ភ្នំពេញ៖ ប្រមុខរាជរដ្ឋាភិបាលសម្តេចនាយករដ្ឋមន្រ្តី ហ៊ុន សែន បានថ្លែងវិទ្យាស្ថានជាតិអប់រំនៅថ្ងៃទី១១ ខែមីនា ក្នុងឱកាសអញ្ជីញប្រគល់សញ្ញាបត្រជ័យលាភី គ្រូបង្រៀនកម្រិតឧត្តម(បរិញ្ញា+១) ជំនាន់ទី១៨ និងគ្រូបង្រៀនកម្រិតមូលដ្ឋានឯកទេស ភាសាបារាំង-ខ្មែរជំនាន់ទី ១៥ សរុបចំនួន១.០៣៨ សម្តេចនាយករដ្ឋមន្រ្តីបានក្រើន រំលឹកទៅក្រសួងសេដ្ឋកិច្ច និងហិរញ្ញវត្ថុ រួមជាមួយរតនាជាតិកម្ពុជាឲ្យពន្លឿនលើការប្រាក់បៀវត្សជូនគ្រូបង្រៀនឲ្យបាននៅក្នុងខែជៀសវៀងការបើកឆ្លងខែ។
សម្ដេចបានបន្តថា ក្រសួងសេដ្ឋកិច្ច និង ហិរញ្ញវត្ថុ និងរតនាគារជាតិកម្ពុជា ត្រូវរៀបចំរំកិលសាច់ប្រាក់ឲ្យបានមុនខែ ទាន់ពេលវេលា ក្នុងការបើកប្រាក់ខែជូន គ្រូបង្រៀន ជៀសវៀងការប្រើកប្រាក់ខែឆ្លងខែ។ សម្ដេចបានបន្ថែមថា «ដាច់ខាតយើងត្រូវតែម៉ឺងម៉ាត់ សម្រាប់ការបើកប្រាក់ខែជូនគ្រូបង្រៀន ឲ្យបានក្នុងខែ ដោយក្នុងនោះមានសាច់ប្រាក់ពិតប្រាកដ អីចឹងយើងត្រូវរៀបចំសាច់ប្រាក់ ឲ្យបានក្នុងប៉ុន្មានខែមុន ពីព្រោះយើងចាត់ទុកវិស័យគ្រូនេះ ជំរុញឲ្យមានការបើកប្រាក់ខែ តាមធនាគារឲ្យបានលឿនជាងគេ»។
.jpg)
លោក ហង្ស ជួនណារ៉ុន រដ្ឋមន្ត្រីក្រសួងអប់រំ យុវជន និងកីឡា មានប្រសាសន៍ថា ចាប់តាំងពីឆ្នាំ១៩៩៣ មកវិទ្យាស្ថានជាតិអប់រំបានចាប់ផ្តើមបណ្តុះបណ្តាលរយៈពេលវែងដល់ គ្រូបង្រៀនកម្រិតឧត្តមគ្រូបង្រៀនកម្រិតមូលដ្ឋានឯកទេសភាសាបារាំង-ខ្មែរភាសាអង់គ្លេស- ខ្មែរគ្រូបឋមសិក្សា គ្រូឧទ្ទេសបឋម គ្រូឧទ្ទេសភាសាបារាំងអធិការបឋមសិក្សា និងអធិការមធ្យមសិក្សាសរុប១៣ ៥៣៨ នាក់ ។
លោករដ្ឋមន្ត្រីបញ្ជាក់ថា ចាប់តាំងពីឆ្នាំសិក្សា ២០១២-២០១៣មក វិទ្យាស្ថានបានបើក វគ្គបណ្តុះបណ្តាលគ្រូឧទ្ទេសអធិការអប់រំ ដែលមានសិក្ខាកាមចូលរៀនចំនួន ២១ នាក់។សូមបញ្ជាក់ថា បច្ចុប្បន្ននេះ ប្រទេសកម្ពុជា មានគ្រឹះស្ថានឧត្តមសិក្សា មានចំនួន១០៤ និងមានសិស្សនិស្សិតកំពុងសិក្សានៅគ្រប់ភូមិសិក្សាសរុបចំនួនប្រមាណជាង ៣,៥ លាននាក់ក្នុងចំណោមប្រជាពលរដ្ឋកម្ពុជាជាង ១៤ លាននាក់។ ការកសាងអាគារសិក្សាមកដល់បច្ចុប្បន្នមានអាគារសិក្សាចំនួន ១១.៣៧០ខ្នងស្មើនឹង ៨១.៦៣០ បន្ទប់ក្នុងនោះអាគារសិក្សាចំនួន ៣.៥១៨ ខ្នងស្មើ នឹង ១៨.២៥៦បន្ទប់ដែលជាអំណោយរបស់សម្តេចតេជោនាយករដ្ឋមន្ត្រី និងសម្តេចកិត្តិព្រឹទ្ធបណ្ឌិត៕ ដោយ៖ ភីន រ៉ា