ភ្នំពេញ៖ សេវាជួលយានយន្ត នឹងក្លាយជាទ្រង់ទ្រាយសំខាន់មួយនៃឩស្សាហកម្មដឹកជញ្ជូននៅកម្ពុជា ដើម្បី​សម្រួល​ការ​ធ្វើ​ដំណើរ និង ដឹកជញ្ជូនទេសចរ ដែលឆ្លើយតបនឹងគោលនយោបាយជាតិលើវិស័យទេសចរនៅកម្ពុជា និងជា​គោល​នយោបាយ បើកចំហរជើងមេឃរបស់រាជរដ្ឋាភិបាលកម្ពុជាផងដែរ។ ជាមួយនេះ ក្រសួងទេសចរណ៍​បាន​នឹងកំពុងពង្រឹងសហ ប្រតិបត្តិការ រវាងផ្នែកសាធារណៈនិងឯកជន ក្នុងការស្វែងរកដៃគូអភិវឌ្ឍន៍ដើម្បីអនុវត្ត​តាមផែន​ការយុទ្ធសាស្រ្ត អភិវឌ្ឍន៍​ទេសចរណ៍​កម្ពុជា​ឆ្នាំ២០១២-២០២០ ស្របនឹងផែនការយុទ្ធសាស្រ្ត​ទេសចរណ៍​អាស៊ានឆ្នាំ២០១១ ដល់ឆ្នាំ២០១៥ដែរ។

មានប្រសាសន៍លើកឡើងយ៉ាងដូច្នេះ ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ បានឲ្យដឹង ក្នុងពិធីបើក​សម្ពោធ​ជាផ្លូវការសេវាជួលរថយន្ត AVIS ប្រចាំកម្ពុជា កាលពីល្ងាចថ្ងៃទី៧ មីនា ឆ្នាំ២០១៤កន្លងទៅ នៅសណ្ឋាគារ អាំងទែរកុង​ទីណង់​តាល់។ ឯកឩត្តមបានបន្តថា ទីផ្សារកម្ពុជានាពេលបច្ចុប្បន្នកំពុងមានសន្ទុះកើន ឡើងជាលំដាប់នូវអត្រាកំណើនក្នុងវិស័យជា​ច្រើន ជាពិសេសវិស័យទេសចរណ៍ មានការកើនឡើងនូវចំនួនអ្នក ទេសចរណ៍ពីមួយឆ្នាំទៅមួយឆ្នាំ មកកាន់ប្រទេសកម្ពុជា ក្នុង​គោលបំណងដើម្បីធ្វើពាណិជ្ជកម្ម ដំណើរកម្សាន្ត និង បំពេញការងារផ្សេងៗជាដើម។ ឆ្លៀតក្នុងឱកាសនោះ ឯកឩត្តមរំពឹងថា សេវា​ជួលយានយន្តអន្តរជាតិ AVIS នៅ កម្ពុជានាពេលនេះ នឹងចូលរួមចំណែកច្រើនដល់ជោគជ័យរួមនៃឩស្សាហកម្ម​ដឹក​ជញ្ជូន និងជួលយានយន្ត ហើយ ក៏នឹងចូលរួមចំណែកដល់កំណើនសេដ្ឋកិច្ចកម្ពុជាប្រកបដោយនិរន្តរភាព។

នៅក្នុងពិធីសម្ពោធនាឱកាសនោះ លោក Joerg A. Kossich នាយកអាជ្ញាប័ណ្ណនៃក្រុមហ៊ុន AVIS ប្រចាំ តំបន់អាស៊ីបាន​ឲ្យ​​ដឹង​ថា AVIS បានត្រៀមខ្លួនរួចជាស្រេច ក្នុងការផ្តល់នូវជម្រើសនៃសេវាកម្មជួលរថយន្តជាច្រើន ប្រភេទ ដើម្បីឆ្លើយ​តបទៅនឹ​ង​កំនើន​នៃការវិនិយោគ និងទេសចរណ៍នៅកម្ពុជា ដូចជាសេវាជួលរថយន្តជាប្រចាំថ្ងៃ ប្រចាំខែ និងជាប្រចាំឆ្នាំ ដែលមាន​ជម្រើស​បើកបរដោយខ្លួនឯង និងមានអ្នកបើកបរដោយមានភាពបត់បែនទៅតាម វេលា និងតម្រូវការរបស់អតិថិជនគ្រប់រូប។
លោកបាន​​​​​​បញ្ជាក់ទៀតថា ការនាំយកសេវាកម្ម AVIS មកកម្ពុជានេះ គឺក្នុងគោលបំណងផ្តល់ជូនអតិថិជន​នូវសេវាជួល​រថយន្ត​​លំដាប់ថ្នាក់អន្តរជាតិ ដែលប្រកបដោយទំនុកចិត្ត និង ស្របតាមតម្រូវការអតិថិជន និងសេវាជួលអ្នកបើកបររថយន្តកំពុង​តែ​កើន​​ឡើងគួរឲ្យកត់សម្គាល់។ ដោយ៖ អភិរក្ស