កោះកុងៈ គណៈប្រតិភូក្រសួងបរិស្ថានដឹកនាំដោយលោក រដ្ឋមន្ត្រីសាយ សំអាល់ បានចុះបំពេញ​ទស្សនកិច្ច​នៅ​ខេត្តកោះកុង ដើម្បីពិនិត្យដំណើរការអនុវត្តគម្រោងអភិវឌ្ឍន៍របស់ក្រុមហ៊ុន Union Development Group Co., Ltd នៅស្រុកគីរីសាគរនិងស្រុកបុទមសាគរនៅព្រឹកថ្ងៃទី២៦ ខែកុម្ភៈ ឆ្នាំ២០១៤។ លោករដ្ឋមន្ត្រី​​បរិស្ថាន​​រូបនេះ បាន​សម្តែង​នូវការគាំទ្រនិងកោតសរសើរចំពោះកិច្ចខិតខំប្រឹងប្រែង ក្នុងការអនុវត្តគម្រោងក្នុងរយៈកាលកន្លងមក ហើយ​ឯកឧត្តមក៏បានបញ្ជាក់ថា គម្រោងនេះនឹងជួយដល់ខឿនសេដ្ឋកិច្ចរបស់ខេត្តកោះកុងទាំងមូល និងជាពិសេស​សម្រាប់​បងប្អូនប្រជាសហគមន៍ដែលរស់នៅក្នុងតំបន់អភិវឌ្ឍន៍ នេះផ្ទាល់។

ទន្ទឹមនឹងនោះ លោកក៏បានជម្រាបជូនអំពីការប្តេជ្ញារបស់រាជរដ្ឋាភិបាល ក៏ដូចជាក្រសួងបរិស្ថាន ក្នុងការបន្តដោះ​ស្រាយ​វិវាទដែលនៅសេសសល់ឱ្យបានចប់សព្វគ្រប់ តាមស្មារតីព្រមព្រៀងនិងយោគ យល់គ្នា។ ជាងនេះទៅទៀត ឯកឧត្តមបានជំរុញនិងលើកទឹកចិត្តឱ្យក្រុមហ៊ុន និងអាជ្ញាធរមូលដ្ឋាលពាក់ព័ន្ធទាំងអស់បន្តជំរុញការអនុវត្តគម្រោង អភិវឌ្ឍន៍ ដោយផ្តោតការយកចិត្តទុកដាក់ខ្ពស់លើការ រៀបចំកសាងផ្លូវ ស្ពាន សាលារៀន មណ្ឌលសុខភាព ការិយា​ល័យរដ្ឋបាល និងកំពង់ផែនៅក្នុងតំបន់អភិវឌ្ឍន៍ឱ្យបានតាមផែនការកំណត់ ជាពិសេស គឺជំរុញការកសាងផ្លូវមេ​ទៅ​កាន់​ភូមិនិងដីកសិកម្មរបស់ប្រជាពលរដ្ឋ នៅលើទីតាំងភូមិករថ្មី។

យោងតាមគេហទំព័ររបស់រដ្ឋមន្រ្តីបរិស្ថាន បានណែនាំឱ្យក្រុមហ៊ុនយកចិត្តទុកដាក់រួមចំណែកដល់ការថែរក្សា ធនធានធម្មជាតិ រួមទាំងបន្តដាំដើមឈើឡើងវិញនៅតាមតំបន់រិចរិល និងជួយកសាងភូមិជូនប្រជាពលរដ្ឋ ក្នុង​គោល​បំណងថែរក្សា ការពារ និងលើកកម្ពស់តម្លៃវប្បធម៌របស់ប្រជាជនក្នុងមូលដ្ឋាន។ គណៈប្រតិភូបានទៅទស្សនាភូមិថ្មី ការដ្ឋានសាងសង់កំពង់ផែទឹកជ្រៅ ការដ្ឋានសាងសង់ផ្សារកសិផលនិងផលនេសាទ និងសាលាឃុំតានូន។ ឆ្លៀត​ឱកាស​នោះដែរ ឯកឧត្តមរដ្ឋមន្ត្រីក៏ជួបសំណេះសំណាលនិងសួរសុខទុក្ខមន្ត្រីឧទ្យានុ រក្សនៅស្នាក់ការរកូនកុក​នៃ​ឧទ្យាន​ជាតិបុទុមសាគរ៕ 

មន្ត្រីសិទ្ធិមនុស្សនៃអង្គការលីកាដូ ប្រចាំខេត្តកោះកុង លោក គង់ ចិត្រ ថ្លែងថា រដ្ឋាភិបាលបានផ្តល់ដី សម្បទាន​សេដ្ឋ​កិច្ចទំហំ៨៦០០០ហិតកា ទៅឲ្យក្រុមហ៊ុន Union Development ក្នុងខែ ឧសភា ឆ្នាំ២០០៨ ។ ក្រុមហ៊ុននេះ បាន​អភិវឌ្ឍន៍​ជាតំបន់ពាណិជ្ជកម្ម ក្នុងស្រុកគិរីសាគរ និងបុទុមសាគរ ខេត្ត កោះកុង។ ប្រជាពលរដ្ឋចំនួន១១៤៣គ្រួសារ បានរងផលប៉ះពាល់ចំពោះគម្រោងនេះ ហើយមួយចំនួន ធំ បានទទួលយកសំណងជាផ្ទះ និងដីមួយចំនួន ពីក្រុម​ហ៊ុន។ គួររំលឹកថា កាលពីថ្ងៃទី២៣ ខែមករាកន្លងទៅ មានការដុតផ្ទះរបស់ប្រជាពលរដ្ឋចំនួន៤៥ផ្ទះ ដែលកំពុង​មានជម្លោះ។ ប្រជាពលរដ្ឋ បានចង្អុលទៅក្រុមហ៊ុន ថាជាអ្នកបង្កហេតុ ខណៈដែលក្រុមហ៊ុនប្រញាប់យកតំបន់​នោះ​អភិវឌ្ឍន៍ និងព្យាយាមបណ្តេញអ្នកដែលមិនទាន់រុះរើផ្ទះ។ ប្រជា ពល រដ្ឋចំនួន២១៩គ្រួសារ ដែលមិនព្រម​ទទួល​យក សំណងពីក្រុមហ៊ុន ចង់មានដំណោះស្រាយសមរម្យដល់ពួកគេ តាមរយៈជាដីនៅជិតតំបន់នោះ។ នៅថ្ងៃ​ទី៤​ដើមខែកុម្ភៈ ប្រជាពលរដ្ឋ បានធ្វើការបិទផ្លូវជាតិ ដើម្បីប្រឆាំងនឹងការអភិវឌ្ឍន៍របស់ក្រុមហ៊ុនផងដែរ៕

ដោយៈ ភីនរ៉ា