ភ្នំពេញ៖ ក្រសួងសាធារណការនិងដឹកជញ្ជូន នៅព្រឹកថ្ងៃទី១៧ខែធ្នូឆ្នាំ២០១៣នេះបើកឲ្យមានវេទិកាសាធារណៈមួយ ស្តីពីការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់របស់យានយន្តដឹកជញ្ជូន ដើម្បីធានាឲ្យការដឹកជញ្ជូនប្រព្រឹត្តទៅតាមច្បាប់និងបទបញ្ជារបស់រាជរដ្ឋាភិបាលត្រឹមត្រូវ ក្នុងការប្រកបអាជីវកម្ម និងធានាដល់ស្ថិរភាពផ្លូវថ្នល់បានយូរអង្វែង ព្រមទាំងស្វែងរកដំណោះស្រាយរួមគ្នាបន្ថែមលើការខ្វះខាតកន្លងមក និងចាត់វិធានការចំពោះអ្នកប្រព្រឹត្តល្មើសច្បាប់។ ក្រោមវត្តមាន លោក ត្រាំ អ៊ីវតឹក រដ្ឋមន្ត្រីក្រសួងសាធារណការ និងដឹកជញ្ជូន និងមានអ្នកពាក់ព័ន្ធចូលរួមចូលរួមជាច្រើននាក់ នៅទីស្តីការក្រសួង។
.jpg)
បើតាមរបាយការណ៍លោក លឹម ស៊ីដេនីន ប្រធានគណៈកម្មាធិការសម្របសម្រួលអចិន្រ្តៃយ៍នៃគណៈកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានលើកឡើងពីរនៃការទប់ស្កាត់បទល្មើសយានយន្តដឹកជញ្ជូនលើសទម្ងន់កម្រិតកំណត់ ថា គោលបំណងធ្វើការត្រួតពិនិត្យតាមដាន និងវាយតម្លៃលើសកម្មភាពអនុវត្តច្បាប់ និងបទបញ្ជារបស់រាជរដ្ឋាភិបាលក្នុងការទប់ស្កាត់នូវបទល្មើសដឹកជញ្ជូនលើសទម្ងន់ និងដើម្បីស្តាប់នូវមតិយោបល់របស់ម្ចាស់ក្រុមហ៊ុនដឹកជញ្ជូន ឬ ម្ចាស់យានយន្តដឹកជញ្ជូនដែលកំពុងជួបប្រទះនាពេលកន្លងមក ទាំងការលំបាក និងទាំងការសម្របសម្រួលពីគ្រប់សមត្ថកិច្ចឈរជើងនៅតាមស្ថានីយ ជញ្ជីងចល័ត និងដើម្បីស្វែងរកដំណោះស្រាយរួមបន្ថែមទៀត និងចាត់វិធានការរាល់ទង្វើរបស់បុគ្គលទាំងឡាយណាដែលប្រព្រឹត្តល្មើសច្បាប់។
.jpg)
លោក ត្រាំ អ៊ីវតឹក រដ្ឋមន្ត្រីសាធារណការ និងដឹកជញ្ជូនបានមានប្រសាសន៍នៅក្នុងវេទិកានោះថា រហូតមកដល់ពេលបច្ចុប្បន្ននេះក្រសួងសាធារណការ រួមទាំងរដ្ឋបាលថ្នាក់ក្រោមជាតិបានរៀបចំអោយមានស្ថានីយជញ្ជីងចល័ត មានក្រុមត្រួតពិនិត្យចល័តតាមបណ្តាខេត្ត និងក្រុមចល័តចម្រុះរបស់ក្រសួង ហើយទោះជាយ៉ាងណានៅតែមានក្រុមដឹកជញ្ជូន មិនបានរួមសហការចូលថ្លឹងតាមស្ថានីយ និងនៅតែមានការដឹកជញ្ជូនលើសទម្ងន់កម្រិត ហើយនៅតែមានក្រុមធ្វើអន្តរាគមន៍រំដោះយកយានយន្តចេញពីកន្លែងឃាត់ទុក។លោករដ្ឋមន្រ្តីបន្តថា ការធ្វើបែបនេះគឺយើងគ្រាន់តែចង់ឲ្យមានសុវត្តិភាពក្នុងការដឹកជញ្ជូន និងមិនបង្ករមហន្តរាយដល់ប្រព័ន្ធផ្លូវថ្នល់តែប៉ុណ្ណោះ។ ហើយរយៈពេលកន្លងមកនៅមិនទាន់មានការប្តឹងពីករណីផាកពិន័យមិនត្រឹមត្រូវណាមួយនៅឡើយទេ ប៉ុន្តែច្បាប់ប្រឆាំងអំពើពុករលួយបានកំណត់ឲ្យប្តឹងសមត្ថកិច្ចណា ដែលយកលុយលើសពីការកំណត់របស់ច្បាប់ដែលមានចែងជាធរមាន។
បើទោះជាមានការរិះគន់ពីមជ្ឈដ្ឋានសាធារណៈ ក៏ដូចជាម្ចាស់ក្រុមហ៊ុនដឹកជញ្ជូន និងម្ចាស់យានយន្តមួយចំនួនបានធ្វើការតវាបិទផ្លូវ ឬ អន្តរាគមន៍ និងមានការចុះផ្សាយភាពអវិជ្ជមានមួយចំនួនកន្លងមកក្តី លោករដ្ឋមន្រ្តីបានមើលឃើញថា ក្រោមកិច្ចខិតខំប្រឹងប្រែងអនុវត្តច្បាប់ របស់មន្រ្តីគ្រប់ជាន់ថ្នាក់ដែលពាក់ព័ន្ធ ធ្វើឲ្យបទល្មើសនៃការដឹកជញ្ជូនលើសទម្ងន់កម្រិតកំណត់មានការថយចុះច្រើន។ មួយវិញទៀតដើម្បីទប់ស្កាត់នូវរាល់បទល្មើសនៃការដឹកជញ្ជូនទាំងអស់នោះបាន គឺវាទាល់តែមានការចូលរួមចំណែកពីយើងគ្រប់គ្នា ។
សូមបញ្ជាក់ថា នៅពេលថ្មីកន្លងមកនេះ មានក្រុមអាជីវករដែលរកស៊ីដឹកកសិផលយកទៅលក់នៅព្រំប្រទល់ដែនប្រទេសជិតខាងបានចោទប្រកាន់ក្រុមជញ្ជីងចល័តដែលចាំថ្លឹងរថយន្តដែលដឹកលើសទម្ងន់នៅតាមស្ថានីយ៍និមួយៗ កំពុងតែគាបជំរិតទារប្រាក់ពីពួកគាត់ ដោយសំអាងទៅលើស.ជ.ណរបស់គណៈរដ្ឋមន្ត្រី ឬ ការងារចំពោះមុខដែលក្រសួងសាធារណៈការ និងដឹកជញ្ជូនបានដាក់ចុះ ពិសេសគឺអនុសាសន៍របស់ប្រមុខរាជរដ្ឋាភិបាលឲ្យទប់ស្កាត់ការខូចផ្លូវថ្នល់ដែលបណ្តាលមកពីការដឹកលើទម្ងន់ ៕ ដោយ ៖ សស្អាត