ភ្នំពេញ៖ ការឆ្លងវីរុសផ្តាសាយបក្សី H5N1 មួយករណីទៀតរកឃើញលើកុមារីម្នាក់នៅខេត្តកំពង់ធំ។ នេះជាករណីថ្មីមួយទៀត ដែលជម្ងឺប្រភេទនេះបានកើតមានក្នុងប្រទេសកម្ពុជាដែលមន្ត្រីសុខាភិបាលចាត់ទុកថា ជាការកើនឡើងច្រើន ទៅកាន់ខេត្តថ្មីៗ មួយចំនួនទៀតនៃប្រទេសកម្ពុជាឈានដល់កម្រិតមួយគួរអោយព្រួយបារម្ភ។យោងតាមសេចក្តីប្រកាសព័ត៌មានរបស់ក្រសួង សុខាភិបាលបានអោយដឹងថា គិតត្រឹមខែតុលាក្នុង ឆ្នាំ២០១៣នេះកម្ពុជាមានករណីឆ្លងជម្ងឺផ្តាសាយបក្សីH5N1ដល់ទៅ២១ ករណីហើយ។ករណីឆ្លងរបស់កុមារីក្នុងខេត្តកំពង់ធំនេះជាមនុស្សទី៤២ដែលកើតជំងឺនេះ នៅក្នុងប្រទេសកម្ពុជា ដែលក្នុងនោះមាន៣១នាក់ជាកុមារមានអាយុក្រោម ១៤ឆ្នាំ និង ២៥ នាក់ជាស្ត្រី ។
ហើយមានតែ១០ នាក់ក្នុងចំណោម មនុស្សចំនួន ២១ដែលនៅរស់រានមានជីវិត នៅក្នុងឆ្នាំនេះផងដែរ។លោកវេជ្ជបណ្ឌិត លី សុវ៉ាន់ អនុប្រធាននាយកដ្ឋានប្រយុទ្ធ នឹងជម្ងឺឆ្លងនៃក្រសួងសុខាភិបាលបានប្រាប់អ្នកសារព័ត៌មានថា ការឆ្លងរីករាលនៃជម្ងឺផ្តាសាយបក្សីឆ្នាំនេះមានការកើនឡើងខ្លាំងប្រើប្រៀបធៀប ឆ្នាំកន្លងទៅ ។
លោក វេជ្ជបណ្ឌិតបានសម្តែងការព្រួយបារម្ភចំពោះការឆ្លងនេះ ពីព្រោះជម្ងឺនេះបានរីករាលដាលជាបន្តបន្ទាប់តាំងពីខេត្តកំពត តាកែវ ព្រៃវែង កំពង់ចាម និងបាត់ដំបងហើយថ្មីៗនេះបានលាតសន្ធឹងដល់ខេត្តកំពង់ធំទៀត។ករណីថ្មីនៃជម្ងឺគ្រុនផ្តាសាយបក្សីរបស់កុមារីខេត្តកំពង់ធំនោះ ត្រូវបានបញ្ជាក់ដោយវិទ្យាស្ថានបាស្ទ័រកម្ពុជា កាលពីថ្ងៃទី១៧ខែតុលាឆ្នាំ២០១៣។បច្ចុប្បន្នកុមារីនោះស្ថិតក្នុងស្ថានភាពធម្មតានោះទេ។កុមារី នេះចាប់ផ្តើមធ្លាក់ខ្លួនឈឺកាលពីថ្ងៃទី៨ខែតុលាហើយឳពុកម្តាយរបស់នាងបានយកនាងទៅព្យាបាលគ្លីនិកក្នុងភូមិមួយកន្លែង។ដោយសារស្ថាន ភាពជម្ងឺរបស់នាងចេះតែវិវត្តន៍ទៅមុខមិនមានការធូរស្រាលនោះដោយនៅតែក្តៅខ្លួន ក្អក និងក្អួតចង្អោរទៀតនោះឳពុកម្តាយនាងបាននាំនាង ទៅព្យាបាលនៅមន្ទីរពេទ្យស្រុកនិងបន្តទៅខេត្តទៀតតែនៅតែមិនបានធូរស្រាល ទើបបន្តបញ្ជូនទៅមន្ទីរពេទ្យជ័យវរ្ម័នទី៧ក្នុងទីរួមខេត្តសៀម រាប ។
លោក ម៉ម ប៊ុនហេង រដ្ឋមន្ត្រីក្រសួងសុខាភិបាលមានប្រសាសន៍ថា ជម្ងឺផ្តាសាយបក្សីបង្កឡើងពីវីរុស H5N1នៅតែបន្តគំរាមកំហែងដល់សុខភាពប្រជាជនកម្ពុជា ជាពិសេសកុមារដែលហាក់ដូចជាងាយទទួលរងគ្រោះដោយសារវីរុសប្រភេទនេះខ្លាំងជាងគេនិងមានហានិភ័យខ្ពស់ទៀតផង។ដើម្បីចៀសវាងពីជម្ងឺដែលបង្កឡើងដោយវិរុសH5N1នេះគឺត្រូវលាងដៃនឹងសាប៊ូអោយបានញឹកញាប់មុននឹងបរិភោគ និងក្រោយពេលចាប់កាន់បក្សីអោយកុមារនៅឆ្ងាយពីបក្សីហើយទុកបក្សីទាំងនោះនៅឆ្ងាយពី
កន្លែងរស់នៅមិនត្រូវបរិភោគបក្សីដែលស្លាប់ និងរាល់ពេលហូបសាច់បក្សី ត្រូវតែចំអិនអោយបានឆ្អិនល្អជាមុនសិន
៕ ដោយ៖ រតនា