ភ្នំពេញ៖ លោក អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានស្នើដល់​ប្រធាន​នាយកដ្ឋាន​​​​​​​​​​​​​ជំនាញទាំង៤ នៃក្រសួង​ ពិនិត្យលើមុខដំណែង​តាមនាយកដ្ឋាន​មួយចំនួន​ ដែលនៅមិន​ទាន់មានស្រ្តីជា​​​ថ្នាក់ដឹកនាំ​នោះ ពិនិត្យលើលទ្ធភាពក្នុងការស្នើសុំការ​តែងតាំងស្រ្តីធ្វើជា អគ្គនាយក ឬ អគ្គនាយករង បន្ថែម ដើម្បីឲ្យស្រ្តីមាន​​​ការ​​​​​​​​​​ចូលរួមកាន់​តែ​ច្រើន​លើការងារដឹកនាំក្នុងស្ថាប័ន។ ប៉ុន្តែត្រូវ​ជ្រើសរើសបេក្ខភាពនារី នៅក្នុងក្របខណ្ឌក្រសួង​ ដែលមានសមត្ថភាព​​គ្រប់គ្រាន់ក្នុងមុខនាទី​ជាថ្នាក់​ដឹកនាំ។ លោករដ្ឋមន្រ្តី​ថ្លែងដូច្នេះ នៅក្នុងឱកាសអញ្ជើញជា​​​អធិបតី ពិធីអបអរសាទរខួបលើកទី​១០៣ នៃទិវា​អន្តរជាតិ៨មីនា ក្រោមប្រធានបទ« សមភាពនៃការអប់រំ មានសារៈ​សំខាន់ ក្នុងកិច្ច​អភិវឌ្ឍសង្គម» ដែល​បានប្រារពឡើងនៅទីស្តីការក្រសួងការងារ និងបណ្តុះបណ្តាលវិជ្ជាជីវៈ​នៅ​ព្រឹក​ថ្ងៃទី៥ខែមីនាឆ្នាំ២០១៤​នេះ។

លោក អ៊ិត សំហេង បានមានប្រសាសន៍ថា ដើម្បីប្រែក្លាយស្មារតី​នៃទិវា៨មីនាឲ្យក្លាយជា​សកម្មភាព​ជាក់​​ស្តែង​សម្រាប់​ការលើកកម្ពស់នារី ក្នុងការចូលរួមចំណែកគាំទ្រ​យ៉ាងសកម្មលើ​ភារកិច្ចក្នុង​វិស័យ​ការងារ និងបណ្តុះ​​​​​​​​​​​បណ្តាល​​​វិជ្ជាជីវៈនេះខ្ញុំសូមស្នើឲ្យពិនិត្យលើលទ្ធភាព​នៅគ្រប់នាយកដ្ឋានចំណុះឲ្យ​ក្រសួងការងារ​​​​​និង​​​​​​បណ្តុះ​បណ្តាល​វិជ្ជាជីវៈ ចំពោះមុខដំណែងតួនាទីដែលនៅចន្លោះប្រហោង ត្រូវផ្តល់​លទ្ធភាពជូននារី​​​​​​​​​​​​​​​ដែលមាន​សមត្ថ​ភាពបានចូលរួម​ចំណែកក្នុងការកសាង និងអភិវឌ្ឍន៍សង្គម ស្របតាម​គោលនយោបាយរបស់រាជរដ្ឋាភិបាលកម្ពុជា អាណត្តិទី៥ នៃរដ្ឋសភា ។ លោករដ្ឋមន្រ្តីសង្កត់ធ្ងន់ថា ខួបលើកទី១០៣ឆ្នាំនេះ ផ្តោតជាសំខាន់ទៅលើការ​ជំរុញ​ឲ្យ​ប្រជា​​ពលរដ្ឋ​យើង​ទាំងបុរស ស្រ្តី យុវជន មានឱកាសទទួលបាន​នូវចំណេះដឹង ជំនាញបច្ចេកទេស គ្រប់ផ្នែក គ្រប់​វិស័យ ព្រមទាំងមានចិត្តគំនិត សីលធម៌ ឥរិយាបទ និងទង្វើដ៏ប្រពៃ ដើម្បី​ក្លាយជាធនធាន​មនុស្សដ៏មាន​សក្តានុ​ពល​អាចចូលរួមចំណែក ពន្លឿនកិច្ចអភិវឌ្ឍន៍​សេដ្ឋកិច្ច​សង្គម និងប្រទេសជាតិទទួលបាននូវកិត្ត​នាម កិត្តស័ព្ទល្បីល្បាញ ក្នុងនាមជា​ប្រទេស​មាន​ប្រពៃណី វប្បធម៌ អារយ្យធម៌ខ្ពស់ និងសម្បូរុងរឿង​នៅលើឆាកអន្តរជាតិ។

លោកចាប់អារម្មណ៍ថា វត្តមាននារីចូលរួមកាន់តែច្រើនគឺជាកម្លាំងចលករសំខាន់ និងមិនអាច​ខ្វះបាន ក្នុងការ​រួម​ចំណែកជំរុញនាវាកម្ពុជា ឆ្ពោះទៅរកការអភិវឌ្ឍសេដ្ឋកិច្ច និងសង្គមកិច្ច ប្រកបដោយនិរន្តរ​ភាព ស្របតាម​គោល​នយោបាយរបស់រាជរដ្ឋាភិបាល ដែលបានទទួល​ស្គាល់និងចាត់ទុកថា ស្រ្តីជាឆ្អឹង​ខ្នង​នៃការអភិវឌ្ឍសេដ្ឋកិច្ចសង្គម និងជាមូលធនដ៏សំខាន់ ក្នុងការអភិវឌ្ឍប្រទេស។ ដូចនេះទាមទារ​ឲ្យគ្រប់អង្គភាពត្រូវធ្វើការពង្រឹងសមត្ថភាពស្រ្តី នៅគ្រប់ទិដ្ឋភាពឲ្យបានពេញលេញនិងមានសមធម៌។ ជាមួយគ្នានោះដែរ លោកស្រី សួស រដ្ឋាវី អនុរដ្ឋលេខាធិការ បានរំលឹកអំពីការឈឺចាប់របស់ ស្រ្តីក្នុង​អតីតកាល ដែលមានការកេងប្រវ័ញ្ញលើកម្លាំងពលកម្ម ស្រ្តី និងកុមារ ដោយ​បង្ខំ​​​ឲ្យធ្វើ​ការ​ជាទម្ងន់ក្នុ១​ថ្ងៃពី១២ម៉ោងទៅ១៦ម៉ោង ជាថ្នូរនិងប្រាក់បៀវត្សដ៏តិចតួចបំផុត និង​មិនគិត​ពីសុខភាព។ រហូត​ដល់​មានការក្រោកឈរឡើងតស៊ូយ៉ាងប្តូផ្តាច់ ឲ្យបន្ថយម៉ោងធ្វើការ និង​តំឡើងប្រាក់បៀវត្ស​ជាច្រើនលើក​ច្រើន​សារ ព្រមទាំងបំផុសបំផុលចលនាបង្កើតជាគណៈ​លេខាអន្តរជាតិ ដើម្បីដឹកនាំចលនានារីនេះ​ទៀតផង។

លោកស្រីបានបញ្ជាក់ថា នៅឆ្នាំ១៩១០ ក៏លេចចេញនូវសន្និបាតអន្តរជាតិនារី ដែលមាន​ប្រទេសចំនួន​១៧បានចូ​ល​រួម​នៅទីក្រុងកូប៉ែនហាកនៃប្រទសដាណាម៉ាក ហើយបានសំរេច​យកថ្ងៃ៨មីនា ប្រារពទិវា​នារី​អន្តរជាតិ និងជាថ្ងៃ​សាសមគ្គីតស៊ូរបស់នារីពលករទូទាំងសកល​លោក ដើម្បីសិទ្ធិសេរីភាព ប្រជាធិបតេយ្យ ដោយភ្ជាប់នូវពាក្សស្លោក មួយថ្ងៃធ្វើការ៨ម៉ោង ធ្វើការស្មើគ្នា បៀវត្សស្មើគ្នា ការពារ​សុខភាពមាតា និង ទារក និងបានប្រតិបត្តិ​រៀងរហូត​​​មក​ដល់ពេលនេះ រួមទាំងកម្ពុជាយើងផងដែរ។ នៅក្នុងឆ្នាំ១៩៩៥ សន្និសីទនារីពិភពលោកលើកទី​៤នៅទីក្រុងប៉េកាំង បាន​លើកបន្ថែមនូវកង្វល់​១២យ៉ាងរបស់នារី ក្នុងនោះមាន ភាពក្រីក្រ ការអប់រំ អំពើហិង្សា ផលវិបាកនៃជំលោះអាវុធ នារីក្នុង​រចនាសម្ព័ន្ធនយោបាយ និងសេដ្ឋកិច្ច តួនាទីនារីក្នុងការធ្វើសេចក្តីសំរេចចិត្ត យន្តការលើកកម្ពស់ការរីក​ចំរើន​របស់នារី សិទ្ធនារីលើ​ប្រព័ន្ធផ្សព្វផ្សាយ បរិស្ថាន និងកុមារ ៕

ដោយ៖ ស.ស្អាត