ភ្នំពេញៈ យោងតាម សេចក្តីប្រកាសព័ត៌មាន របស់អង្គជំនុំជម្រះ វិសាមញ្ញ ក្នុងតុលាការ កម្ពុជា ដែលហៅកាត់ថា អវតក ឬសាលាក្តីខ្មែរក្រហម កាលពីថ្ងៃទី១៩ ខែមីនា បានបង្ហាញថា ថវិកាសរុបសម្រាប់ឆ្នាំ២០១៤ មានចំនួន ៣១,៦ លានដុល្លារអាមេរិក និងសម្រាប់ឆ្នាំ២០១៥ ចំនួន ២៨,៩ លានដុល្លារអាមេរិក ។ សេចក្តីប្រកាស ដដែល បានបន្តថា គម្រោងថវិកាសរុប ៦០,៥ លានដុល្លារអាមេរិក សម្រាប់ សាលាក្តីខ្មែរក្រហម នៅឆ្នាំ២០១៤ និងឆ្នាំ២០១៥ ត្រូវបានបែងចែក នៅឆ្នាំ២០១៤ គឺភាគីជាតិ ចំនួន ៦,៤ លានដុល្លារអាមេរិក និងភាគីអន្តរជាតិ ចំនួន ២៥,២ លានដុល្លារអាមេរិក។ ដោយឡែក នៅឆ្នាំ២០១៥ ភាគីជាតិចំនួន ៦ លានដុល្លារអាមេរិក និងភាគីអន្តរជាតិ ចំនួន ២២,៩ លានដុល្លារអាមេរិក។
.jpg)
សូមបញ្ជាក់ថា ចាប់តាំងពីបង្កើត សាលាក្តីខ្មែរក្រមហ កាលពីឆ្នាំ២០០៦ រហូតដល់ឆ្នាំ២០១៣ ត្រូវបានសាលាក្តីខ្មែរក្រហម ប្រកាសថា ខ្លួនបានចំណាយថវិការ សរុបចំនួន ២០៨,៧ លានដុល្លារអាមេរិក។ ក្នុងនោះ ភាគីជាតិ ចំណាយ ៥១,៥ លានដុល្លារ និងភាគីអន្តរជាតិ ចំនួន ១៥៧,២ លានដុល្លារអាមេរិក។ សូមបញ្ជាក់បន្ថែមទៀតថា ជប៉ុន ជាប្រទេសម្ចាស់ជំនួយធំរបស់សាលាក្តី ដែលបានចំណាយរហូតដល់ជាង ៧៨ លានដុល្លារ៕
ដោយ៖ ភីនរ៉ា