ភ្នំពេញ៖ វិទ្យាស្ថាន បច្ចេកវិទ្យាកម្ពុជា មជ្ឈមណ្ឌលជាតិ ផ្ដល់ឈាម និងក្រុមហ៊ុនទឹកបរិសុទ្ធ វីតាល់ បានសហការ រៀបចំពិធីផ្សព្វផ្សាយ លើកកម្ពស់ ការបរិច្ចាគ ឈាម ដល់និស្សិត ប្រមាណជាង៣០០ នាក់ នៅសាលាតិចណូ កាលពីថ្ងៃទី២១ ខែវិច្ឆិកា ឆ្នាំ២០១៣នេះ ។ប្រធានមជ្ឈមណ្ឌលជាតិផ្ដល់ឈាម នៃក្រសួងសុខាភិបាល លោក ហុក គឹមចេង បានឱ្យដឹងថា កម្មវិធីផ្សព្វផ្សាយ លើកកម្ពស់ការបរិច្ចាគឈាមនេះ មានគោលបំណង ផ្សព្វផ្សាយ និងបញ្ជ្រាបចំណេះដឹង អំពីសារៈប្រយោជន៍ នៃការបរិច្ចាគឈាម ដល់សិស្ស និស្សិត និងស្រទាយុវជនកម្ពុជាទូទាំងប្រទេស។
លោកបន្ថែមថា ការផ្សព្វផ្សាយ និងលើកកម្ពស់ ការបរិច្ចាគឈាម បានចាប់ផ្តើមជាលើដំបូងនាថ្ងៃនេះនៅវិទ្យាស្ថានបច្ចេកវិទ្យាកម្ពុជា ហើយពិធីផ្សព្វផ្សាយការលើកកម្ពស់ ការបរិច្ចាគឈាម ដោយស្ម័គ្រចិត្ត និងមិនគិតថ្លៃ នឹងធ្វើជាបន្តបន្ទាប់នៅសាកលវិទ្យាល័យចំនួន៧ នៅក្នុងខែវិច្ឆិកា និងខែធ្នូ២០១៣នេះ។គម្រោងផ្សព្វផ្សាយនេះ មានការសហការពីទឹកបរិសុទ្ធវីតាល់ អង្គការសុខភាពពិភពលោក សាកលវិទ្យាល័យជប៉ុនណាហ្គាសាគី និងដៃគូមកពីវិស័យឯកជន មួយចំនួនទៀតនៅរាជធានីភ្នំពេញ ។
លោក ហុក គឹមចេងបានសម្តែងនូវទុទិថិនិយមថា តាមរយៈការចូលរួមរបស់និស្សិត យុវជនប្រជាជនទូទៅ នឹងធ្វើឱ្យអត្រាអំណោយឈាមកើនឡើង ពីបួនភាគពាន់មកមួយភាគរយនិងធ្វើឱ្យ អត្រានៃការបរិច្ចាគឈាម ដោយស្ម័គ្រចិត្តកើនឡើងពី៣០ភាគរយទៅ៥០ភាគរយ នៅក្នុងឆ្នាំ២០១៣ ព្រមទាំងឆ្ពោះទៅរកការធ្វើអំណោយឈាម ដោយស្ម័គ្រចិត្តនិងឥតគិតថ្លៃ ១០០ភាគរយ ។លោកប្រធានមជ្ឈមណ្ឌលជាតិផ្តល់ឈាមបញ្ជាក់ថា អំណោយឈាមមានសារៈសំខាន់ណាស់ ដើម្បីជួយសង្គ្រោះប្រជាពលរដ្ឋ ដែលជាជនរងគ្រោះនិងអ្នកជំងឺ។ ការបរិច្ចាគឈាមដោយស្ម័គ្រចិត្ត គឺជាគន្លឹះ យ៉ាងសំខាន់ ក្នុងការងារសុវត្ថិភាព សម្រាប់យើងទាំងអស់គ្នា។ ហើយកម្ពុជាកំពុងយកគំរូតាមប្រទេសជប៉ុនជាមិត្តដែលគេមានបទពិសោធន៍លើកបញ្ហានេះក្នុងរយៈពេល១០ឆ្នាំគឺ(១៩៦៤-១៩៧៣) បានធ្វើឱ្យអំណោយឈាម ដើម្បីកម្រៃបានថយចុះមកសូន្យ និង ធ្វើឱ្យអំណោយឈាមស្ម័គ្រចិត្ត មិនគិតកម្រៃ ឈានដល់១០០%នៅឆ្នាំ១៩៧៤។ សម្រាប់កម្ពុជាការចូលរួមសហការរបស់វិស័យសាធារណៈ និងឯកជនពិតជាអាចជំរុញ និងលើកកម្ពស់ ការបរិច្ចាគឈាមដោយស្ម័គ្រចិត្ត ។
លោកស្រី ជឹង សុគន្ធាវី នាយិកាប្រតិបត្តិក្រុមហ៊ុនអិនវីស៊ី ខបភើរេសិន (វីតាល់) តំណាងលោកស្រីហ៊ុន ម៉ាណាប្រធានក្រុមប្រឹក្សាភិបាលនិងអគ្គនាយិកាវីតាល់ បានមានប្រសាសន៍ថា ក្រោមការខិតខំប្រឹង ប្រែងរបស់មជ្ឈមណ្ឌលជាតិផ្ដល់ឈាម និងតាមរយៈមូលនិធិ២៥រៀលរបស់ទឹកបរិសុទ្ធវីតាល់ ដែលជា មូលនិធិពិសេស សម្រាប់ការប្រើប្រាស់លើការឧបត្ថម្ភគាំទ្រ ដល់សកម្មភាពសង្គម និងមនុស្សធម៌ នានានោះ បានរៀបចំកម្មវិធីបរិច្ចាគឈាម ស្ម័គ្រចិត្ត ចំនួនជាង៥០លើក រួចមកហើយ នៅក្នុងរយៈ ពេលជាង២ឆ្នាំកន្លងមកនេះ នៅតាមស្ថាប័នរដ្ឋឯកជន ទាំងនៅរាជធានី និងនៅបណ្តាខេត្តទូទាំង ប្រទេស។ ក្នុងនោះចាប់តាំងពីឆ្នាំ២០១១ក្រុមហ៊ុនវីតាល់បានសហការជាមួយមជ្ឈមណ្ឌលជាតិផ្ដល់ឈាម និងបានធ្វើឱ្យអំណោយឈាមស្ម័គ្រចិត្តកើនឡើង ជាបន្តបន្ទាប់ រហូតដល់៣៥% ក្នុងឆ្នាំ២០១៣។
លោកស្រីនាយិកាប្រតិបត្តិបញ្ជាក់ថា យើងទាំងអស់គ្នាត្រូវតែខិតខំប្រឹងប្រែងបន្តទៀត ដើម្បីជំរុញនិងបំផុសស្មារតីសាធារណជនចូលរួមស្ម័គ្រ ចិត្តផ្តល់ ឈាមឱ្យបានគ្រប់ៗគ្នា និងឱ្យបានជាប្រចាំសំដៅបង្កើត វប្បធម៌ចែករំលែកថ្មី តាមរយៈការបរិច្ចាគ ឈាមប្រកប ដោយចិត្តសប្បុរស និងប្រកបដោយការយល់ដឹងខ្ពស់ ។ជាមួយគ្នានេះ លោក នុត សុថន សាកលវិទ្យាធិការរង នៃវិទ្យាស្ថានបច្ចេកវិទ្យាកម្ពុជា បានឲ្យដឹងថា កម្មវិធីផ្សព្វផ្សាយការលើកកម្ពស់ ការបរិច្ចាគឈាមនេះ មានសារៈសំខាន់ អាចឱ្យនិស្សិតយល់ដឹងថា អ្វីជាការបរិច្ចាគឈាម និងហេតុអ្វីចាំបាច់បរិច្ចាគឈាម។ លោកក៏បានអំពាវនាវដល់និស្សិត យុវជន ចូលរួមបរិច្ចាគឈាមឱ្យបានច្រើនព្រោះតម្រូវការឈាមកើនឡើង ដើម្បីជួយជនរងគ្រោះដោយសារ គ្រោះថ្នាក់ចរាចរណ៍ និងអ្នក ជំងឺត្រូវការឈាមចាំចាច់សម្រាប់សង្រ្គោះជីវិត។លោក នុត សុថន សង្ឃឹមថា ចលនាបរិច្ចាគឈាមដោយស្ម័គ្រចិត្ដ នឹងធ្វើឱ្យមានការចូលរួមកាន់ តែច្រើន ហើយពិធីនឹងក្លាយទៅជាវប្បធម៌នៃការចែករំលែក ការជួយសង្គ្រោះជីវិតជនរងគ្រោះរបស់យើងនៅទូទាំងប្រទេស ដោយមិនប្រកាន់ពណ៌សម្បុរ មានក្រ ឬ ជាតិសាសន៍នោះឡើយ។សូមបញ្ជាក់ថា ពិធីផ្សព្វផ្សាយនិងលើកកម្ពស់ ការបរិច្ចាកឈាម លើកដំបូងក្នុងឆ្នាំនេះ មានការចូលរួមពី ថ្នាក់ដឹកនាំ នៃវិទ្យាស្ថានបច្ចេកវិទ្យាកម្ពុជា មជ្ឈមណ្ឌលជាតិផ្ដល់ឈាម ក្រុមហ៊ុន អិនវីស៊ី ខបភើរេសិន (ទឹកបរិសុទ្ធវីតាល់) ព្រមទាំងនិស្សិតនិងក្រុមការងារឡូយ៩ ជាច្រើនរូប ៕
ដោយ៖ ស.ស្អាត