ភ្នំពេញៈ ក្រុមអង្គការសង្គមស៊ីវិលក្រៅរដ្ឋាភិបាលអំពាវនាវឲ្យរាជរដ្ឋាភិបាលទទួលស្គាល់តួនាទីរបស់ ពួកគេ ដោយមិនប្រកាន់សកម្មភាពការងារ ដែលនេះជាយន្តការដ៏ល្អក្នុងការជំរុញកិច្ច អភិវឌ្ឍនានា ក្នុងប្រទេសកម្ពុជាកាន់តែមានប្រសិទ្ធិភាព។
ក្នុងកិច្ចប្រជុំប្រចាំឆ្នាំនៃអង្គការគណៈកម្មាធិការសហប្រតិបត្តិការដើម្បីកម្ពុជា CCC នៅព្រឹកថ្ងៃទី៥ ខែមិនានេះ លោកសឿង សារឿន នាយកប្រតិបត្តិនៃអង្គការ CCCដែលប្រមូលផ្តុំអង្គការសង្គម ស៊ីវិលជាង១៦០នៅទូទាំងប្រទេសបានបង្ហាញថា ទោះបីជាបច្ចុប្បន្នរាជរដ្ឋាភិបាលបានទទួលស្គាល់ ពីតួនាទីរបស់អង្គការសង្គមស៊ីវិលដែលកំពុងបំពេញបេសកកម្មនៅក្នុងប្រទេសកម្ពុជាក៏ដោយ ប៉ុន្តែ រាជរដ្ឋាភិបាលនៅមិនទាន់សហការជាមួយគ្រប់អង្គការសង្គមស៊ីវិលនៅឡើយទេ។
លោកបញ្ជាក់ថា ការរើសអើងក្នុងកិច្ចសហការជាមួយក្រុមអង្គការសង្គមស៊ីវិលដែលមានចរិករិៈគន់នឹងរាជរដ្ឋាភិបាល នេះ គឺជាចំនុចដែលមិនល្អទាល់តែសោះដែលរាជរដ្ឋាភិបាលគួតែកែប្រែ ព្រោះនេះជាបញ្ហាប្រឈម ដែលធ្វើឲ្យរាំងស្ទះដល់ដំណើរការការងាររបស់អង្គការទាំងនោះក្នុងការរួមចំណែកអភិវឌ្ឍប្រទេស កម្ពុជាឲ្យកាន់តែរីកចំរើន។ លោកបន្តថា កិច្ចសហការរវាងក្រុមអង្គការសង្គមស៊ីវិល វិស័យឯកជន និងរាជរដ្ឋាភិបាល នឹងជំរុញឲ្យកម្ពុជាកាន់តែមានការអភិវឌ្ឍ តាមរយៈទទួលបានព័ត៌មាននិងរបាយការណ៍ពិតគ្រប់បែបយ៉ាង ពី មូលដ្ឋាន ដើម្បីធ្វើការឆ្លើយតបឲ្យចំទិសដៅ។
លោក ផៃ ស៊ីផាន រដ្ឋលេខាធិការ និងជាអ្នកនាំពាក្យទីស្តីការគណៈរដ្ឋមន្ត្រីបានបដិសេធចំពោះការលើកឡើងទាំងនេះ ប៉ុន្តែលោកបានបញ្ជាក់ថា គ្រប់អង្គការសង្គមស៊ីវិលដែលត្រឹមត្រូវនឹងទទួលបានកិច្ចសហការពីរាជរដ្ឋាភិបាល។
លោកក៏បានបន្តថា បើនិយាយអំពីច្បាប់ក្រុមអង្គការសង្គមស៊ីលវិល គ្រាន់តែជាមនុស្សមួយក្រុមក្នុងការបញ្ចេញយោបល់តែប៉ុណ្ណោះ ហើយគ្មានសកម្មភាពស្របច្បាប់ ណាមួយសម្រាប់ទៅធ្វើការជាមួយរាជរដ្ឋាភិបាលឡើយ។ ប៉ុន្តែនៅក្នុងអណត្តរាជរដ្ឋាភិបាលថ្មីនេះ លោកបានអះអាងថា នឹងខិតខំរៀបចំឲ្យបានពីតួនាទីច្បាស់លាស់របស់អង្គការសង្គមស៊ីវិលនិមួយៗ ដើម្បីកុំឲ្យមានការយល់ច្រលំគ្នា ហើយធានាបានជាអង្គការស្របច្បាប់។
សូមបញ្ជាក់ថា បច្ចុប្បន្ននេះនៅក្នុងប្រទេសកម្ពុជាមានអង្គការសង្គមស៊ីវិលទាំងអស់ចំនួនជាង៤ពាន់អង្គភាពដែលចុះបញ្ជីនៅក្នុងក្រសួងមហាផ្ទៃ និងក្រសួងការបរទេស និងសហប្រតិបត្តិការអន្តរជាតិ ប៉ុន្តែក្នុងនោះមានតែជាង1ភាគ3ឬស្មើនឹងជាង1300អង្គភាពប៉ុណ្ណោះដែលកំពុងធ្វើសកម្មភា ដោយក្នុងមួយឆ្នាំៗក្រុមអង្គការទាំងនោះបានទទួលកញ្ចប់ថវិកាពីម្ចាស់ជំនួយបរទេសពី៥០០ទៅ៦០០លានដុល្លាអាមេរិកដើម្បីធ្វើសកម្មភាពនានាក្នុងប្រទេសកម្ពុជា៕
ដោយ៖ ភិនរ៉ា