ភ្នំពេញៈ លោក នុត ពុធដារ៉ា អភិបាលនៃគណៈអភិបាលខណ្ឌដង្កោ បានដឹកនាំមន្ត្រីរាជការសាលាខណ្ឌ ចុះសួរសុខទុក្ខ លោក គង់ សំអុល ចៅសង្កាត់ព្រៃវែងដែលជួបគ្រោះថ្នាក់ចរាចរណ៍កាលពីថ្ងៃទី០២ ខែកុម្ភៈ ឆ្នាំ២០១៤ កន្លងទៅ ដែលកំពុង សម្រាកព្យាបាលជម្ងឺនៅគេហដ្ឋាន ភូមិត្រពាំងចក សង្កាត់ព្រៃវែង ខណ្ឌដង្កោ។
នៅព្រឹកថ្ងៃទី១៣ ខែមីនា នេះ លោក នុត ពុធដារ៉ា បានថ្លែងនូវការកោតសរសើរដល់លោកចៅសង្កាត់ដែលជានិច្ចកាល តែងខិតខំបំពេញភារៈកិច្ចរបស់ខ្លួន ហើយទោះបីជាលោកកំពុងមានជម្ងឺ ប៉ុន្តែលោកក៏នៅតែបន្តបំពេញការងារ ហើយចូលរួមកិច្ចប្រជុំនានាដែរ។
លោកក៏បានផ្តាំផ្ញើរដល់លោកចៅសង្កាត់ឲ្យខិតខំថែរក្សាសុខភាព បន្តជួបជាមួយគ្រូពេទ្យជំនាញ ដើម្បីឲ្យជំងឺបានឆាប់ជាសះស្បើយ និងងាយស្រួលបំពេញការងារបម្រើជូនប្រជាពលរដ្ឋ។ ទន្ទឹមនឹងនោះដែរ លោកអភិបាលខណ្ឌ ក៏បាននាំយកនូវផ្លែឈឺ ០១កន្រ្តក និងថវិកា៥០ម៉ឺនរៀល ឧបត្ថម្ភជូនលោក គង់ សំអុល ផងដែរ៕
ដោយ៖ ភីនរ៉ា