ភ្នំពេញ៖ រដ្ឋមន្ត្រីក្រសួងព័ត៌មាន ខៀវ ការញារិទ្ធិ បានចាត់ទុកប្រព័ន្ធផ្សព្វផ្សាយ ជាពិសេសពិធីករ ពិធីការនី គឺមានសារៈសំខាន់ក្នុងការបញ្ជៀបនូវវិធានការហានិភ័យដែលកើតចេញពីការសេពគ្រឿងញៀន ។
ថ្លែងក្នុងសិក្ខាសាលាស្តីពី«ការបញ្ជៀបវិធានការហានិភ័យក្នុងការសេពគ្រឿងញៀន»នាព្រឹកថ្ងៃទី១៨ខែ មិនាឆ្នាំ ២០១៤ នៅទីស្តីការក្រសួងព័ត៌មាន លោក ខៀវ ការញារិទ្ធិរដ្ឋមន្ត្រីក្រសួងព័ត៌ មានបានមានប្រសាសន៍ថា ពិធីករពិធីការនី ជាអ្នកធ្វើការដោយផ្ទាស់នៅតាមប្រព័ន្ធផ្សព្វផ្សាយរួមមានវិទ្យុ ទូរទស្សន៍ ដូច្នេះ ពួកគាត់មានឱកាសច្រើនក្នុងការជួយផ្សព្វផ្សាយការបញ្ជៀបនូវវិធានការហានិភ័យក្នុងការសេពគ្រឿងញៀនដល់ប្រជាពលរដ្ឋនៅទូទាំងប្រទេស។ «មានឥទ្ធិពលច្រើនណាស់ព្រោះមានអ្នកស្តាប់ អ្នកមើលគាត់ច្រើនបើទោះបីជាគាត់មានចំនួនតិចតែ គាត់គឺដែកឆក់ ហើយដែលអាចនិយាយបានច្រើនពីគ្រឿងញៀនទៅកាន់ប្រជាពលរដ្ឋ»។
លោករដ្ឋមន្ត្រីក្រសួងព័ត៌មានបញ្ជាក់ថា ដើម្បីទប់ស្កាត់ និងកាត់បន្ថយ នៃការប្រើប្រាស់គ្រឿងញៀន អាជ្ញាធរជាតិប្រយុទ្ធប្រឆាំងគ្រឿងញៀន សហការជាមួយក្រួសួងព័ត៌មានបានបានអញ្ជើញ ពិធីករ ពិធីការិនី វិទ្យុ ទូរ ទស្ស ន៍ និងអ្នកសារព័ត៌មានទូទាំងប្រទេសប្រមាណ១០០នាក់ឱ្យចូលរួមវគ្គ បណ្តុះបណ្តាលស្តីពីការបញ្ជៀបនូវវិធានការហានិភ័យក្នុងការសេពគ្រឿងញៀន។ គោលបំណង ផ្តល់ចំណេះដឹងបន្ថែមដល់ពិធីករ ពិធីការិនីទូរទស្សន៍ទាំងអស់នៅក្នុងប្រទេសកម្ពុជា ដើម្បីធ្វើជាទុនបញ្ជ្រាបនូវចំនេះដឹងនានាជុំវិញវិធានការ និងហានិភ័យដែលកើតចេញពីការប្រើប្រាស់គ្រឿងញៀនទៅកាន់ប្រជាពលរដ្ឋនៅទូទាំងប្រទេស។
លោក មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានប្រសាសន៍ថា គ្រឿងញៀនមានប្រភពពីរប្រភេទ គឺគ្រឿងញៀនធម្មជាតិ និងគ្រឿងញៀនសំយោគ។ គ្រឿងញៀនរទាំងពីរប្រភេទនេះ មួយណាក៏ប៉ះពាល់ដល់ប្រព័ន្ធសរសៃប្រាសាទ និងសុខភាពនៃអ្នកប្រើប្រាស់ដែរ។ដោយហេតុផលនេះ បានជាអាជ្ញាធរជាតិប្រយុទ្ធប្រឆាំងគ្រឿងញៀនបានធ្វើការច្រើន ជុំវិញការផ្សព្វផ្សព្វផ្សាយពីផលប៉ះពាល់ នៃការសេពគ្រឿងញៀន។
លោករំពឹងថា ពិធីករពិធីការនី និងអ្នកសារព័ត៌មាននយកចំនេះដឹង នឹងសាមួយចំនួនដែលគិតថា អាចជួយទប់ស្កាត់ នៃការប្រើប្រាស់គ្រឿញៀនទៅកាន់ប្រជាពលរដ្ឋទៅតាមពេលវេលា និងទេពកោសល្យរៀងៗខ្លួន។
បើយោងតាមរបាយការណ៍អាជ្ញាធរជាតិប្រយុទ្ធប្រឆាំងគ្រឿងញៀន បានបញ្ជាក់ថា កម្ពុជាមានអ្នកប្រើប្រាស់គ្រឿញៀន ប្រមាណជាង១ម៉ឺននាក់ គឺភាគច្រើនពួកគេ មានអាយុចន្លោះពី១៨ឆ្នាំ ដល់២៥ឆ្នាំ ស្ថិតនៅលំដាប់អ្នកប្រើប្រាស់ទី១៕
ដោយ៖ ភីនរ៉ា