ភ្នំពេញ៖ រាជរដ្ឋាភិបាលជប៉ុនបានសម្រេចផ្តល់ជំនួយឥតសំណងដល់ប្រទេសកម្ពុជានូវទឹកប្រាក់ចំនួនប្រាំបីរយកៅសិបប្រាំបី លានយ៉េន(៨៩៨,000,000)ប្រហែលស្មើនឹងប្រាំបួនលានដុល្លារសហរដ្ឋអារិក ដើម្បីជួយដល់សកម្មភាពបោសសំអាតមីន របស់ស៊ីម៉ាក់ និងអភិវឌ្ឍន៍ជនបទនៅខេត្តបាត់ដំបង។
.JPG)
ការផ្តល់ជំនួយលើគម្រោងបោសសំអាតមីនរយៈពេលបីឆ្នាំនេះត្រូវបានចុះហត្ថលេខាដោយ ហោ ណាំហុង ឧបនាយករដ្ឋមន្ត្រី និងជារដ្ឋមន្ត្រីក្រសួងការបរទេស និងលោក គូម៉ាម៉ារ៉ូ យូជិ ឯកអគ្គរាជទូតជប៉ុនប្រចាំកម្ពុជា នាព្រឹកថ្ងៃទី៣០ខែតុលា ឆ្នាំ២០១៣នៅទីស្តីការក្រសួងការបទេស។លោក កុយ គួង អនុដ្ឋលេខាធិការនិងជាអ្នកនាំពាក្យក្រសួងការបរទេសបានប្រាប់ក្រុមអ្នកសារព័ត៌មានថា លោកឧបនាយករដ្ឋមន្ត្រី ហោ ណាំហុង បានកត់សំគាល់ថាប្រទេសជប៉ុនបានរួមចំណែកសំខាន់ណាស់ក្នុងវិស័យដោះមីននេះ ដើម្បីជួយកាត់បន្ថយគ្រោះថ្នាក់ដោយគ្រាប់មីនអោយកាន់តែតិចទៅៗ។
.JPG)
ជាមួយគ្នានេះ លោកបញ្ជាក់ថា តាមរយៈជំនួយឥតសំណងនេះប្រទេសនានាជាមិត្តនៅតែគាំទ្រកម្ពុជាពោលគឺខុសស្រឡះពីការអំពាវរបស់គណបក្សប្រឆាំង។«ជំនួយឥតសំណងថ្ងៃនេះគឺបញ្ជាក់អំពីថា ប្រទេសនានាជាមិត្តនៅកម្ពុជានៅតែបន្តធ្វើកិច្ចប្រតិបត្តិការយ៉ាងជិតស្និទ្ធិជាមួយរាជរដ្ឋាភិបាលថ្មីរបស់ព្រះរាជាណាចក្រកម្ពុជាអាណត្តិទី៥នេះជាធម្មតា ហើយអត់មានអ្វីប្រែប្រួលទេ»។
លោក គូម៉ាម៉ារ៉ូ យូជិ បានមានប្រសាសន៍ថា តាមការរំពឹងទុកផ្ទៃដីដែលមានកប់ទៅដោយគ្រាប់មីន និងយុទ្ធភ័ណ្ឌមិនទាន់ផ្ទុះប្រមាណ៤,៦៨០ហិកតា នឹងត្រូវបានបោសសំអាត ហើយនឹងត្រូវបានប្រើប្រាស់សំរាប់ការអភិវឌ្ឍន៍វិស័យកសិកម្ម។ប្រជាជនមូលដ្ឋានប្រមាណ៣០០០នាក់ ដែលរស់នៅក្នុងតំបន់ដែលបានបោសសំអាតមីនរួច នឹងសប្បាយរីករាយជាមួយនឹងបរិស្ថាននៃការរស់នៅប្រកបដោយសុវត្ថិភាព ជាងនេះទៅទៀតនោះជីវភាពរស់នៅរបស់ពួកគេនឹងប្រសើរឡើងតាមរយៈការសាងសង់ផ្លូវថ្នល់ជនបទ ប្រឡាយបង្ហូរទឹក ក៏ដូចជាការបណ្តុះបណ្តាលអំពីផលិតកម្មកសិកម្មផងដែរគួរបញ្ជាក់ថា ចាប់ពីឆ្នាំ១៩៩៨ដល់២០១៣នេះប្រទេសជប៉ុនបានផ្តល់ជំនួយដល់កម្ពុជាចំនួន៨៩លានដុល្លារសហរដ្ឋអាមេរិក សម្រាប់បោសសំអាតគ្រាប់មីន និងយុទ្ធភ័ណ្ឌមិនទាន់ផ្ទុះ៕ ដោយ៖ រតនា