ភ្នំពេញៈ ប្រជាពលរដ្ឋក្នុងរាជធានីភ្នំពេញសាទរចំពោះចំណាត់វិធានការបស់អាជ្ញាធរដែលបាន​ធ្វើ​ឲ្យសណ្តាប់ធ្នាប់​នៅតាម​ទីផ្សារ​មានលក្ខណៈល្អប្រសើរ ពិសេសការអនុវត្តបានត្រឹមត្រូវតាមសៀវភៅ បន្ទុកនៃសេវាកម្មផ្ញើរកង់ ម៉ូតូ និងឡានលោក ញាណ ដារារត្ន័ ជាប្រជាពលរដ្ឋរស់នៅក្នុងរាជធានីភ្នំពេញបានឲ្យដឹងថា ក្នុងរយៈពេល ៤-៥ ថ្ងៃកន្លងមកនេះ ទាំងរូបលោក និងប្រជាពលរដ្ឋផ្សេងទៀតក្នុងទីក្រុងភ្នំពេញសុទ្ធតែមានអារម្មណ៍ ពេញ​ចិត្តចំពោះអាជ្ញាធរ ដែលបានធ្វើឲ្យតម្លៃ​សេវាកម្មផ្ញើ​រកង់ ម៉ូតូ នៅតាមទីផ្សារនានា ងាកមកអនុ វត្ត​ត្រឹមត្រូវតាមសៀវភៅបន្ទុកវិញ។

លោកបញ្ជាក់ថា នៅតាមកន្លែងចំណត់ផ្ញើរកង់ម៉ូតូនៅតាមផ្សារនានា គឺបានបង្ហាញតារាង​បញ្ជាក់​ពី​តម្លៃត្រឹមត្រូវដោយ​ការផ្ញើ​កង់​ម្តងតម្លៃ ២០០​រៀល ម៉ូតូ៣០០​រៀល និង​ឡាន ៥០០​រៀល ស្រប​តាម​ការកំណត់រ​បស់​មន្ទីរ​សេដ្ឋកិច្ច និង​ហិរញ្ញវត្ថុ​ទោះជា​យ៉ាង​​នេះក្តី លោក ដារារត្ន័ បានអំពាវនាវដល់អាជ្ញាធរត្រូវអនុវត្តចំណាត់វិធានការនេះឲ្យ​បាន​ជារៀងរហូត ព្រោះ​វាជាយន្ត​ការ​ដ៏ល្អ​​ដែលបានជួយសម្រាលបន្ទុកចំណាយរបស់ប្រជាពលរដ្ឋ និងគ្មាន​ភាពថ្នាំងថ្នាក់រវាងប្រជា​ពលរដ្ឋ​និង​រាជរដ្ឋាភិ​បាល​ជាដើម​។

ការបង្ហាញ​តម្លាភាព​នៃ​តម្លៃ​ភាស៊ី និង​សេវាកម្មផ្ញើរយានយន្តនៅ​តាម​ផ្សារ​នេះ សង្កេតឃើញថា បាន​កើតឡើង​បន្ទាប់ពីប្រមុខ​រដ្ឋាភិបាល​កម្ពុ​ជា សម្តេចតេជោនាយក​រដ្ឋមន្ត្រី ហ៊ុន សែន កាលពី​ថ្ងៃ​ទី​១៧ ខែ​កុម្ភៈ បានប្រកាសឲ្យ​អភិបាល​រាជធានី​-​ខេត្ត ត្រួត​ពិន្យិតឡើងវិញ​នូវស​ណ្តា​ប់ធា្ន​ប់ ការកំណត់​តម្លៃ​សេវា​ភាស៊ី​តាម​ទីផ្សារ និង​ឥរិយាបថ​ក្រុម​ហ៊ុន​​ដេញ​ភាស៊ី ដែល​ធ្វើ​ឲ្យ​អាជីវករ និង​អ្នកទិញ រិះគន់ស្តីបន្ទោស និង​ទម្លាក់កំហុស​ទាំងស្រុង​លើ​រាជ​រដ្ឋាភិបាល​។

ដោយឡែកតាមរយៈ​បទបញ្ជា​នេះ កាលពីថ្ងៃ​ទី​៥ ខែ​មីនា លោក​ ប៉ា សុជាតិ​វង្ស អភិបាល​រាជធានី​ភ្នំពេញបានកោះប្រជុំ​ជា​មួយ​អភិបាល​ខណ្ឌ​ទាំង​៩ គណៈកម្មការ​ផ្សារ និង​មន្ទីរ​សេដ្ឋកិច្ចហិរញ្ញវត្ថុ បាន​ដាក់​ឱសានវាទ​រយៈពេល​១៥​ថ្ងៃ ឲ្យ​មន្ត្រី​ថ្នាក់ក្រោម​រៀបចំ​សណ្តាប់ ធ្នាប់​តាម​ផ្សារ​គោលដៅ មួយចំនួន ក្នុង​ខណ្ឌ​ទាំង​៩ ដើម្បី​ទាក់ទាញ​ភ្ញៀវទេសចរ និង​ដើម្បី​ប្រឡងប្រណាំង​ដណ្ដើម​ពានរង្វាន់ "​ផ្កា​រំដួល ៣​ទង​" ជា​ទីក្រុង​ស្អាត​។​

លោកអភិបាលបន្តថា ចាប់ពី​ពេល​នេះ​ទៅ​សណ្តាប់​ធ្នាប់​នៅ​តាម​ទីផ្សារ​ពិសេស​នៅ​ក្រៅ​ផ្សារ​ត្រូវ​តែរៀបចំ​អោយ​ប្រសើរ​ឡើង​ដោយ​មិន​ឲ្យ មាន​ភាព​រញ៉េរញ៉ៃ​ទៀត​ទេ​។ សកម្មភាពនេះ រាជធានី​ភ្នំពេញ​មិន​បណ្តែត​បណ្តោយតទៅ​ទៀតឡើយ បើ​ប្រធាន​ផ្សារ ​អភិបាលរង​ក្រុង​ អភិបាលខណ្ឌ​ អភិបាលរង​ខណ្ឌ ​និង​មន្ត្រី​ចំណុះ​អោយ​សាលា​រាជធានី​ទាំងអស់​ចាប់​ពី​ពេល​នេះ​តទៅ​បើ​ធ្វើ​ការងារ​នេះមិន​កើត​ទេ​ត្រូវតែដកចេញ។ ចំណែកកន្លែងផ្ញើកង់-ម៉ូតូ​តាមផ្សារនីមួយៗបើនៅតែយកលើសពីសៀវភៅបន្ទុក គឺ​ត្រូវ​លុប​ចោល​កិច្ចសន្យាតែម្ដង ហើយ​ដាក់ពាក្យបណ្ដឹងទៅកាន់តុលាការទៀតផង ។ 

លោក គៀង លក្ខណៈ ប្រធានគណៈកម្មការផ្សារអូឬស្សីបានបញ្ជាក់ថា បច្ចុប្បន្នផ្សារអូឬស្សី​ត្រូវ​បានរឹតបន្តឹងយ៉ាងខ្លាំងលើ​ការងារសណ្តាប់ធ្នាប់ទាំងនូវក្នុងផ្សារ និងនៅក្រៅផ្សារ ដោយពុំឲ្យកើតឡើនូវ ភាពរញ៉េរញៃទៀតឡើយ។លោកអះអាងថា ចំពោះចំណតសេវាផ្ញើរកងម៉ូតូឡានទាំង២០កន្លែងនៅ ជុំវិញផ្សារអូឬស្សី​ត្រូវ​បាន​កំណត់ផែនការយ៉ាងតឹ​ងរឹង​មិនឲ្យយក​លើស​ពីតម្លៃ​នៅក្នុងសៀវភៅបន្ទុកទៀតឡើយ ប៉ុន្តែបើក្នុង​ករណីកន្លែងណាមួយយកលើសពីគោលការណ៍នេះ ប្រជាពលរដ្ឋត្រូវរាយ ការណ៍ជាបន្ទាន់ ដើម្បី​ឲ្យ​គណៈ​កម្មការផ្សារចាត់វិធានការតាមផ្លូវច្បាប់ចំពោះបុគ្គលដែលល្មើសនោះ។

សូមបញ្ជាក់ថា  នៅទូទាំងរាជធានីមាន​ផ្សារ​រដ្ឋទាំងអស់ចំនួន ២៦ផ្សារ ឯកជន១៦ផ្សារ ផ្សារ​ទំនើបចំនួន៣៦ផ្សារ ផ្សារមិន​រៀប​រយចំនួន១៤ និងផ្សារមីនីម៉ាតចំនួន៩៦ដែលមានច្បាប់ ត្រឹម​ត្រូវ​ពីអាជ្ញាធររាជធានីភ្នំពេញ៕ ដោយ៖ ភីន រ៉ា