ភ្នំពេញ៖ លោក អង្គ វង្សវឌ្ឍនា រដ្ឋមន្ត្រីក្រសួងយុត្តិធ៌ បានដឹកនាំប្រតិភូមួយក្រុមរបស់ក្រសួងទៅចូលរួមក្នុងសន្និសីទ អន្តរជាតិលើកទី៨ ស្ដីពីពិភពលោកគ្មានទោសប្រហារជីវិត ចាប់ពីថ្ងៃទី២៩ ដល់ថ្ងៃទី៣០ វិច្ឆិកានៅទីក្រុង រ៉ូម ប្រទេសអ៊ីតាលី។ដំណើរអញ្ជើញទៅចូលរួមសន្និសីទអន្តរជាតិលើកទី៨របស់រដ្ឋមន្ត្រី ក្រសួងយុត្តិធម៌ធ្វើឡើង តបតាមការអញ្ជើញរបស់សហគមន៍Sant ' Egidio (Comunite de Sant ' Egidio )នៃប្រទេស អ៊ីតាលី ។
លោក សំ ប្រជាមានិត នាយខុទ្ទកាល័យ រដ្ឋមន្ត្រីក្រសួងយុត្តិធម៌បានឲ្យដឹងថា សន្និសីទអន្តរជាតិស្ដីពីពិភពលោកគ្មានទោសប្រហារជីវិតនេះ មានការ ចូលរួមពីបណ្ដាលរដ្ឋមន្ត្រីក្រសួងយុត្តិធម៌ នៃបណ្ដាលប្រទេសនានាជាច្រើននៅលើពិភពលោក។នាយខុទ្ទកាល័យរួបនេះបន្តថា ក្រុមប្រតិភូនៃបណ្ដាលប្រទេសទាំងនោះ បានធ្វើបទអន្តរាគមន៍ទាក់ទងទៅនឹងទោសប្រហារជីវិត នៅក្នុងអង្គសន្និសីទហើយក៏មានការពិភាក្សា ផ្លាស់ប្ដូរបទពិសោធន៍គ្នាទៅវិញ ទៅមកលើប្រទេសដែលមានទោសប្រហារជីវិត និងប្រទេសគ្មានទោសប្រហារជីវិត ទាក់ទងនិងបញ្ញត្តិច្បាប់ជាតិ និងការអនុវត្តន៍ច្បាប់ ក្នុងការស្វែងរកយុត្តិធម៌នៅក្នុងប្រទេសនីមួយៗ។សូមបញ្ជាក់ថា នៅព្រះរាជាណាចក្រកកម្ពុជា ច្បាប់បានកំណត់ថាគ្មានទោសប្រហារជីវិតទេ ពោលគឺមានត្រឹមតែទោសពិន័យជាប្រាក់ និងដាក់ពន្ធធនាគារអស់មួយជីវិតតែប៉ុណ្ណោះ៕ ដោយ៖ ស.ស្អាត