ភ្នំពេញ៖ បើមិនមានការប្រែប្រួលទេ អ្នកជំនាញការបច្ចេកទេសជប៉ុនគ្រោងនឹងមកជួយធ្វើការសិក្សាស្រាវ ស្តីពីការធ្វើកំណែទម្រង់បោះឆ្នោតនៅកម្ពុជាក្នុងខែមករានេះ តាមការស្នើរបស់ប្រមុខរដ្ឋាភិបាល។តបតាមការស្នើសុំរបស់ សម្តេចនាយករដ្ឋមន្ត្រី ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានស្នើឱ្យនាយករដ្ឋមន្ត្រី ជប៉ុន ស៊ីនហ្សូ អាបេ បញ្ជូនអ្នកជំនាញការជប៉ុនមកជួយធ្វើកំណែទម្រង់នៅកម្ពុជានោះ លោក គូម៉ាម៉ារូ យូជិ ឯកអគ្គរាជទូតជប៉ុនប្រចាំកម្ពុជា មានប្រសាសន៍ថា ជប៉ុននឹងបញ្ជូនអ្នកជំនាញការជប៉ុន មកចូលរួមសិក្ខាសាលាមួយដែលរដ្ឋាភិបាលគ្រោងរៀបចំឡើងក្នុងខែមករានេះ ដើម្បីឱ្យគ្រប់និន្នាការទាំងអស់ ចូលរួមផ្តល់យោបល់ ក្នុងការធ្វើកំណែទម្រង់បោះឆ្នោត។ការថ្លែងបែបនេះ របស់ឯកអគ្គរាជទូតជប៉ុន ធ្វើឡើងក្នុងជំនួបពិភាក្សាការងារមួយរវាង ឯកឧត្តម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ កាលពីថ្ងៃទី២៣ធ្នូឆ្នាំ២០១៣។
លោក បានបញ្ជាក់ទៀតថា ជប៉ុនមិនមែន ជួយកម្ពុជាតែ ផ្នែកនយោបាយ សេដ្ឋកិច្ច និងសង្គម ប៉ុណ្ណោះទេ ប៉ុន្តែ ជប៉ុននឹងជួយ កម្ពុជាក្នុងការធ្វើ កំណែទម្រង់ រដ្ឋផងដែរ។យ៉ាងណាក៏ដោយ មន្ត្រីស្ថានទូតជប៉ុនទទួលបន្ទុកផ្នែកនយោបាយប្រាប់ទូរទស្សន៍ ហង្ស មាស ក្នុងលក្ខខណ្ឌមិនបញ្ចេញឈ្មោះកាលពីល្ងាចម្សិលមិញថា ជប៉ុនមិនទាន់សម្រេចចិត្តច្បាស់លាស់ក្នុងការបញ្ជូនអ្នកជំនាញការមកកម្ពុជាទេ ប៉ុន្តែជប៉ុនកំពុងធ្វើការពិចារណាលើរឿងនេះ។ចំណែកគណបក្សនយោបាយជាប់ឆ្នោតទាំងពីរ ក៏មានឆន្ទៈក្នុងការធ្វើកំណែទម្រង់ដូចគ្នាដែរ ក្នុងការចរចាកន្លងមក ប៉ុន្តែនៅសល់ចំណុចខ្លះដែលទាមទារអោយគណបក្សទាំងពីរត្រូវតែធ្វើសម្បទានគ្នាទៅវិញទៅមក ទើបការចរចានេះ មានច្រកចេញរួច។គណបក្សប្រជាជនកម្ពុជានៅតែបើកចំហទ្វារចរចាដដែល ខណៈគណបក្សសង្រ្គោះជាតិនៅតែដាក់លក្ខខណ្ឌខ្ពស់ ជាហេតុធ្វើឱ្យបរាជ័យនៃការគ្រោងជួបចរចានេះ៕
ដោយ៖ រតនា