ប្រធានសម្ព័ន្ធសហជីពជាតិកម្ពុជាNACC លោកសោម អូនបានមានប្រសាសន៍នៅព្រឹក​ថ្ងៃសៅរ៍មីនានេះថាតបតាមការអញ្ជើញរបស់សភាសម្ព័ន្ធសហជីពជាតិកម្ពុជាគណៈប្រតិភូ​សហព័ន្ធសហជីពឡាវLFTU បានមកបំពេញទស្សនកិច្ចជាផ្លូវការនៅប្រទេស​កម្ពុជារយៈ​ពេល៦ថ្ងៃដើម្បីរឹតចំណងមិត្តភាពនិងកិច្ចសហប្រតិបត្តិការរវាងសហជីពទាំងពីរឡើងវិញ​ជាលើកដំបូងបន្ទាប់ពីដាច់ទំនាក់ទំនងនឹងគ្នាជិត២០ឆ្នាំកន្លងមក។

ប្រធានសហជីពជាតិកម្ពុជាបានលើកឡើងនៅក្នុងជំនួបនោះថាប្រទេសឡាវគឺជាប្រទេស​មាន​ភូមិផងរបងជាប់ជាមួយកម្ពុជាមានវប្បធម៌ប្រពៃណីប្រហាក់ប្រហែលគ្នា​មានប្រវត្តិ​ទំនាក់ទំនងនិងតស៊ូរួមគ្នាតាំងពីយូរលុងមកហើយ។

លោកបញ្ជាក់ថា ចាប់តាំងពីអំឡុងឆ្នាំ១៩៩៣កម្ពុជាបានផ្លាស់ប្តូររបបនយោបាយបានធ្វើ​ឲ្យទំនាក់ទំនងសហជីពរវាងប្រទេសទាំងពីរដាច់ការទំនាក់ទំនងរហូតមក។ហើយថ្ងៃនេះជា​លើកទី​មួយដែលNACC បានអញ្ជើញLFTU មកបំពេញទស្សនកិច្ចជាផ្លូវការរយៈពេល៦ថ្ងៃនៅប្រទេសកម្ពុជាដើម្បីភ្ជាប់ទំនាក់ទំនងនិងកិច្ចសហប្រតិបត្តិការឡើងវិញ។

លោកប្រធានសម្ព័ន្ធសហជីពជាតិរូបនេះក៏បានជម្រាបជូនភ្ញៀវអំពីស្ថានភាពសហជីពនៅកម្ពុជាបច្ចុប្បន្នខុសពីស្ថានភាពសហជីពនៅក្នុងទសវត្សរ៍៨០និង៩០។បន្ទាប់ពីការបោះ​ឆ្នោតឆ្នាំ១៩៩៣កម្ពុជាបានប្រកាន់យករបបលទ្ធិប្រជាធិបតេយ្យសេរីពហុបក្សហើយចាប់ពី​ពេលនោះមកដល់បច្ចុប្បន្នកម្ពុជាមានចលនាសហជីពបីចរិកលក្ខណៈគឺសហជីពបែបគាំទ្ររាជរដ្ឋាភិបាលសហជីពបែបគាំទ្របក្សប្រឆាំងនិងសហជីពបែបឯករាជ្យ។

ក្នុងនោះមានក្រុមប្រឹក្សាសហជីពជាតិកម្ពុជា(CCNU) ចំនួន១, NACC ចំនួន១, សហភាពសហព័ន្ធសហជីពចំនួន៩, សហព័ន្ធសហជីពចំនួន៧៨និងសហជីពមូលដ្ឋានចំនួន១.១០០។NACC បានបង្កើតឡើងនៅឆ្នាំ២០០៧ពីដំបូងមានសហព័ន្ធចំនួន៥ជាសមាជិករហូតដល់បច្ចុប្បន្នមានសហព័ន្ធ២០ជាសមាជិក, មានសមាជិកជាង២១ម៉ឺននាក់។ដោយឡែកCCNU ត្រូវបានបង្កើតឡើងកាលពីថ្ងៃទី២៦ខែមេសា២០១២មានសហភាពចំនួន៦និងសហព័ន្ធ-សមាគមចំនួន៦៣ជាសមាជិកដែលមានរូបលោកជាប្រធាន។

លោកប្រធានសម្ព័ន្ធសហជីពជាតិបានបង្ហាញនូវយន្តការដោះស្រាយវិវាទលើវិស័យ​វាយនភណ្ឌ​កាត់ដេរនិងស្បែកជើងដំបូងត្រូវដោះស្រាយជាលក្ខណៈត្រីភាគីរួមមានសហជីពថៅកែរោងចក្រនិងក្រសួងការងារ។ចំពោះការដោះស្រាយនេះបើមិនត្រូវគ្នាត្រូវបញ្ជូនទៅក្រុមប្រឹក្សាអាជ្ញាកណ្តាលដែលបង្កើតឡើងដោយអង្គការILO ជាអ្នកដោះស្រាយ។ប៉ុន្តែបើ​ភាគី​ទាំងពីរមិនព្រមអនុវត្តតាមសេចក្តីសម្រេចរបស់អង្គភាពនេះទេភាគីនីមួយៗអាច​ប្តឹងទៅ​តុលាការឬក៏ធ្វើកូដកម្មតាមច្បាប់ការងារកំណត់ដើម្បីទាមទាររកដំណោះស្រាយសម​ស្របទៅតាមការទាមទារ ។

ជាមួយគ្នានោះ លោកខាំឡាឡូឡនស៊ីប្រធានគណៈប្រតិភូឡាវក៏បានបង្ហាញផងដែរអំពី​រឿង​LFTU ដាច់ទំនាក់ទំនងជាមួយសហជីពកម្ពុជាអស់រយៈពេល២០ឆ្នាំមកហើយគឺចាប់តាំង​ពីប្រទេសកម្ពុជាបានផ្លាស់ប្តូររបបនយោបាយ។លោកក៏បានថ្លែងអំណរគុណដល់លោក​ប្រធាន CCNUហើយបានអញ្ជើញលោកសោមអូននិងសហការីទៅបំពេញទស្សនកិច្ចជាផ្លូវការនៅប្រទេសឡាវតាមពេលវេលាសមស្របណាមួយ។

លោកប្រធាន LFTU បានរាយការណ៍អំពីយន្តការកន្លងមកគឺចាប់ពីឆ្នាំ២០០១រហូតដល់២០១២ប្រទេសឡាវមានកំណើនសេដ្ឋកិច្ចជាមធ្យម៨ភាគរយក្នុងមួយឆ្នាំហើយGDP ក្នុង​ប្រជាជនឡាវម្នាក់ស្មើ១.៣០០ដុល្លារក្នុងមួយឆ្នាំ។ប្រទេសឡាវបានប្តេជ្ញាលុបបំបាត់ភាព​ក្រីក្រ​ឲ្យអស់ចាប់ពីឆ្នាំ២០១៣ដល់២០២០។LFTU បានបង្កើតឡើងក្នុងឆ្នាំ១៩៥៦ហើយ​ទើប​នឹងប្រារព្ធខួបលើកទី៥៧ឆ្នាំនាពេលថ្មីៗនេះ។LFTU ស្ថិតនៅក្រោមការដឹកនាំ​របស់បក្សនិងរដ្ឋប្រទេសឡាវហើយបច្ចុប្បន្ននេះមានសមាជិកចំនួន១៧៨ពាន់នាក់សមាជិក​អចិន្ត្រៃយ៍​មានចំនួន៦៥៧នាក់, កម្មករកម្មការិនីចំនួន៣៤៦.៤៧៦នាក់ធ្វើការនៅក្នុង​រោងចក្រសហគ្រាសចំនួន១៨.៣០៧កន្លែង។

សូមបញ្ជាក់ថាគណៈប្រតិភូLFTU មកបំពេញទស្សនកិច្ចនៅកម្ពុជារយៈពេល៦ថ្ងៃចាប់ពីថ្ងៃទី១៥ដល់២០មីនា២០១៣។នឹងបានជួបសម្តែងការគួរសមជាមួយលោកវងសូតរដ្ឋមន្ត្រីក្រសួងការងារ, បន្តជួបជាមួយNACC ពេលល្ងាច ព្រមទាំងទៅទស្សនាព្រះបរមរាជវាំង, ព្រឹកថ្ងៃទី១៧ទស្សនាសារៈមន្ទីរទួលស្លែងពេលល្ងាចទស្សនាផ្សារទួលទំពូង, ព្រឹកថ្ងៃទី១៨ជួបសម្តែងការគួរសមជាមួយលោកអ៊ិតសំហេងរដ្ឋមន្ត្រីក្រសួងសង្គមកិច្ចបន្ទាប់មកជួបជាមួយថ្នាក់ដឹកនាំCCNU ពេលល្ងាចទស្សនាអង្គរវត្តខេត្តសៀមរាប, ព្រឹកថ្ងៃទី ១៩បន្តទស្សនកិច្ចនៅខេត្តសៀមរាបនិងធ្វើមាតុភូមិនិវត្តន៍វិញនៅព្រឹកថ្ងៃទី២០ មីនា ខាងមុខនេះ៕

ស.ស្អាត