ភ្នំពេញ៖ រាជរដ្ឋាភិបាលកម្ពុជា ក្រោមការដឹកនាំរបស់គណបក្សប្រជាជនកម្ពុជា ដែលជាគណប​ក្សឈ្នះឆ្នោត​ក្នុងការ​បោះ​ឆ្នោតសភានីតិកាលទី៥ ឆ្នាំ២០១៣ នៅតែបើក​ទ្វារចំហក្នុងការចរ​ចា​ជាមួយ​គណបក្សសង្រ្គោះជាតិ ដែលជា​គណ​បក្សប្រឆាំង ដើម្បីស្វែងរក​ដំណោះស្រា​យពីភាព​ខ្វែ​ង​គំនិតគ្នាក្រោយការបោះឆ្នោតរវាងគណបក្សធំៗទាំងពីរ ដោយឈរ​លើស្មារតីសន្តិភាព និងគ្មានអំពើហិង្សា។ក្នុងជំនួបពិភាក្សាការងារជាមួយឯកឧត្តម Joachim Baron Von Marschallឯកអគ្គរដ្ឋទូតស​ហព័ន្ធ​អាល្លឺម៉ង់ ប្រចាំនៅកម្ពុជា នៅរសៀលថ្ងៃទី១២ ខែវិច្ឆិកា ឆ្នាំ២០១៣ ម្សិលមិញនេះ ឯកឧត្ត​មឧបនា​យករដ្ឋមន្រ្តី ស ខេង រដ្ឋមន្រ្តីក្រសួងមហាផ្ទៃ បានមានប្រសាសន៍ថា រាជរដ្ឋា​ភិបាលកម្ពុ​ជា នៅ​តែ​បើក​ទ្វារ​សម្រាប់ធ្វើការចរចាបន្ថែមទៀតជាមួយគណបក្សសង្រ្គោះជាតិ ហើយគោលជំហររបស់រាជរដ្ឋាភិបាលកម្ពុជា គឺ​ចង់​ឲ្យមានការចរចានិងដោះស្រាយរាល់បញ្ហាដែល​​នៅ​​​​​​សេស​សល់ប្រកបដោយសន្តិភាព និងគ្មានអំពើហិង្សា។ឯក​ឧត្តម បន្តថា សហព័ន្ធអាល្លឺម៉ង់ គឺជាប្រទេសក្នុងសហគមន៍អ៊ឺរ៉ុប​ដែលបានជួយគាំទ្រយ៉ាង​សកម្មដល់ការងារ​របស់​ប្រទេស​កម្ពុជា ហើយក៏បានរួមចំណែក​យ៉ាងសំខាន់ក្នុងកា​រពង្រឹងសន្តិ​ភាព និងស្ថេរ​ភាព​របស់​ប្រទេស​កម្ពុជាផង​ដែរ។ ការចូលរួមរបស់សហព័ន្ធអាល្លឺម៉ង់ក្នុងបុព្វហេតុកសាងសន្តិភាព និងស្ថេរភាពនៃប្រទេសកម្ពុជាប្រៀបបា​ន​និង​បង្គោលយ៉ាងរឹងមាំក្នុងការអភិវឌ្ឍសេដ្ឋកិច្ច សង្គមកិច្ច ក៏ដូចជាការពង្រឹងពង្រីកទំនាក់ទំនងកិច្ចសហប្រតិបត្តិការ​ទ្វេភា​​គីរវាងកម្ពុជា-សហព័ន្ធអាល្លឺម៉ង់ ក៏ដូចជាកម្ពុជា និងសហគមន៍អ៊ឺរ៉ុបផងដែរ។

ជាការឆ្លើយតប ឯកឧត្តម Joachim Baron Von Marschallឯកអគ្គរដ្ឋទូតសហព័ន្ធអាល្លឺម៉ង់ បានមានប្រសាសន៍ថា សហ​​​ព័ន្ធអាល្លឺម៉ង់ នឹងត្រៀមខ្លួនជានិច្ចដើម្បីពង្រឹងកិច្ចសហប្រតិបត្តិការទំនាក់ទំនងជាមួយប្រទេសកម្ពុជា ពីព្រោះ​សហព័ន្ធអាល្លឺម៉ង់ចង់ឲ្យប្រទេសកម្ពុជាទទួលបាននូវសន្តិភាព និងវិបុលភាពលើគ្រប់វិស័យ។ ដូច្នេះអាល្លឺម៉ង​ផ្អែក​លើ​​បទពិសោធន៍របស់ខ្លួននឹងជួយកម្ពុជាដើម្បីធ្វើការពង្រឹងនូវសន្តិភាព និងស្ថេរភាព​នៅក្នុងប្រទេសកម្ពុជាឲ្យកាន់​តែល្អឡើងបន្ថែមទៀតគួរបញ្ជាក់ក្នុងជំនួបចរចាទ្វេភាគីដោយបិទទ្វារជាងបីម៉ោង កាលពីថ្ងៃទី៥ ខែវិច្ឆិកា ឆ្នាំ២០១៣​កន្លង​ទៅ​​​រវាងក្រុមការងារបច្ចេកទេសគណបក្សប្រជាជនកម្ពុជា ដឹកនាំដោយឯកឧត្តម ព្រុំ សុខា រដ្ឋលេខាធិការ​ក្រសួង​​​មហាផ្ទៃ និងគណបក្សសង្រ្គោះជាតិ ដឹកនាំដោយឯកឧត្តម សុន ឆ័យ សមាជិក​គណៈកម្មាធិកា​រ​អចិន្ត្រៃយ៍នៅ​មិនទាន់ស្វែងរកដោះស្រាយដើម្បីចំពោះភាពខ្វែងគំនិតគ្នាក្រោយការបោះឆ្នោតកាលពីថ្ងៃទី២៨ ខែកក្កដា ឆ្នាំ​២០១៣​កន្លងទៅ ឲ្យបានធំដុំនូវឡើយទេ។ថ្នាក់ដឹកនាំ​កំពូលរបស់គណបក្សទាំងពីរ ក៏ធ្លាប់​បាន​ជួបគ្នា​ពីរ​លើក​រួចមក​ហើយដែរ កាលពី​ថ្ងៃ​ទី​១៦និង​១៧ ខែ​កញ្ញា ឆ្នាំ២០១៣ កន្លងទៅ គឺខាង​គណបក្ស​ប្រជាជន​កម្ពុជា ដឹក​នាំ​​ដោយ​សម្តេច​​​​តេជោ ហ៊ុន សែនជា​​អនុប្រធានគណបក្ស ចំណែក​គណបក្ស​សង្គ្រោះ​ជាតិ ដឹកនាំ​ឯកឧត្តម សម រង្ស៊ីជា​ប្រធាន​​​​​​គណ​បក្ស ប៉ុន្តែជំនួបចរចាទាំងពីរលើកនោះមិនទាន់បានសំរេចលទ្ធផលអ្វីនោះទេ។គណបក្សសង្រ្គោះជាតិ ដែលជា​គណបក្សប្រឆាំងនៅតែធ្វើពហិការក្នុងការចូលប្រជុំសភា ដោយយកហេតុផលថា ត្រូវមានការ​ស៊ើបអង្កេត​ដើម្បីស្វែងរកការពិតចំពោះភាពមិនប្រក្រតីនៃការបោះឆ្នោតជ្រើសតាំងតំណាងរាស្រ្ត នីតិកាលទី​​៥ កាលពីថ្ងៃទី២៨ ខែកក្កដា ឆ្នាំ២០១៣កន្លងទៅនេះ បើទោះបីជាមតិជាតិ និងអន្តរជាតិ បានទទួលស្គាល់រួចហើយថា ការបោះឆ្នោត​នេះ​​ប្រកបដោយភាពសេរី យុត្តិធម៌​ ត្រឹមត្រូវ តម្លាភាព និងមានប្រជាធិបតេយ្យយ៉ាងណាក៏ដោយ៕

ដោយ៖ គង់ រតនា