ភ្នំពេញ៖មន្ត្រីពន្ធដារកម្ពុជា រួមមាន ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានពន្ធដារ និង​មន្ត្រីនាយកដ្ឋានទាំង៧ នៅថ្នាក់កណ្តាល ថ្នាក់ដឹកនាំ និងមន្ត្រីនៅសាខាទាំង៧នៅរាជធានីភ្នំពេញ បានធ្វើការ​សិក្សា​ស្វែងយល់ស្តីអំពីកំណែទ​ម្រ​ង់រដ្ឋបាលសារពើពន្ធរបស់ ប្រទេសឥណ្ឌូនេស៊ី។

សិក្ខាសាលាស្តី អំពីកំណែទម្រង់រដ្ឋបាលសារពើពន្ធរបស់ប្រទេសឥណ្ឌូនេស៊ីនេះ ត្រូវបានធ្វើបទបង្ហាញ ដោយ​លោក​ Wahyu Karya និង បណ្ឌិត Nufransa Wira Sakti ប្រធាននាយកដ្ឋាន និងធ្លាប់បាន​ដឹកនាំកំណែ​ទម្រង់រដ្ឋបាល​សារពើពន្ធនៅប្រទេសឥណ្ឌូនេស៊ីតាំងពីឆ្នាំ២០០២មក រហូតដល់បច្ចុប្បន្ន។

ប្រធានបទធំៗចំនួន៤ ត្រូវបានលើកឡើង ដូចជា ការផ្លាស់ប្តូរការគ្រប់គ្រង ការកែលម្អដំណើរការ​ក្នុងអង្គភាពពន្ធ​ដារ ផ្នែកស្នូលនៃការកែលម្អប្រព័ន្ធពន្ធដារ ដោយផ្តោតលើ ការណែនាំទូទៅ បទពិសោធន៍ ជាពិសេស ការចូលរួម​របស់មន្ត្រីចំពោះបញ្ហាប្រឈម និងការប្តេជ្ញាចិត្ត និងការប្រើប្រាស់ប្រព័ន្ធព័ត៌មានវិទ្យា។

សិក្ខាសាលានេះ មានគោលបំណង ឱ្យមន្ត្រីពន្ធដាររបស់អគ្គនាយកដ្ឋានពន្ធដារ បានយ​ល់ពីបទពិសោធន៍ និង​ស្ថាន​ភាពបច្ចុប្បន្នរបស់រដ្ឋបាលសារពើពន្ធរបស់ប្រទេសឥ​ណ្ឌូ​នេស៊ី ដើម្បីជម្រុញកិច្ច​ការងារដំណើរឆ្ពោះ​ទៅរកការ​អនុវត្តន៍​និងវឌ្ឍភាពសម្រាប់អគ្គនា​យកដ្ឋានពន្ធដារទាំងមូល។

ក្នុងកិច្ចសហប្រតិការរវាងអគ្គនាយកដ្ឋានពន្ធដារជាមួយ JICA គម្រោងអភិវឌ្ឍន៍សមត្ថភាព អគ្គនាយកដ្ឋានពន្ធដារ ត្រូវបានចុះហត្ថលេខា កាលពីថ្ងៃទី២៣ខែមិថុនា ឆ្នាំ២០​១​១ រវាង ឯកឧត្តម គង់ វិបុល ប្រតិភូរាជ​រដ្ឋាភិបាល​ទទួល​បន្ទុក​ជាអគ្គនាយកនៃអគ្គនាយ​កដ្ឋានពន្ធដារ ជាមួយប្រធានតំណាងទីភ្នាក់ងារ​សហប្រតិបត្តិការ​អន្តរជាតិជប៉ុន​ប្រចាំកម្ពុជា ដើម្បីបន្តជួយឧបត្ថម្ភអគ្គនាយកដ្ឋានពន្ធដារ ក្នុងការចូលរួមកំណែទម្រង់សារពើពន្ធ ស្របតាមកម្មវិធី​កំណែទម្រង់ការគ្រប់គ្រងហិរញ្ញវត្ថុសាធារណៈ ជាពិសេស ដើម្បីបង្កើនចំណូលពន្ធ តាមរយៈការបង្កើន​សមត្ថភាព​ជំនាញ​ដល់មន្ត្រីពន្ធដារ ខាងផ្នែកសវ​នកម្ម និងសេវាកម្មអ្នកជាប់ពន្ធ និងផ្នែកផ្សេងៗទៀត។

មានប្រសាសន៍ក្នុងសិក្ខាសាលានោះ លោក គង់​ វិបុល ប្រតិភូរាជរដ្ឋាភិបាលទទួល​បន្ទុកជាអគ្គនាយក​នៃអគ្គនា​យក​ដ្ឋាន​ពន្ធដារ  បានជម្រុញឱ្យសិក្ខាកាមទាំងអស់ ត្រូវយកចិត្តទុកដាក់ និងប្រឹងប្រែងស្តាប់គ្រូឧទ្ទេសនាម ឱ្យបានស៊ីជំរៅ ដើម្បីស្វែងយល់ យកមកអនុវត្តការងារអោយមានប្រសិទ្ធិភាពខ្ពស់៕ ដោយ ៖ រតនា