ភ្នំពេញ៖ នៅព្រឹកថ្ងៃសុក្រទី៧ ខែមិថុនា ឆ្នាំ២០១៣ នេះ រដ្ឋសភាបានបើកកិច្ចប្រជុំវិសាមញ្ញរបស់ខ្លួនដើម្បី
អនុម័តលើសេចក្តីស្នើច្បាប់ថ្មីមួយដើម្បីដាក់ទោសលើអ្នកមិនទទួលស្គាល់ការកាប់សម្លាប់មនុស្សក្នុងរបប
កម្ពុជាប្រជាធិបតេយ្យ។
បើសេចក្តីប្រកាសព័ត៌មានចុះថ្ងៃទី៥ ខែមិថុនា ឆ្នាំ២០១៣ របស់អគ្គលេខាធិការដ្ឋានរដ្ឋសភាបានបង្ហាញពីលទ្ធផលនៃកិច្ចប្រជុំគណៈកម្មាធិការអចិន្ត្រៃយ៍រដ្ឋសភាថា បានបើកកិច្ចប្រជុំក្រោមអធិបតីភាពដ៏ខ្ពង់ខ្ពស់
សម្ដេចអគ្គមហាពញាចក្រីហេងសំរិនប្រធានរដ្ឋសភានឹងលើកយកមកពិភាក្សានិងអនុម័តលើរបៀបវារៈ
ចំនួន៦ដែលមានដូចខាងក្រោម៖
របៀបវារៈទី១-អនុម័តបញ្ចូលក្នុងរបៀបវារៈសម័យប្រជុំរដ្ឋសភាវិសាមញ្ញនីតិកាលទី៤នូវ៖
១.១-សេចក្តីស្នើច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃ
កម្ពុជាប្រជាធិបតេយ្យ។
១.២-សេចក្តីព្រាងច្បាប់ស្តីពីការអនុម័តយល់ព្រមលើពិធីសារទី២ឆ្នាំ១៩៩៩នៃអនុសញ្ញាទីក្រុងឡាអេឆ្នាំ
១៩៥៤ស្តីពីការការពារសម្បត្តិវប្បធម៌ក្នុងគ្រាមានជម្លោះប្រដាប់អាវុធ។
របៀបវារៈទី២-អនុម័តលើសំណើសុំរដ្ឋសភាកោះប្រជុំជាវិសាមញ្ញពិភាក្សាអនុម័តសេចក្តីស្នើច្បាប់ស្តីពី
ការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ។
របៀបវារៈទី៣-អនុម័តលើសំណើសុំរដ្ឋសភាកោះប្រជុំជាវិសាមញ្ញពិភាក្សាអនុម័តសេចក្តីព្រាងច្បាប់ស្តីពី
ការអនុម័តយល់ព្រមលើពិធីសារទី២ឆ្នាំ១៩៩៩នៃអនុសញ្ញាទីក្រុងឡាអេឆ្នាំ១៩៥៤ស្តីពីការការពារសម្បត្តិ
វប្បធម៌ក្នុងគ្រាមានជម្លោះប្រដាប់អាវុធ។
របៀបវារៈទី៤-អនុម័តនូវ៖
ក-របៀបវារៈសម័យប្រជុំរដ្ឋសភាវិសាមញ្ញនីតិកាលទី៤ចំនួនពីរមាន៖
ក១-របៀបវារៈទី១ការពិភាក្សានិងអនុម័តលើសេចក្តីស្នើច្បាប់ស្តីពីការប្រឆាំងការមិនទទួលស្គាល់ឧក្រិដ្ឋ
កម្មដែលប្រព្រឹត្តឡើងក្នុងរយៈកាលនៃកម្ពុជាប្រជាធិបតេយ្យ
ក២-របៀបវារៈទី២ការពិភាក្សានិងអនុម័តលើសេចក្តីព្រាងច្បាប់ស្តីពីការអនុម័តយល់ព្រមលើពិធីសារទី
២ឆ្នាំ១៩៩៩នៃអនុសញ្ញាទីក្រុងឡាអេឆ្នាំ១៩៥៤ស្តីពីការការពារសម្បត្តិវប្បធម៌ក្នុងគ្រាមានជម្លោះប្រដាប់
អាវុធ។
ខ-កាលបរិច្ឆេទបើកសម័យប្រជុំរដ្ឋសភាជាវិសាមញ្ញនីតិកាលទី៤នៅវេលាម៉ោង៨:០០នាទីព្រឹកថ្ងៃទី០៧មិថុនាឆ្នាំ២០១៣
របៀបវារៈទី៥-អនុម័តលើសមាសភាពលេខាធិការ៣រូបសម្រាប់បើកសម័យប្រជុំរដ្ឋសភាជាវិសាមញ្ញនី
តិកាលទី៤៖
១-លោកហែមខនអាយុ៦១ឆ្នាំ
២-លោកស្រីត្រឹងថាវី អាយុ៦១ឆ្នាំ
៣-លោកហ្សាការីយ៉ាអាដាមអាយុ៦១ឆ្នាំ
របៀបវារៈ៦-អនុម័តលើសំណើសុំបង្កកប្រាក់បំណាច់របស់អតីតសមាជិករដ្ឋសភាមកពីគណបក្សសមរង្ស៊ី
គណបក្សសិទ្ធិមនុស្សនិងគណបក្សនរោត្ដមរណឬទ្ធិដែលបានក្លាយជាសមាជិកគណបក្សសង្គ្រោះជាតិនិង
គណបក្សហ្វ៊ុនស៊ិនប៉ិចចំនួន២៩រូប។
សូមរម្លឹកថាសេចក្តីស្នើច្បាប់ស្តីពីការប្រឆាំងការមិនទទួលស្គាល់ឧក្រិដ្ឋកម្មដែលប្រព្រឹត្តឡើងក្នុងរយៈកាល
នៃកម្ពុជាប្រជាធិបតេយ្យមាន៥មាត្រាបានកំណត់ដាក់ទោសលើជនណាដែលមិនទទួលស្គាល់របបខ្មែរក្រ
ហមថាមានការធ្វើទារុណកម្មនិងការសម្លាប់មនុស្សជិត២លាននាក់ដោយត្រូវផ្តន្ទាទោសដាក់ពន្ធនាគារ
ពី៦ខែទៅ២ឆ្នាំនិងពិន័យជាប្រាក់ពី១លានរៀលទៅ៤លានរៀល។
សេចក្តីស្នើច្បាប់ថ្មីនោះត្រូវបានរៀបចំឡើង ដោយសមាជិករដ្ឋសភាមកពី គណបក្សប្រជាជនកម្ពុជាដែល
មានចំនួន៩០រូបក្នុងចំណោមសមាជិករដ្ឋសភាសរុប១២៣រូប។ការតាក់តែងនោះក៏ធ្វើឡើងបន្ទាប់ពីសម្តេច
នាយករដ្ឋមន្ត្រីហ៊ុនសែនបានប្រកាសអំពាវនាវឲ្យមានច្បាប់ថ្មីនោះកាលពីថ្ងៃចន្ទទី២៧ខែឧសភាឆ្នាំ២០១៣។
សេចក្តីអំពាវនាវរបស់ប្រមុខរាជរដ្ឋាភិបាលបាន ធ្វើឡើងក្រោយពីមានការអះអាងថា ប្រធានគណបក្ស
ប្រឆាំងលោក កឹម សុខា ត្រូវបានគេដកស្រង់មកចុះផ្សាយថាទួលស្លែងជាគុកសិប្បនិម្មិតរៀបចំឡើងដោយ
វៀតណាម។
យ៉ាងណាក៏ដោយតំណាងរាស្ត្រគណបក្សប្រជាជនកម្ពុជា ដែលមានសំឡេងលើសលប់ក្នុងរដ្ឋសភាបានអះ
អាងថាច្បាប់ថ្មីដែលរដ្ឋសភានឹងប្រជុំអនុម័តនៅព្រឹកថ្ងៃសុក្រ ទី៧មិថុនា ឆ្នាំ២០១៣ មិនធាក់ថយក្រោយ
ដើម្បីកាត់ទោសលើលោកកឹមសុខាឡើយ៕
ដោយ៖ ស.ស្អាត