ភ្នំពេញ៖ មជ្ឈមណ្ឌលជាតិផ្តល់ឈាម នឹងរៀបចំធ្វើយុទ្ធនាការអប់រំផ្សព្វផ្សាយមួយនៅរាជធានីភ្នំពេញ ដើម្បីលើកកម្ពស់ការបរិច្ចាគឈាមដោយស្ម័គ្រចិត្ត មិនគិតកំរៃនៅថ្ងៃទី១៤ ខែកុម្ភៈ ឆ្នាំ២០១៤ នៅមជ្ឈមណ្ឌលជាតិផ្តល់ឈាម ដែលស្ថិតនៅក្នុងបរិវេណមន្ទីរពេទ្យព្រះអង្គឌួង។
យុទ្ធនាការណ៍នោះ និងត្រូវចាប់ផ្តើមធ្វើពេញមួយថ្ងៃ ដែលមានកិច្ចទទួលស្វាគមន៍ជាមួយសាធារណជនជាច្រើនរយនាក់ ដែលគ្រោងនិងមកចូលរួមទស្សនានូវការសម្តែងសិល្បៈជាប្រពៃណី និងសម័យរបស់និស្សិតមកពីសាកលវិទ្យាល័យនានាផងដែរនាឱកាសនោះ។
លោកវេជ្ជបណ្ឌិត ហុក គីមចេង ប្រធាននៃមជ្ឈមណ្ឌលជាតិផ្តល់ឈាម បានមានប្រសាសន៍ឲ្យដឹងដែរ៖ “គោលបំណងដែលមជ្ឈមណ្ឌលជាតិផ្តល់ឈាម ជ្រើសយកថ្ងៃ១៤កុម្ភៈ ដែលជាទិវានៃក្តីស្រលាញ់នោះ គឺដោយសារតែយើងចង់ឲ្យប្រជាជន ពិសេសយុវជនកម្ពុជាយើងបានដឹងថា ទិវានៃក្តីស្រលាញ់ គឺជាការផ្តល់សេចក្តីស្រលាញ់ទៅកាន់មនុស្សជាតិទាំងអស់ ហើយក្នុងនោះ ការចែករំលែក និងការជួយគ្នាទៅវិញទៅមក គឺជាការផ្តល់ក្តីស្រលាញ់។
ដូច្នេះយើងទាំងអស់គ្នា អាចផ្តល់សេចក្តីស្រលាញ់ តាមរយៈការបរិច្ចាគឈាម ដោយស្ម័គ្រចិត្ត”។ លោកបន្តថាប្រធានបទនៃយុទ្ធនាការណ៍នេះគឺ “ផ្តល់ឈាម ផ្តល់ក្តីស្រលាញ់” ដោយហេតុថា ថ្ងៃ១៤ ខែកុម្ភៈ ត្រូវបានគេចាត់ទុកថាជាទិវានៃក្តីស្រលាញ់ក្នុងពេលបច្ចុប្បន្ននេះដែរ។
ជាមួយគ្នានេះដែរ លោកវេជ្ជបណ្ឌិត សេក ម៉ារឌី មន្រ្តីជំនាញផ្នែកសុវត្ថិភាពឈាមនៃ អង្គការសុខ ភាព ពិភព លោក ដែលជាអ្នកឧបត្ថម្ភនៅក្នុងយុទ្ធនាការណ៍ថ្ងៃ១៤ កុម្ភៈនេះ បានបន្ថែមដែរថា៖ “ដោយតម្រូវការនៃការប្រើប្រាស់ឈាមមានការកើនឡើងជាលំដាប់ ដែលផ្ទុយមកវិញចំណេះដឹងអំពីការបរិច្ចាគឈាមនៅមានកំរិតមួយ ចំពោះប្រជាជនកម្ពុជាយើង។
ដូច្នេះ យុទ្ធនាការ “ផ្តល់ឈាម ផ្តល់ក្តីស្រលាញ់” នេះ មានគោលបំណងធំចង់ផ្តល់ចំណេះដឹងពីការបរិច្ចាគឈាមទៅសាធារណជន ពិសេសគឺយុវជន ដោយក្នុងនោះមានការចែករំលែកបទពិសោធន៍ពីក្រុមគ្រួសារអ្នកជម្ងឺ ដែលត្រូវការឈាម សប្បុរសជនបានបរិច្ចាគឈាមទៀងទាត់ទៅដល់ប្រជាជន ក្នុងគោលបំណងលើកទឹកចិត្តយុវជន ទាំងអស់ដែលចូលរួមបរិច្ចាគឈាមនៅថ្ងៃនេះ និងពេលក្រោយៗទៀត”។
គួរបញ្ជាក់ផងដែរថា ក្នុងប៉ុន្មានឆ្នាំចុងក្រោយនេះ មជ្ឈមណ្ឌលជាតិផ្តល់ឈាម សហការណ៍ជាដៃគូអភិវឌ្ឍន៍ទាំងឡាយ និងស្ថាប័នពាក់ព័ន្ធដទៃទៀត បាននាំគ្នាធ្វើការអប់រំផ្សព្វផ្សាយពីចំណេះដឹងពីឈាម ទៅកាន់សាធារណជនយ៉ាងសកម្ម។ ហើយក្នុងឆ្នាំ២០១៣ ចំនួននៃការបរិច្ចាគឈាមដោយស្ម័គ្រចិត្ត មិនគិតកម្រៃបានឡើងរហូតដល់៣៥% នៃចំនួនអំណោយឈាមទាំងអស់នៅទូទាំងប្រទេស ៕ ដោយ៖ អភិរក្ស