ភ្នំពេញ៖  តាមការបង្ហាញរបស់សង្គមស៊ីវិល និង អង្គការផ្សេងៗដែលធ្វើការផ្ទាល់ទាក់ទិននឹងជីវិត​ពលក​​​​​រ​ទេសន្តរ​ប្រវេស​ ស្វែងរកការងារធ្វើ​នៅបរទេស ដែលមានភាពស្មុគ្រស្មាញ និង​មានបញ្ហារំលោភបំពាន​ផ្សេងៗ​​ពីសំណាក់​ថៅកែ ព្រមទាំងការមិនយកចិត្តទុកដាក់ពីសំណាក់​ភ្នាក់ងារជ្រើស​រើសពលករឯកជន​មួយចំនួន​ផងនោះរាជរដ្ឋាភិបា​ល​​​​​​ បានជម្រុញបន្ថែមនូវ​ការ​អនុវត្តន៍ឲ្យបាន​ហ្មឺង​ម៉ាត់នូវ​អនុក្រិត្តលេខ១៩០ និង​ប្រកាសមួយចំនួន​ដើម្បីគ្រប់គ្រង​ពលករ​​​​ខ្មែរទៅធ្វើការ​នៅ​បរទេស តាមរយៈទីភ្នាកងារជ្រើសរើសឯកជនឲ្យកាន់តែមានប្រសិទ្ធភាព។

ក្រោយពីរាជរដ្ឋាភិបាលកម្ពុជាបានដាក់ចេញអនុក្រិត្តលេខ១៩០កាលពីឆ្នាំ២០១១ ស្តីពីគ្រប់​គ្រងលើកកា​​​​រ​បញ្ជូន​ពលករខ្មែរទៅធ្វើការនៅបរទេស ក្រសួងការងារនិងបណ្តុះបណ្តាលវិជ្ជា​ជីវៈបានចេញនូវប្រកាសចំនួន៨ ដើម្បី​ណែនាំ​​​​​បន្ថែមលើខ្លឹមសារនៃអនុក្រិត្តឲ្យកាន់តែ​ច្បាស់​លាស់ថែមទៀត ព្រោះថាកន្លងមកមានទីភ្នាក់ងារ​ជ្រើសរើស​ពលករភាគច្រើនបានគោរព និងអនុវត្តបានត្រឹមត្រូវ ព្រមទាំងបានធ្វើការពង្រីកប្រសិទ្ធភាព​នៃការគ្រប់គ្រង​និង​ការ​ការពារ បានគួរឲ្យកត់សម្គាល់ ។ ប៉ុន្តែទន្ទឹមគ្នានោះក៏នៅមានទីភ្នាក់ងារឯកជនមួយចំនួននៅមិន​បានអនុវត្តន៍ និង​គោរ​ព​​តាម​បទបញ្ជា ក៏ដូចជាប្រកាសរបស់ក្រសួងនៅឡើយដែរ  ។

មានប្រសាសន៍នៅក្នុងសិក្ខាសាលាបណ្តុះបណ្តាលមួយ ស្តីពី ការអនុវត្តប្រកាស អនុក្រិត្តស្តីពី ការគ្រប់គ្រង​ការ​បញ្ជូន​​ពលករខ្មែរទៅធ្វើការនៅបរទេស កាលពីព្រឹកថ្ងៃទី២៥ មីនា ២០១៤ ម្សិលមិញនេះ លោក អ៊ិត សំហេង រដ្ឋមន្រ្តីក្រសួងការងារ និបណ្តុះបណ្តាលវិជ្ជាជីវៈ បានជម្រុញឲ្យទីភ្នាក់ងារជ្រើសរើស​ពលករទាំងអស់​ត្រូវយកចិត្ត​ទុកដាក់អនុវត្តឲ្យបានខ្ជាប់ខ្ជួន ដើម្បីនាធានិរន្តរភាព និងប្រសិទ្ធភាពការងាររបស់ពលករខ្មែរ នៅបរទេស ។ ព្រោះ​ថាទីផ្សារ​ការ​ងារនាពេលបច្ចុប្បន្នកំពុងតែប្រកួតប្រជែងគ្នា ដែលទាមទារឲ្យពង្រឹង និងពង្រីកសមត្ថភាព ពលករមុន​ពេល​បញ្ជូនទៅ ។

លោក រដ្ឋមន្រ្តី បញ្ជាក់ថា ដើម្បីសម្រេចបាននូវគោលដៅរបស់រាជរដ្ឋាភិបាល ក្រសួងបាន​ណែនាំដល់​ទីភ្នាក់ងារ​ជ្រើស​រើស​ទាំងអស់ រាល់ការផ្សព្វផ្សាយជាសាធារណៈអំពីការជ្រើស​រើស​ពលករ ទៅធ្វើការនៅបរទេស ត្រូវបញ្ជូន​លិខិត មកក្រសួងជាមុនសិន  ពិសេសសហការ​ជាមួយមន្ទីរ ជំនាញ តាមរាជធានី\ខេត្ត ដើម្បីធានាបាននូវាររក្សា​សណ្តាប់​​ធ្នាប់​ និងរួមគ្នា លុបបំបាត់ការឆបោកនានាដែលបានកើតមានកន្លងមក។

ជាមួយ​​គ្នា​​នោះ មុនពេលបញ្ជូនពលករទៅបរទេស ទីភា្នក់ងារជ្រើសរើសឯកជន ត្រូវធានាថា​ពលករ​ម្នាក់ៗ មានឯកសារគ្រប់គ្រាន់ ត្រឹមត្រូវតាមកំណត់ ។ ការបញ្ជូនពើករដោយប្រើទិដ្ឋ​ការ​ទេសចរណ៍ មិនមែន​ទិដ្ឋកា​រ​ការងារ​ត្រូវហាមឃាត់ ។ ត្រូវមានលិខិតបញ្ជាក់ដែលចេញ​ដោយអគ្គនាយកដ្ឋានការងារ ដើម្បីបង្ហាញចំពោះការ​ត្រួតពិនិត្យ​នានារបស់សមត្ថិច្ច​នៅតាម​ព្រំដែន ។

លោក ស្រី អ៊ឹង ស៊ាងរិទ្ធី ប្រធានសមាគមន៍ទីភ្នាក់ងារជ្រើសរើសពលករកម្ពុជា (ACRA) បានបង្ហាញ​ពីការយក​ចិត្ត​ទុកដាក់ អនិវត្តឲ្យបានល្អបំផុតនូវប្រកាស និងអនុក្រិត្តរបស់រាជ​រដ្ឋាភិបាល ព្រមទាំងគៀងគរ ក្រុមហ៊ុនជ្រើសរើស​ពលករដទៃទៀតឲ្យចូលជាសមាជិក ដើម្បី រួមគ្នាពង្រឹងសមត្ថភាពពលករកម្ពុជា ធានាក្នុងការប្រកួតប្រជែង​ទីផ្សារ​ការងារ ក៏ដូចជាធានា នូវការគ្រប់គ្រងពលករឲ្យមានសុវត្ថិភាព និងនិរន្តរភាពការងារ។

ចំណែកលោកស្រី Anna Olsan មន្រ្តីបច្ចេកទេស គម្រោងត្រីកោណ អង្គការពលកម្មអន្តរជាតិ (ILO) បានថ្លែងថា  កម្ពុជា​ពិតជាបានដើរមួយជំហានទៀត លើកការគ្របគ្រង និងការការពារ ពលករចំណាកស្រុករបស់​បានកាន់​តែ​ប្រសើរ ។ លោកស្រីចង់ឃើញទីភ្នាក់ងារជ្រើសរើស​ពលករ​ឯកជនទាំងអស់រួមគ្នាធ្វើកិច្ចការរួមគ្នា ដើម្បីប្រយោជន៍​ពលករកម្ពុជានៅបរទេស  ។ លោកស្រីគាំទ្រ​នូវការអនុវត្តការដោះស្រាយបណ្តឹងកន្លងមកទៅតាមនិតិវិធី។

សូមបញ្ជាក់ថា មកដល់ពេលនេះ កម្ពុជាមានប្រជាពលរដ្ឋប្រមាណ ១,៣លាននាក់ បានហក់​ចូល​ទៅក្នុងទីផ្សារ​ការងារ  និងមានពលករចំនួន១៧ម៉ឺននាក់កំពុងធ្វើការនៅក្រៅប្រទេស ដែលក្នុង១ឆ្នាំអាចស្រូប​យកថវិកា​ប្រមាណ​ជា៣៥០លានដុល្លារចូលមកក្នុងប្រទេស៕
ដោយ ៖ ស.ស្អាត