៍ថា មុននឹងឱកាសពិធីបុណ្យចូលឆ្នាំខ្មែរឈានមកដល់ គណៈកម្មាធិការជាតិសុវត្ថិភាពចរាចរណ៍ផ្លូវគោក សហការជាមួយអង្គការដៃគូរ និងម្ចាស់ជមនួយ បានកំពុង រៀបចំដំណាក់កាលនៃការបណ្តុះបណ្តាលជាច្រើន អំពី កត្តាហានិភ័យ ទាក់ទងនឹងការមិនពាក់ខ្សែក្រវ៉ាត់សុវត្ថិភាព និងមិនពាក់មួកសុវត្ថិភាព នៅពេលធ្វើដំណើតាមរថយន្ត និងម៉ូតូក្នុងខេត្តគោលដៅចំនួន៥ ដូចជា រាជធានីភ្នំពេញ ខេត្ត សៀមរាប កណ្តាល កំពង់ស្ពឺ និងខេត្តកំពង់ចាម។
លោក ពៅ ម៉ាលី បានបន្ថែមថា គណៈកម្មាធិការជាតិសុវត្ថិភាពចរាចរណ៍ផ្លូវគោក បានសហការជាមួយក្រសួង មហាផ្ទៃ ដោយចុះត្រួតពិនិត្យ ចំពោះអ្នកប្រើប្រាស់ផ្លូវ យាន្តយន្ត ទោចក្រយាន្តយន្ត ដែលមិនមានលក្ខណៈត្រឹមត្រូវ តាមបច្ចេកទេសឬ បទដ្ឋានច្បាប់ដែលបានកំណត់ មានន័យថា អ្នកជិះរថយន្តនិងអ្នករួមដំណើរមិនពាក់ខ្សែក្រវ៉ាត់សុវត្ថិភាព អ្នកជិះម៉ូតូនិងអ្នករួមដំណើរមិនពាក់មួកសុវត្ថិភាព ពិសេសអ្នកបើកបរក្រោមឥទ្ធិពលគ្រឿងស្រវឹង ការបើកបរហួសល្បឿនកំណត់ និងហាមឃាត់មិនឲ្យមានការផ្ទុកទំនិញសំពីងសំពោង រឺដឹកលើសទំងន់កំណត់ និងត្រួតពិនិត្យប័ណ្ណបើកបរជាដើម ជៀសវាងគ្រោះថ្នាក់ដែលអាចកើតមានជាយថាហេតុ។
.jpg)
លោកអគ្គលេខាធិការបញ្ជាក់ថា វិធានខាងលើនេះ បានចាប់ផ្តើមតាំងពីថ្ងៃទី២៧ ខែ មីនា មកម្ល៉េះ ហើយនិងបន្តរហូតដល់ចូលឆ្នាំតែម្តង សំដៅធ្វើយ៉ាងណាឲ្យមានការចាប់អារម្មណ៍ពី អ្នកប្រើប្រាស់ផ្លូវ ឲ្យយល់ពីគ្រោះថ្នាក់ចរាចរណ៍មុនចូលឆ្នាំខ្មែរនេះ។ ជាមួយគ្នានេះ គណៈកម្មាធិការជាតិសុវត្ថិភាពចរាចរណ៍ផ្លូវគោក កំពុងស្វះស្វែងរកប្រភពអ្នកជំនួយផ្សេងៗដើម្បីធ្វើការផ្សព្វផ្សាយដល់ប្រជាពលរដ្ឋបន្ថែមទៀត សម្រាប់ឱកាសពិធីបុណ្យចូលឆ្នាំខ្មែរចូលមកដល់។
លោក ស្ទីវឹន អ៊ីឌីង ប្រធានក្រុមការងារជំងឺមិនឆ្លងនិងសុខភាពបរិស្ថាននៃអង្គការសុខភាពពិភពលោក(WHO) បានមានប្រសាសន៍ថា WHO បានគាំទ្រនូវរាល់កិច្ចខិតខំប្រឹងប្រែងរបស់កម្ពុជាក្នុងការ ទប់ស្កាត់នូវគ្រោះថ្នាក់ចរាចរណ៍នេះ។ការដាក់ឲ្យដំណើរការឡើងវិញនូវការរឹតបន្តឹងច្បាប់នាពេល ថ្មីៗនេះ បានបង្ហាញនូវការប្តេជ្ញាចិត្តដ៍មុតមាំរបស់រាជរដ្ឋាភិបាល ក្នុងការការពារអាយុជីវិតប្រជាជន នៅពេលធ្វើដំណើរនៅតាមផ្លូវ ហើយនិងធានាឲ្យបានថាច្បាប់ចរាចរណ៍ត្រូវបានគោរពដោយប្រជាជនគ្រប់រូប។
.jpg)
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា មានប្រសាសន៏ថា ដើម្បីចូលរួមចំណែកកាត់បន្ថយក៍ដូចជាបង្កើនសុវត្ថិភាពចរាចរណ៍នៅក្នុងពិធីបុណ្យចូលឆ្នាំខ្មែរ អង្គការបានធ្វើការអប់រំផ្សព្វផ្សាយដល់ឯ.ឧគ្រូអ្នកគ្រូ និងសិស្សានុសិស្សនៅតាម គ្រឹះស្ថាន អប់រំ នានា ស្តីពីការពាក់មួកសុវត្ថិភាព ទាំងអ្នកបើកបរ អ្នកដំណើរ គិតទាំងកុមារ ផងដែរ។
លោកបន្តថា អង្គការកំពុងតែស្នើសុំនូវស្តង់មួយក្នុងកម្មវិធីអង្គរសង្រ្កានដែលនឹង ប្រព្រឹត្តិទៅនៅខេត្តសៀមរាប ក្នុងថ្ងៃបុណ្យចូលឆ្នាំ ដើម្បីធ្វើការផ្សព្វផ្សាយនិងជម្រុញដល់ អ្នកប្រើប្រាស់ផ្លូវគ្រប់រូប រួមទាំងយុវជនឲ្យបើកបរដោយគោរពច្បាប់ចរាចរណ៍ឲ្យបានខ្ជាប់ខ្ជួន ពិសេសការពាក់មួកសុវត្ថិភាពនៅគ្រប់ពេលវេលាធ្វើដំណើរតាម ទោចក្រយានយន្ត។
សូមបញ្ជាក់ថា យោងតាមរបាយការណ៍របស់គណៈកម្មាធិការជាតិសុវត្ថិភាពចរាចរណ៍ផ្លូវគោក បានបង្ហាញថា ចំនួនអ្នកគ្រោះថ្នាក់ចរាចរណ៍នៅក្នុងពិធីបុណ្យចូលឆ្នាំ នាឆ្នាំកន្លងមក មានចំនួនចាប់ពី២០០នាក់ឡើងទៅ ហើយសង្ឃឹមថាចំនួននេះនឹងថយចុះក្នុងឆ្នាំនេះ និងឆ្នាំបន្ទាប់ ៕
ដោយ៖ ស.ស្អាត