ភ្នំពេញ ៖ តាមការសិក្សាស្រាវជ្រាវរបស់ស៊ីម៉ាក់បានបង្ហាញថានៅប្រទេសកម្ពុជា នាពេលបច្ចុប្បន្ននេះនៅសល់ផ្ទៃដីមានគ្រាប់មីន និងគ្រាប់មិនទាន់ផ្ទុះចំនួនជិត២ពាន់គីឡូម៉ែត្រក្រឡាទៀតដែល ផ្ទៃដីទាំងនេះកំពុងតែគំរាមកំហែងយ៉ាងខ្លាំងដល់ប្រជាកសិករយើង។ លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកស៊ីម៉ាក់បានមាន ប្រសាសន៍កាលពីថ្ងៃម្សិលមិញឲ្យដឹងថាយើងបានសិក្សាស្រាវជ្រាវ ហើយលទ្ធផលបានបង្ហាញថាមានផ្ទៃដីចំនួនជិត២ពាន់គីឡូម៉ែត្រក្រឡា ទៀតមានគ្រាប់មីន និងគ្រាប់មិនទាន់ផ្ទុះ។ នេះមិនមានន័យថាផ្ទៃដីកន្លែងផ្សេងទៀតមិនមានគ្រាប់មីន និងគ្រាប់មិនទាន់ផ្ទុះនោះទេព្រោះថាយើងនៅមិនទាន់បានស្រាវជ្រាវ បានផ្ទៃដីទាំងអស់នោះដែរ។ តាមអនុសញ្ញាអន្តរជាតិអូតាវ៉ាបានកំណត់ឲ្យប្រទេសកម្ពុជាដែលជារដ្ឋ ភាគីធ្វើយ៉ាងណាបោសសំអាតមីនប្រឆាំងនឹងមនុស្សឲ្យអស់នៅឆ្នាំ២០១៩ ខាងមុខនេះ។ ប៉ុន្តែដោយសារកម្ពុជាមិនមែនមានតែគ្រាប់មីនប្រឆាំងនឹងមនុស្សនោះទេ គឺមានបញ្ហាគ្រាប់មីនតោនគ្រាប់បែកចង្កោមគ្រាប់បែកទម្លាក់ពីយន្តហោះ និងគ្រាប់យុទ្ធភណ្ឌមិនទាន់ផ្ទុះដែលប្រើប្រាស់ក្នុងអំឡុងសង្គ្រាម ដែលមិនទាន់ផ្ទុះ។ អញ្ចឹងពេលវេលាឆ្នាំ២០១៩ប្រហែលជាមិនអាចអនុវត្តបានតាមអនុសញ្ញាខាងលើ បានទេ។
.jpg)
លោកហេងរតនាបានមានប្រសាសន៍ទៀតថា«យើង មិនអាចឆ្លើយតបបានតាមអនុសញ្ញាអូតាវ៉ាបានទេដោយសារកម្ពុជានៅមាន បញ្ហាប្រឈមជាច្រើនពាក់ព័ន្ធនឹងគ្រាប់មីន និងគ្រាប់មិនទាន់ផ្ទុះនេះដែលទាមទារពេលវេលាច្រើនថែមទៀត»។ សម្រាប់ឆ្នាំ២០១៤នេះ ស៊ីម៉ាក់ត្រៀមបោសសំអាតគ្រាប់មីន និងគ្រាប់មិនទាន់ផ្ទុះឲ្យបានជាង៨០គីឡូម៉ែត្រក្រឡា។ ប៉ុន្តែមានសំណើរបស់ប្រជាពលរដ្ឋស្នើសុំឲ្យយើងដោះមីនតាមរយៈ អាជ្ញាធរមូលដ្ឋានមានរហូតដល់១៤៣គីឡូម៉ែត្រក្រឡា។ លោកហេង រតនា បានឲ្យដឹងបន្ថែមទៀតថា បើយើងមានលទ្ធភាពពិសេសយើងមានថវិកាគ្រប់គ្រាន់យើងអាចធ្វើការ បោសសំអាតបានដល់១១២គីឡូម៉ែត្រក្រឡានៅក្នុងឆ្នាំ២០១៤នេះ តែធនធានដែលយើងរកបានអាចមានលទ្ធភាពធ្វើការបោសសំអាតផ្ទៃដីមាន គ្រាប់មីននិងគ្រាប់មិនទាន់ផ្ទុះតែប្រមាណ៨០គីឡូម៉ែត្រក្រឡាទេ ដោយមានទឹកប្រាក់ជាង១៣លានដុល្លាអាមេរិក។ លោកបានសម្ដែងនូវការព្រួយបារម្ភថានៅដើមឆ្នាំនេះអត្រា គ្រោះថ្នាក់ដោយគ្រាប់មីននិងគ្រាប់មិនទាន់ផ្ទុះមានការកើនឡើងទ្វេដង បើប្រៀបធៀបទៅនឹងរយៈពេលដូចគ្នាកាលពីឆ្នាំមុន។ លោកបានលើកឡើងយោងតាមរបាយការណ៍មកបញ្ជាក់ថា ជាក់ស្តែងនៅដើមឆ្នាំ២០១៤នេះមានករណីរងគ្រោះដោយសារគ្រាប់មីន និងគ្រាប់មិនទាន់ផ្ទុះមានចំនួនជាង៤០ករណីដែលចំនួននេះបើធ្វើការ ប្រៀបធៀបទៅនឹងរយៈពេលដូចគ្នាមានការកើនឡើងដែលនៅឆ្នាំមុនមានតែជាង២០ ករណីប៉ុណ្ណោះ៕
ដោយ៖ ភីនរ៉ា