ភ្នំពេញ៖ បើទោះជាពុំទទួលបានសម្លេងគាំទ្រ នៅក្នុងរដ្ឋសភា នាអាណត្តិទី៥នេះក្តី គណ​បក្ស រាជានិយម ហ៊្វុន​ស៊ិន​ប៉ិច​​ តែងតែជួបប្រជុំគ្នាជារើយៗ រវាងថ្នាក់ដឹកជាន់ខ្ពស់ និងមន្រ្តីដឹក​នាំថ្នាក់មូលដ្ឋាន ដើម្បី​រិះរកនូវយន្តរ​ការសម្រាប់​ពង្រីកពង្រឹងខ្លួនជាថ្មី នៅតាមគ្រប់តំបន់ ស្រុក ខណ្ឌ រាជធានី\ខេត្ត។ ជាក់ស្តែងនៅព្រឹកថ្ងៃទី២៩មីនា កន្លងទៅថ្មីៗ​នេះ​ មានការជួបជុំគ្នាមួយ ដែលមានមន្រ្តីថ្នាក់ អភិបាលរងរាជធានី\ខេត្ត អភិបាលរងស្រុក\ខណ្ឌ និង ចលនាស្រ្តី​ទូ​ទាំង​​​​​​ប្រទេស ចូលរួម​ប្រមាណជាងមួយរយនាក់​ ធ្វើការបោះឆ្នោត ជ្រើសរើសប្រធានចលនាស្រ្តី​គណបក្សថ្នាក់ជាតិ ។

មានសុវនីយ៍ក្នុងឱកាសនោះ សម្តេច ព្រះអនុជ នរោត្តម អរុណរស្មី ប្រធានគណបក្ស​ហ៊្វុនស៊ិនប៉ិច ថ្លែងថា យើង​​​នៅតែមានសង្ឃឹមជានិច្ច ថាយើងនឹងទទួលបានការគាំទ្រជាថ្មី​ពីសំណាក់​បងប្អូនប្រជាពលរដ្ឋ ដែលលោក​មេត្តា​អា​ណិត​ស្រលាញ់របបរាជានិយម អាស្រ័យ ធម្មនុញ្ញ និងជាគណបក្សតែមួយគតដែលបាននាំមកនូវសន្តិភាព សន្តិសុខ ផ្សះផ្សារជាតិ ពិសេសគឺបាវចនាជាតិ ដែល ជាតិ សាសនា ព្រះមហាក្សត្រ ។

សម្តេច ព្រះអនុជ មានសុវនីយ៍ទៀតថា ពេលនេះយើងមិនទទួលបានការគាំទ្រ តែយើងមិន​អស់សង្ឃឹមនោះទេ គឺ​ត្រូវ​ខិតខំប្រឹងប្រែង ស្វែងរកយន្តរការថ្មីថ្មី ដើម្បីបង្ហាញនូវបងបង្អូនប្រជា ពលរដ្ឋឲ្យលោកបានឃើញពីស្នាដៃ និង​សមិទ្ធ​ផលជាច្រើនដែលយើងបាននាំមក ពិសេស ខិតខំយកចិត្តទុក​ជាក្នុងការចូលរួម​ជួយប្រជាពល​រដ្ឋដែលលោក​មានបញ្ហារងគ្រោះ ដោយការ រំលោភបំពាន គៀបសង្គត់ កេងប្រវ័ញ្ចពីក្រុមជនមានអំណាចផ្សេង នៅតាមតំបន់ ខេត្ត ក្រុង នៅទូទាំងប្រទេសពីសំណាក់មន្រ្តីថ្នាក់មូលដ្ឋានរបស់យើង។

ជាងនេះទៅទៀត ព្រះអង្គបានជម្រុញឲ្យសមាជិការ សហជីវនី ដែលជាថ្នាក់ដឹកនាំស្រ្តីនៅគ្រប់ និគម ជនបទ ត្រូវ​យក​ចិត្តទុកដាក់ឲ្យបានខ្លាំងពីសុខទុកស្រ្តី ព្រោះគណបក្សយើងមានស្រ្តី ជាថ្នាក់ដឹកនាំ បង្ហាញ​ពីការយក​ចិត្តទុក​ដាក់​​រវាងស្រ្តីនិងស្រ្តីដូចគ្នា យល់ចិត្តគ្នា មានតែស្រ្តីទេ ដែលដឹងច្បាស់ពីសុខទុកស្រ្តីដូចគ្នានោះ ។ ដូច្នេះ​ចលនា​ស្រ្តី​ដែលទើបតែទទួលបានការគាំទ្រ ថ្មីនេះ ត្រូវតែបង្ហាញស្នាដៃឲ្យប្រជាពលរដ្ឋបានឃើញ ថាគណបក្សហ៊្វុន​ស៊ិនប៉ិច​ពិតជានៅ ជាប់ជានិច្ចជាមួយបងប្អូនប្រជាជន គ្រប់តំបន់ និគមជនបទ មិនទៅណាជាដាច់ខាត។ ទីណា​មានការ​លំ​បាក​​ត្រូវតែមានមុខចលនាស្រ្តីហ៊្វុនស៊ិនប៉ិចនៅទីនោះ ដើម្បីរួមចំណែកជួយ សម្រូល​កិច្ចការ​លំបាក​របស់បង​ប្អូន​ប្រ​ជា​​ពលរដ្ឋ។

ដោយឡែកទាក់ទិនទៅនិងកិច្ចសហប្រតិបត្តិការអន្តរជាតិវិញ ត្រូវបានលោក ញឹក ប៊ុនឆៃ អគ្គលេខធិការ​គណបក្ស​ហ៊្វុនស៊ិនប៉ិច លើកឡើងថា ហ៊្វុនស៊ិនប៉ិច នៅតែជាគណបក្សមួយ​ដែលមានការទទួល​ស្គាល់ជាផ្លូវការ​ពីសំណាក់​សហគមន៍​អន្តរជាតិ ពិសេសប្រទេសជាមិត្ត ដែលធ្លាប់បានស្គាល់ពីភាពខ្លាំងនៅក្នុងការបោះឆ្នោតអាណត្តិទី១ និង​បាន​​ដឹកនាំប្រទេសឲ្យ​មានលិទ្ធិប្រជាធិបតេយ្យ សេរីពហុបក្សនៅកម្ពុជា ហើយ​បានគាំទ្រឥតងាករេទាំងកម្លាំងកាយ ចិត្ត មិនថាក្នុងកាលៈទេសៈណានោះឡើយ។

លោក ញឹក ប៊ុនឆៃ បានបញ្ជាក់ជាថ្មីថា មហាមិត្តដែលមានទំនាក់ទមនងកប់ជ្រៅជាយូមក​ហើយ​នោះ​គឺ​សាធារណៈ​រដ្ឋ​ប្រជាមានិតចិន ពិសេសគណបក្សកុំម្មុនីស្តចិន បានបង្ហាញពីជំហរ ឥតងាករេ ក្នុងការគាំទ្រយ៉ាងពេញទំហឹង​ ចំ​ពោះ​​​​​គណបក្សរាជានិយម ហ៊្វុនស៊ិនប៉ិច  មិនថា ពេលវេលាណានោះឡើយ ។ ដូចនេះ​ដើម្បី​ឆ្លើយតប​ទៅនឹងការ​គាំ​ទ្រ​​​​នេះ ​ថ្នាក់ដឹកនាំ​ហ៊្វុនស៊ិនប៉ិចគ្រប់ជាន់ថ្នាក់ត្រូវតែ ពង្រឹងសមត្ថភាព ធនធានរបស់ខ្លួន ឲ្យបានខ្លាំងក្លា ដើម្បីរក ឲ្យ​បាននូវការគាំ្រជាថ្មីឡើងវិញពីសំណាក់ប្រជាពលរដ្ឋ សមាជិក សមាជិការនៅទូទាំង​ប្រទេស៕ដោយ ៖ សស្អាត