ភ្នំពេញ៖ មន្រ្តីក្រសួងសុខាភិបាល និងមន្រ្តីក្រសួងផែនការ រួមជាមួយអង្គការដៃគូរពាក់ព័ន្ធមួយចំនួនមាន អង្គការ ICF Micro ដែលទទួលការគាំទ្រគម្រោងពីអង្គការ USAID បានជួបគ្នា នៅព្រឹកថ្ងៃទី១៤ មីនានេះ នៅសណ្ឋាគារសាសាន់វ៉េ ដើម្បីវិភាគស៊ីជម្រៅទៅលើស្ថានភាពសុខភាពសាធារណៈ និងស្ថានភាពបង្កើតកូនរបស់ប្រជាពលរដ្ឋខ្មែរ ក្នុងចន្លោះ ឆ្នាំ២០១០ ដល់ឆ្នាំ២០១៤។ ការវិភាគស៊ីជម្រៅអំពីស្ថានភាពសុខភាពរបស់មាតា និងទារក ក្នុងរយៈពេល៥ឆ្នាំកន្លងទៅនៅក្នុងប្រទេសកម្ពុជាបានបង្ហាញថា មានស្រ្តីដ៏ច្រើនលើសលុប មានបំណងចង់បានកូនតាមប្រាថ្នាគឺក្នុងចន្លោះពី២ទៅ៣នាក់តែប៉ុណ្ណោះ ដោយពួកគេបានទទួលយកការពន្យាកំណើតតាមប្រព័ន្ធអប់រំរបស់សុខាភិបាលទាំងប្តីនិងប្រពន្ធ ដោយពួកគេមើលឃើញថាមានកូនតិច និងរង្វើលពិតជាមានប្រយោជន៍ដល់សុខភាព និងជីវភាពក្នុងគ្រួសារ ក៏មានស្រ្តីប្រមាណជា៧ភាគរយដែរ ដែលគិតថាខ្លួនមានកូនតាមតែព្រហ្មលិខិតកំណត់ (មានប៉ុន្មានក៏មានទៅ) ដោយមិនទទួលយកការពន្យាកំណើត ពិសេសគឺពួកគាត់មិនបានទទួលការអប់រំ ទាំងប្តី និងប្រប្រពន្ធ ហើយពួកគាត់ភាគច្រើនមានជីវភាពក្រលំបាក់ នៅតាមទីជនបទ។
.jpg)
ការជួបជុំគ្នានេះបានរួមគ្នាវិភាគស៊ីជម្រៅឡើងវិញ លើស្ថានភាពសុខភាពសាធារណៈរយៈពេល៥ឆ្នាំកន្លងមក សម្រាប់ជាទុនស្វែងរករបកគំហើញថ្មីៗ បន្ថែមក្នុងការអង្កេត ប្រជាសាស្រ្ត និងសុខភាពប្រជាពលរដ្ឋកម្ពុជា ដែលនឹងត្រូវដាក់បង្ហាញជូននៅក្នុងដើមឆ្នាំ២០១៥ខាងមុខនេះ។ លោកស្រី ទុង រដ្ឋាវី ប្រធានមជ្ឈមណ្ឌលជាតិគាំពាសុខភាពមាតា និងទារកមានប្រសាសន៍ថា ការវិភាគលំអិតនេះ បានធ្វើឡើងទៅលើរបាយការណ៍ស្រាវជ្រាវឆ្នាំ២០១០ មុនពេលកម្ពុជា ចាប់ផ្តើមការអង្កេតឆ្នាំ២០១៤ នេះទៅលើស្ថានភាពឥរិយាបទផែនការគ្រួសារ និងសុខភាពមាតា និងទារក រួមជាមួយនឹងបញ្ហាផ្សេងៗទៀតពាក់ពន្ធ័នឹងបញ្ហាសុខភាពប្រជាពលរដ្ឋ កម្ពុជា។ លោកស្រីបានបញ្ជាក់ថា ការវិភាគស៊ីជម្រៅនេះ នឹងទទួលបានទិន្នន័យលំអិតក្នុងផ្នែកតូចៗ ដែលវាមានសារៈសំខាន់ណាស់ សម្រាប់ជាធាតុចូលបន្ថែមទៀតនៅក្នុងការអង្កេតប្រជាសាស្រ្ត និងសុខភាពប្រជាជនក្នុងប្រទេសកម្ពុជា ។ យ៉ាងណាក៏ដោយលោកស្រីបាបបន្ថែមថា កម្ពុជាបាននិងកំពុងប្តេជ្ញាចិត្តខិតខំក្នុងការបំពេញនូវភារៈកិច្ចនេះឲ្យបានល្អថែមទៀត តែមិនទាន់អាចពឹងផ្អែកទាំងស្រុងលើខ្លួនឯងបាននៅឡើយ គឺត្រូវការការចូលរួមពីក្រសួងពាក់ព័ន្ធ ពិសេសពីអង្គការដៃគូរនានា។
.jpg)
.jpg)
លោក ហុង រដ្ឋាវុធ មន្រ្តីអង្គការស្រាវជ្រាវ ICF Micro បានធ្វើការបង្ហាញថា ការវិភាគនេះបានផ្តោតសំខាន់ទៅលើស្ថានភាពកំណើនប្រជាជន និងទៅលើផែនការកសាងគ្រួសារ ក្នុងនោះលំអិតទៅលើស្ថានភាព សុខភាពប្រជាជន ស្ថានភាពបង្កើតកូន និងស្ថានភាព សុខភាពមាតានិងទារក ក៏ដូចជាសុខភាពស្រ្តីទូទៅផងដែរ។ លោកបានបង្ហាញទៀតថា គ្រួសារខ្មែរមានផែនការជាមធ្យមយកកូន២-៣នាក់ ប៉ុន្តែលទ្ធផលជាក់ស្តែងទទួលបាន៣,៥នាក់ក្នុងគ្រួសារជាមធ្យម។ ចំណែក Ms Monique តំណាងផ្នែកសុខភាពសាធារណៈ នៃអង្គការ USAID បានបញ្ជាក់ថា ការធ្វើអង្កេតប្រជាសាស្រ្ត និងសុខភាពនេះ មានសារៈសំខាន់ណាស់ ដែលជួយជំរុញឲ្យកម្ពុជាអាចសម្រេចនូវគោលដៅអភិវឌ្ឍសហវត្សរបស់ខ្លួនបាន តាមរយៈការទទួលបាន នូវទិន្នន័យពិតប្រាកដសម្រាប់ជាមូលដ្ឋានក្នុងការតាមដាន និងវាយតម្លៃ នៅពេលខាងមុខ។ សូមបញ្ជាក់ថា ក្រសួងផែនការ គ្រោងចាប់ផ្តើមអង្កេតស្ថានភាពសុខភាពសាធារណៈ ឆ្នាំ២០១៤ ចាប់ពីខែមិថុនាខាងមុខនេះ ក្នុងគម្រោងទឹកប្រាក់ប្រមាណជាង២លានដុល្លារសហរដ្ឋអាមេរិក ដើម្បីអង្កេតទៅលើ មរណភាព មាតា និងទារក ផែនការមានកូនរបស់គ្រួសារខ្មែរ ការប្រើប្រាស់សេវាសុខភាពមាតា និង ទារក ការចំណាយទៅ លើការព្យាបាលសុខភាព និងអំពីស្ថានភាពស្រ្តីនិងជម្ងឺឆ្លងជាដើម៕
ដោយ៖ ស.ស្អាត