ព្រះករុណាខ្ញុំ សូមថ្វាយព្រះបង្គំព្រះថេរានុថេរៈគ្រប់ព្រះអង្គជាទីសក្ការៈ សហជីវិន សហជីវិនី សមាជិក
សមាជិកាទាំងអស់ជាទីមេត្រី
ជាបឋម ខ្ញុំសូមថ្លែងអំណរគុណចំពោះ សហជីវិន សហជីវិនី និងសមាជិក សមាជិកា គ្រប់ជាន់ថ្នាក់ ដែល
បានស៊ូទ្រាំបម្រើការងារគណបក្សគ្រប់ពេលវេលាក្នុងគ្រាដ៏លំបាកកន្លងមករហូតដល់ពេលនេះ ។
ថ្ងៃនេះ ខ្ញុំពិតជាមានសេចក្តីរំភើប សប្បាយរីករាយក្រៃលែងដោយបានជួបសហជីវិន សហជីវិនី សមាជិក សមា
ជិកា ទាំងអស់សារជាថ្មី ដើម្បីដឹកនាំ និងបម្រើគណបក្សហ៊្វុនស៊ិនប៉ិច ដែលបានបង្កើតឡើងដោយ ព្រះករុណា
ព្រះបាទ សម្តេច នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ នៃយើងទាំងអស់គ្នា ។
ក្នុងឋានៈជាប្រធាន ជាកាតព្វកិច្ចដ៏ធ្ងន់ធ្ងរបំផុតក្នុងជីវិតខ្ញុំ ដែលត្រូវទទួលការខុសត្រូវលើវាសនា គណបក្សហ្វ៊ុន
ស៊ិនប៉ិច ក៏ដូចជាអនាគតប្រទេសជាតិយើងក្នុងកាលៈទេសៈដ៏លំបាកនេះ។ ទោះស្ថិតក្នុងស្ថានភាពបែបនេះក្តី
ខ្ញុំជាកូនដែលតែងតែដង្ហែរតាមព្រះរាជតម្រិះវររាជបិតា ខ្ញុំត្រូវបង្ខំចិត្តទទួលបំពេញបេសកកម្មដ៏លំបាកនេះ ក៏ប៉ុន្តែមានអត្ថន័យថ្លៃថ្លា ព្រោះបានផ្តល់ឳកាសឲ្យខ្ញុំបានមករួមរស់នៅជាមួយសហជីវិន សហជីវិនី ថ្នាក់ដឹកនាំ
សមាជិក សមាជិកាទាំងអស់ ជាអ្នករាជានិយម សីហនុនិយមដ៏ប្តូរផ្តាច់ ដើម្បីរួមគ្នាបន្តមាគ៌ានយោបាយ របស់
ព្រះអង្គ ជាកាតព្វកិច្ច និងកត្តញ្ញូតាធម៌ ចំពោះការបូជាជីវិតរបស់ព្រះអង្គ សម្រាប់ជាតិ ។
ក្នុងការតាមបម្រើព្រះអង្គតាំងពីវ័យកុមាររហូតដល់ចុងក្រោយនេះ ខ្ញុំចាំច្បាស់នូវព្រះរាជបំណងសំខាន់ៗរបស់
ព្រះអង្គដូចខាងក្រោម៖
បំណងទី១ គឺការស្វែងរកឯករាជ្យពេញលេញជូនមាតុភូមិ និងការពារបូរណភាពទឹកដីកម្ពុជាទោះបី ត្រូវប្តូរ
ជីវិតក៏ដោយ
បំណងទី២គឺការរក្សាសន្តិភាព ស្ថេរភាពជាតិ និងឯកភាពជាតិ ដោយធ្វើការបង្រួបបង្រួមជាតិ
បំណងទី៣គឺការលើកទឹកចិត្តប្រជានុរាស្រ្តរបស់ព្រះអង្គ ឲ្យរួមកម្លាំងគ្នា ដើម្បីអភិវឌ្ឍន៍ប្រទេសជាតិជាបន្ត
បន្ទាប់។
ជាមួយគ្នានេះ ព្រះអង្គតែងប្រកាន់យ៉ាងខ្ជាប់ខ្ជួននូវភាពយុត្តិធម៌ក្នុងសង្គម។ ចំពោះ ផ្នែកនយោបាយវិញព្រះ
អង្គតែងប្រកាន់យកមាគ៌ាអព្យាក្រឹត្យជានិច្ច ទាំងជាមួយគណបក្ស នានាក្នុងប្រទេស និងជាមួយប្រទេសជិត
ខាង រួមទាំងប្រទេសមហាអំណាចក្នុងលោកផង។ នេះជាមូលដ្ឋាននយោបាយសង្គមនិយមព្រះពុទ្ធសាសនា
ដែលព្រះអង្គប្រកាន់ខ្ជាប់ខ្ជួនផ្លូវកណ្ដាលជាត្រីវិស័យ ។
ខ្ញុំតែងតែចងចាំជានិច្ចនូវព្រះរាជបន្ទូលដ៏ឧត្តុង្គឧត្តមជារឿយៗរបស់ព្រះអង្គ “សាមគ្គីជាកម្លាំង” ។ នេះគឺជា
ភ័ព្វវាសនាដ៏ខ្ពង់ខ្ពស់បំផុតចំពោះរូបខ្ញុំ ដែលបានទទួលនូវព្រះរាជដំបូន្មាន ព្រះរាជមេត្តាធម៌ ប្រៀនប្រដៅដុស
ខាត់ ណែនាំផ្ទាល់លើជីវិតរបស់ខ្ញុំ ឲ្យយកចិត្តទុកដាក់លើផលប្រយោជន៍រាស្រ្តតូចតាច ក្រីក្រ និងផលប្រយោ
ជន៍ជាតិជាធំគឺ៖ “ កម្ពុជាសន្តិភាព រុងរឿង សម្រាប់ប្រជាពលរដ្ឋខ្មែរគ្រប់រូប” ។
សហជីវិន សហជីវិនី សមាជិក សមាជិកាទាំងអស់ជាទីមេត្រី
គណបក្សហ្វ៊ុនស៊ិនប៉ិចបានចាប់បដិសន្ធិ កាលពីឆ្នាំ ១៩៨១ ក្រោមស្នាព្រះហស្តជាប្រវត្តិសាស្រ្ត និងដ៏ថ្លៃថ្លានៃ
ព្រះករុណា ព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណ
ភាពទឹកដី និងឯកភាពជាតិខ្មែរ ជាទីសក្ការៈនិងជាទីគោរពស្រឡាញ់នៃយើងទាំងអស់គ្នា ក្នុងបុព្វហេតុ
នៃការតស៊ូរំដោះជាតិកម្ពុជា ដើម្បីនាំមកវិញនូវឯករាជ្យ បូរណភាពទឹកដី និងសន្តិភាពសម្រាប់មាតុភូមិយើង។
បន្ទាប់ពីកម្ពុជាយើង បានរំដោះផុតពីសង្គ្រាមរុំារៃអស់រយៈពេលជាងពីរទសវត្សរ៍កន្លងមក យើងទាំងអស់គ្នា
ក៏បានទទួលនូវសុខសន្តិភាព។ នេះជាលទ្ធផលជាក់ស្តែងទុកជា កេរ្តិ៍ដំណែលជូនកូនចៅជំនាន់ក្រោយ និង
ជាលទ្ធផលនៃការប្រឹងប្រែងព្យាយាមយ៉ាង អង់អាចម៉ឺងម៉ាត់ របស់អ្នកដឹកនាំកំពូលបំផុត ដែលជាព្រះបិតា
ស្ថាបនិកនៃរណសិរ្សរួបរួមជាតិ ដើម្បីកម្ពុជា ឯករាជ្យ អព្យាក្រឹត សន្តិ និងសហប្រតិបត្តិ គឺហ្វ៊ុនស៊ិនប៉ិចនេះ
ឯងដែលបានប្រមូលអ្នកដឹកនាំខ្មែរស្នេហាជាតិទាំងអស់ រួបរួមគ្នាដោះស្រាយវិបត្តិដ៏រុំារៃយូរអង្វែងនៅក្នុង
ប្រទេស។
បងប្អូនប្រាកដជានៅចាំច្បាស់ថា គណបក្សហ្វ៊ុនស៊ិនប៉ិចបាននាំយកមកវិញនូវ ឯករាជ្យជាតិជាលើកទី២
ជាមួយភ្លេងជាតិ ទង់ជាតិ និងជាពិសេសរបបរាជានិយមអាស្រ័យធម្មនុញ្ញ ប្រជាធិបតេយ្យ សេរីពហុបក្ស ដែលជាមូលដ្ឋានគ្រឹះនៃសុខសន្តិភាពបច្ចុប្បន្ន។
បន្ទាប់ពីការបោះឆ្នោតសាកលឆ្នាំ១៩៩៣ ក្រោមការរៀបចំរបស់អាជ្ញាធរ អន្តរកាល អង្គការសហប្រជាជាតិ
ប្រចាំកម្ពុជា ហៅកាត់ថា (UNTAC) គណបក្សហ្វ៊ុនស៊ិនប៉ិចបានដឹកនាំរាជរដ្ឋាភិបាលចំរុះមួយដែលមាន
គណបក្សប្រជាជន គណបក្សរណសិរ្សរំដោះជាតិខ្មែរ និងគណបក្សមូលីណាកា ហើយបានរួមស្តារអត្តពល
កម្មប្រទេសជាតិ (National Rehabilitation) និងរៀបចំផែនការគោលធំៗ ជាមូលដ្ឋាននៃការអភិវឌ្ឍប្រទេស
ជាតិក្នុងវិស័យហេដ្ឋារចនាសម័្ពន្ធ ស្ពាន ថ្នល់ សាលារៀន មន្ទីរពេទ្យ ជាដើម ផ្តួចផ្តើមបង្កើតក្រសួងថ្មីមាន
ក្រសួងបរិស្ថាន ក្រសួងកិច្ចការនារី ក្រសួងអភិវឌ្ឍន៍ជនបទ និងក្រុមប្រឹក្សាអភិវឌ្ឍកម្ពុជា (CDC)ដែលកំពុង
បន្តការងាររហូតដល់បច្ចុប្បន្ននេះ ។ បន្តបន្ទាប់មក ទោះបីជាគណបក្សហ៊្វុនស៊ិនប៉ិច ពុំបានបន្តការដឹកនាំ
ជាប្រមុខរាជរដ្ឋាភិបាលក្តី គណបក្សហ៊្វុនស៊ិនប៉ិច នៅតែធ្វើជាដៃគូក្នុងរាជរដ្ឋាភិបាលបន្តទៀតក្នុងស្មារតី
បង្រួបបង្រួមជាតិ ស្របតាមមាគ៌ារបស់សម្តេចឪ សម្តេចតា សម្តេចតាទួតនៃយើង។
សហជីវិន សហជីវិនី សមាជិក សមាជិកាទាំងអស់ជាទីមេត្រី
ខ្ញុំសូមបញ្ជាក់ជូនសហជីវិន សហជីវិនី សមាជិក សមាជិកាទាំងអស់មេត្តាជ្រាបថា គណបក្សហ្វ៊ុនស៊ិន
ប៉ិចជាគណបក្សឯករាជ្យ ជាចលនាអ្នកជាតិនិយម រាជានិយម សីហនុនិយម និងបង្រួបបង្រួម ផ្សះផ្សាជាតិ
ស្របតាមឧត្តមគតិនៃរណសិរ្ស រួបរួមជាតិ ដើម្បីកម្ពុជា ឯករាជ្យ អព្យាក្រឹត សន្តិ និង សហប្រតិបត្តិ ។ អ្វីដែល
ហ្វ៊ុនស៊ិនប៉ិចបានបំពេញតួនាទីជាដៃគូក្នុងរាជរដ្ឋាភិបាល បន្តបន្ទាប់មកទៀតនេះ មិនខុសពីគោលនយោ
បាយ ដែលគណបក្ស ហ្វ៊ុនស៊ិនប៉ិច បានចាប់ផ្តើមតាំងពីឆ្នាំ១៩៩៣ នៃរាជរដ្ឋាភិបាលកម្ពុជា។ ក្នុងស្មារតីនេះ
ហើយ គណបក្សហ្វ៊ុនស៊ិនប៉ិច សូមសន្យាជាមួយបងប្អូនជនរួមជាតិទាំងអស់ថាបើគណបក្សហ្វ៊ុនស៊ិនប៉ិច
ឈ្នះឆ្នោត នៅថ្ងៃទី ២៨ ខែកក្កដា ឆ្នាំ ២០១៣ ខាងមុខនេះ ហើយបានក្លាយជាអ្នកដឹកនាំរាជរដ្ឋាភិបាល
វិញនោះ គណបក្សហ្វ៊ុនស៊ិនប៉ិច នឹងអញ្ជើញសមាជិកគណបក្សទាំងអស់ ដែលមានអាសនៈនៅក្នុងរដ្ឋសភា ឲ្យចូលរួមជាសមាជិករដ្ឋាភិបាលចំរុះ តាមសមត្ថភាពរបស់សមាជិកនៃគណបក្សនីមួយៗ ។
សហជីវិន សហជីវិនី សមាជិក សមាជិកាទាំងអស់ជាទីមេត្រី
ក្នុងបេសកកម្មបង្រួបបង្រួមផ្សះផ្សាជាតិ សាមគ្គី និងឯកភាពជាតិ គណបក្ស ហ្វ៊ុនស៊ិនប៉ិច ប្រកាន់យក
ជំហរឧត្តមប្រយោជន៍ជាតិជាធំ ដោយគោរពស្មារតីភាតរភាព សមភាព និងយុត្តិធម៌ ជាមាគ៌ាជៀសវាងការ
ប្រើឥទ្ធិពលគណបក្សឈ្នះលើស្ថាប័ន និងគណបក្សភាគីទាំងឡាយ។ ពិតមែនតែយើងមានគណបក្សផ្សេង
គ្នា ប៉ុន្តែយើងរស់នៅក្នុងប្រទេសជាតិតែមួយ។ យើងជាគូប្រកួតប្រជែងដើម្បីកាន់អំណាចតែប៉ុណ្ណោះ យើង
មិនមែនជាសត្រូវរវាងគ្នានឹងគ្នាទេ គឺយើងជាពលរដ្ឋនៃប្រទេសតែមួយ យើងជាបងប្អូនបង្កើត។ ដូច្នេះយើង
ទាំងអស់គ្នា ជាពលរដ្ឋខ្មែរ ទោះបីជាយើងមាននិន្នាការនយោបាយផ្សេងគ្នា ប៉ុន្តែយើងអាចធ្វើការរួមគ្នាដើម្បី
ដោះស្រាយបញ្ហាជាតិជាធំ ដោយបណ្តុះការយោគយល់និងសេចក្តីស្រឡាញ់តាមមាគ៌ា ធម៌ មេត្តា ករុណា
អត់ឳន អនុគ្រោះគ្នាទៅវិញទៅមក។
ការផ្សះផ្សាបង្រួបបង្រួមជាតិនេះ យើងនឹងត្រូវអនុវត្តតាមគោលការណ៍នៃការយោគយល់តាមរយៈសេចក្តី
ស្រឡាញ់ សណ្តោស ចំពោះប្រជានុរាស្រ្តទូទៅ ដោយមិនប្រកាន់រើសអើង ទោះបីមានគោលនយោបាយ
ខុសគ្នាយ៉ាងណាក្តី។
ព្រះរាជបំណងរបស់សម្តេចឪ សម្តេចតា សម្តេចតាទួត គឺព្រះអង្គចង់ឲ្យកូនចៅរបស់ព្រះអង្គ ស្រឡាញ់រួបរួម
គ្នាកសាងជាតិ ព្រះអង្គទ្រង់បានដកស្រង់គាថាមួយវគ្គនៃគម្ពីអង្គុត្តរនិកាយថាៈ “យើងតែងហៅខ្លួនយើងថា
“ អ្នកចម្បាំង អ្នកចម្បាំង ”។ នោះគឺយើងត្រូវប្រយុទ្ធដើម្បីគុណធម៌ដ៏ខ្ពង់ខ្ពស់ តើជាការប្រឹងប្រែងធ្វើឲ្យ
ប្រសើរឬ ដើម្បីគតិបណ្ឌិតយ៉ាងសុខដុម ។ដូច្នេះហើយ ទើបយើងអាចហៅខ្លួនយើងជាអ្នកចម្បាំងបាន!”។
តាមអត្ថន័យនៃអ្នកចម្បាំងក្នុងគាថាខាងលើនេះ ព្រះអង្គទ្រង់ពន្យល់ថា “ជាការប្រយុទ្ធប្រឆាំងនឹងការខ្វះខាត
ភាពក្រីក្រ ប្រឆាំងនឹងភាពអយុត្តិធម៌នៃសង្គម (ជាសត្រូវរួម) ដើម្បីតម្កើងឋានៈជីវភាពប្រជារាស្រ្តរបស់យើង
ដើម្បីសុភមង្គលប្រជារាស្រ្ត និងដើម្បីរស់ដោយសេចក្តីរីករាយក្នុងភាតរភាព និងការរួបរួមគ្នា” ។
សហជីវិន សហជីវិនី សមាជិក សមាជិកាទាំងអស់ជាទីមេត្រីលោកគ្រូ អ្នកគ្រូ មន្រ្តីរាជការ កង
ប្រដាប់អាវុធ ពាណិជ្ជករ កសិករ កម្មករ កម្មការិនី និង យុវជន យុវនារី ជាទីស្រឡាញ់!
សូម បងប្អូនជនរួមជាតិទាំងអស់ មេត្តារួបរួមគ្នាជាមួយយើងខ្ញុំ ដើម្បីកម្ចាត់សត្រូវរួមរបស់យើងខាងលើ។
ខ្ញុំសង្ឃឹមថា បើគណបក្សហ្វ៊ុនស៊ិនប៉ិចបានឈ្នះឆ្នោតនៅខែកក្កដាខាងមុខនេះ នឹងបានដឹកនាំរាជរដ្ឋាភិបាល
យើងទាំងអស់គ្នានឹងមានឱកាសរៀបចំស្ថាប័នកំពូលទាំងបី គឺ ស្ថាប័ននីតិប្បញ្ញតិ ស្ថាប័ននីតិប្រតិបត្តិ និង
ស្ថាប័នតុលាការ ឲ្យមានតុល្យភាពរវាងគ្នានឹងគ្នា និងត្រូវបែងចែកឲ្យដាច់ពីគ្នា មិនអនុញ្ញាតឲ្យស្ថាប័នណា
មួយរំលោភលើស្ថាប័នមួយទៀតបានឡើយ ។ យើងទាំងអស់គ្នានឹងខិតខំឲ្យអស់ពីសមត្ថភាពដោះស្រាយ
ជីវភាពប្រជាពលរដ្ឋ ឲ្យបានប្រសើរឡើងជាងពេលបច្ចុប្បន្ន ផ្តល់ភាពយុត្តិធម៌សម្រាប់មនុស្សគ្រប់រូប បំបាត់
អំពើពុករលួយ បក្សពួកនិយម គ្រួសារនិយម ដោះស្រាយបញ្ហាអន្តោប្រវេសន៍ខុសច្បាប់ លុបបំបាត់ការជួញ
ដូរគ្រឿងញៀនគ្រប់ប្រភេទ ការជួញដូរមនុស្ស ល្បែងស៊ីសងគ្រប់ប្រភេទ និងការរំលោភសិទ្ធិសេរីភាពរបស់
ប្រជាពលរដ្ឋ ។ គណបក្សហ៊្វុនស៊ិនប៉ិចបានបង្កើតឡើងដោយស្នាព្រះហស្ត ព្រះករុណា ព្រះបាទសម្តេច
ព្រះនរោត្តម សីហនុ ព្រះមហាវីរក្សត្រ សម្តេចឪ សម្តេចតា សម្តេចតាទួត ទុកជាកេរ្តិ៍ដំណែល
ដល់យើងទាំងអស់គ្នា។
ដូច្នេះ សូមបងប្អូនទាំងអស់ ចាត់ទុកគណបក្សនេះថាជាគណបក្សរបស់បងប្អូនផ្ទាល់ ហើយអញ្ជើញមក
រួបរួមគ្នាក្នុងត្រកូលតែមួយឲ្យបានច្រើនកុះករ ដើម្បីប្រឆាំងនឹងសត្រូវរួមរបស់ប្រទេសយើង ជាតិយើង គឺភាព
ក្រីក្រ ភាពអវិជ្ជា ភាពអយុត្តិធម៌ អំពើពុករលួយ អំពើហឹង្សា អំពើទុច្ចរិត អំពើផ្ទុយនឹងច្បាប់ ដើម្បីកសាងនីតិរដ្ឋ
មួយ ប្រកបដោយភាពស្អាតស្អំ សុខសន្តិភាព សេរីភាព សេចក្តីស្រឡាញ់ សុភមង្គល សុខដុមរមនា សម្បូរុង
រឿង ជារៀងរហូតទៅ។
នៅពេលយើងរួបរួមគ្នាជាធ្លុងមួយហើយ យើងធ្វើអ្វីក៏កើតដែរ ព្រោះ “សាមគ្គីជាកម្លាំង” ។ នៅពេលនោះយើង
នឹងឃើញមាតុភូមិយើង ជា “នគររុងរឿង ជាតិខ្មែរថ្កុំថ្កើង ទឹកដីខ្មែរគង់វង្ស អារ្យធម៌ខ្ពង់ខ្ពស់ព្រះពុទ្ធសា
សនា វប្បធម៌ សិល្បៈ ចម្លាក់ តម្លៃសិក្សា តន្រ្តី និងទស្សនវិជ្ជា បានផ្សព្វផ្សាយគ្រប់ទីកន្លែងទូទាំង
សាកលលោក ។ សូមបងប្អូនខិតខំប្រឹងប្រែងឡើងវិញ លើកតម្កើងតម្លៃជាតិខ្មែរយើងឲ្យបានរុង
រឿងជាថ្មីតាមពង្សាវតារខ្មែរ” ។
នៅពេលនោះ នគរយើងនឹងរក្សាបាននូវសន្តិភាព ស្ថេរភាពនយោបាយ ឯកភាពជាតិ សុខក្សេមក្សាន្ត សម្បូរ
រុងរឿង ជារៀងដរាបតរៀងទៅ ។សូមបងប្អូន “អ្នកមាន ត្រូវតែនាំគ្នាថែរក្សាអ្នកក្រខ្សត់ ដូចសំពត់ព័ទ្ធពីក្រៅ
អ្នកប្រាជ្ញត្រូវតែនាំគ្នាថែរក្សាអ្នកខ្លៅ ដូចសំពៅនៅសំប៉ាន”មកដល់ត្រង់ចំណុចនេះធ្វើឲ្យខ្ញុំនឹកឃើញដល់ព្រះ
រាជឳង្ការរបស់ព្រះបាទជ័យវរ្ម័នទី៧ថា ៖ ទុក្ខវេទនារបស់ប្រជារាស្ត្រ គឺជាទុក្ខវេទនារបស់ព្រះអង្គ ព្រោះថាទុក្ខ
របស់រាស្ត្រ គឺជាទុក្ខរបស់អ្នកគ្រប់គ្រងទាំងឡាយ មិនមែនទុក្ខផ្ទាល់របស់ព្រះអង្គទេដែលនាំឲ្យព្រះអង្គព្រួយ។
នេះជាមូលដ្ឋានគ្រឺះ នៃលទ្ធិសង្គមនិយម ព្រះពុទ្ធសាសនារបស់សម្តេចឪ សម្តេចតា សម្តេចតាទួត ដែល
យើតទាំងអស់គ្នាត្រូវតែខិតខំ អនុវត្តបន្តឲ្យបានជោគជ័យជូនជាតិ ។
សហជីវិន សហជីវិនី សមាជិក សមាជិកាទាំងអស់ជាទីមេត្រី
ខ្ញុំសូមឆ្លៀតក្នុងឳកាសដ៏បវរនេះ សម្តែងជូននូវការដឹងគុណដោយកត្តញ្ញូតា ដល់សហជីវិន សហជីវិនី សមាជិក
សមាជិកាទាំងអស់ ព្រមទាំងបងប្អូនប្រជាពលរដ្ឋខ្មែរ ទូទាំង ព្រះរាជាណាចក្រកម្ពុជាដែលបានចូលរួមរំលែក
ទុក្ខ ក្នុងពេលដែលព្រះវររាជបីតារបស់យើងទាំងអស់គ្នា យាងសោយព្រះទីវង្គត កាលពីថ្ងៃទី១៥ខែតុលាឆ្នាំ
២០១២កន្លងទៅនេះ ។ នេះសបញ្ជាក់ថា យើងបានរួមសុខ រួមទុក្ខជាមួយគ្នាពិតប្រាកដមែន ។
ជាទីបញ្ចប់ ខ្ញុំសូមថ្វាយ ជូនពរដល់ សហជីវិន សហជីវិនី សមាជិក សមាជិកាទាំងអស់ សូមទទួលបាន
នូវពុទ្ធពរទាំង ៥ ប្រការគឺ អាយុ វណ្ណៈ សុខៈ និងពលៈ និងបដិភានៈកុំបីឃ្លៀងឃ្លាតឡើយ។សូមគណបក្សហ្វ៊ុនស៊ិនប៉ិចទទួលបាននូវជ័យជំនះក្នុងការបោះឆ្នោត នាពេលខាងមុខនេះ។
ជយោគណបក្សហ្វ៊ុនស៊ិនប៉ិច!
សូមអរព្រះគុណ និងអរគុណ!