ភ្នំពេញ៖ មន្រ្ដីជាន់ខ្ពស់ក្រសួងយុត្តិធម៌ បានអះអាងថា ការចុះបញ្ជីកិច្ចសន្យាទ្រព្យសម្បត្តិប្ដី ប្រពន្ធ​ បានផ្ដល់​នូវ​សារៈ​​សំខាន់ណាស់ សម្រាប់ជួយការពារទ្រព្យសម្បត្តិ និងសហព័ទ្ធរៀងៗខ្លួន នៅពេល ដែលគូភាគីទាំងពីរ មានវិវាទ​​កើតឡើង ដើម្បីងាយស្រួលក្នុងការដោះស្រាយតាមផ្លូវតុលាការ ។

       ក្នុងសិក្ខាសាលាផ្សព្វផ្សាយប្រកាសស្ដីពីនីតិវិធីនៃការចុះបញ្ជីកិច្ចសន្យាទ្រព្យសម្បត្តិប្ដីប្រពន្ធ ព្រឹកថ្ងៃទី ២៤ ខែកុម្ភៈ លោក ​​សូរ ចាន់ធី អនុរដ្ឋលេខាធិការក្រសួងយុត្តិធម៌ បានមានប្រសាសន៏ថា ការផ្សព្វផ្សាយប្រកាសនេះគឺ​ដើម្បី​​បង្ហាញអំពីទំនាក់ទំនងរវាងបុគ្គល និងបុគ្គល ដែលបានរៀបចំ អាពាហ៏ពិពាហ៏ និងបុគ្គលដែលត្រូវរៀបចំ​អាពាហ៏​​ពិពាហ៏ជាមួយគ្នា ដែលមាននូវធនធានទ្រព្យសម្បត្តិ ជាចលនវត្ថុក្ដី ឬជាអចលនវត្ថុក្ដី ដើម្បីបញ្ជាក់ឲ្យបាន​ច្បាស់​​លាស់អំពីសិទ្ធទៅលើទ្រព្យសម្បត្តិនោះ ថាតើធនធាន​ទ្រព្យសម្បត្តិណាខ្លះជារបស់រួម ហើយធនធានទ្រព្យ​សម្បត្តិ​​ណា​​ខ្លះជាសិទ្ធិផ្ដាច់មុខរបស់ ភាគីណាមួយ ។

            លោកបញ្ជាក់ថា ការរៀបចំប្រកាសនេះឡើងគឺមានលក្ខណៈល្អ ដែលជាការវិវត្តន៏មួយ សម្រាប់ឲ្យប្រជា​ពល​រដ្ឋ អាចទទួលយកបាន ហើយរៀបចំនៅក្នុងក្រមរដ្ឋប្បវេណី សម្រាប់ផ្ដល់ភាព ងាយស្រួលដល់ប្រជា​ពលរដ្ឋក្នុង​ការ​ចុះបញ្ជី និងជួយការពារនូវទ្រព្យសម្បត្តិដែលគូភាគីបានរៀបការ ជាមួយគ្នា ព្រមទាំងបញ្ជាក់ឲ្យបានច្បាស់អំពីអ្វី​ដែល​​ជាទ្រព្យសម្បត្តិរួម និងអ្វីដែលជាទ្រព្យសម្បត្តិ ដោយឡែកជាមួយគ្នា ដែលនីតិវិធីនេះធ្វើឡើងសម្រាប់ការពារ​​​​នៅពេលដែលគូភាគីទាំងពីរ មានវិវាទ កើតឡើង ដើម្បីងាយស្រួលក្នុងការដោះស្រាយតាមផ្លូវតុលាការ។

            លោកបន្ដថា ប្រកាសទាក់ទិនទៅនឹងនីតិវិធីចុះបញ្ជីទ្រព្យសម្បត្ដិប្ដីប្រពន្ធគឺជាប្រកាសនីតិវិធី សម្រាប់គ្រប់​គ្រង​​លើ​ការចុះបញ្ជីកិច្ចសន្យាទាំងឡាយណាដែលបង្កើតឡើងដោយប្ដីប្រពន្ធ ទាក់ទងនឹង ទ្រព្យសម្បត្តិ ជាគោល​ការណ៏​​​​ប្រព័ន្ធ​​ទ្រព្យសម្បត្តិប្ដីប្រពន្ធ តាមច្បាប់នៃប្រទេសកម្ពុជាគឺជាប្រព័ន្ធទ្រព្យ សម្បត្តិរួមដែលអនុញ្ញាត្ដឲ្យប្ដីប្រពន្ធ​មានកម្មសិទ្ធិរួមគ្នាលើកម្មសិទ្ធិទាំងអស់ ដែលពួកគាត់ទាំងពីរធ្វើ លទ្ធកម្ម នៅក្រោយពេលអាពាហ៏ពិពាហ៏។

            លោកអនុរដ្ឋលេខាធិការចាត់ទុកថា តាមរយៈការផ្សព្វផ្សាយប្រកាសនេះ នឹងក្លាយទៅជា​ឧបករណ៏​គតិយុត្តិ យ៉ាងសំខាន់​ ដែលផ្ដល់សិទ្ធិ និងបើកឱកាសឲ្យប្ដីប្រពន្ធ ឬបុគ្គលដែលនឹង​ត្រូវ​រៀបអាពាហ៏ពិពាហ៏ជា មួយគ្នា មាន​ចំណង​ទំនាក់​ទំនង​ក្នុង​ការ​​ចុះបញ្ជី អាចធ្វើការចុះបញ្ជីអំពី​កិច្ច​សន្យាទ្រព្យសម្បត្តិប្ដីប្រពន្ធ បាន ហើយឈានទៅ​បង្កើត​ការ​​​​​ទំនាក់ទំនងរវាងបុរស និងស្ដ្រី ឲ្យមាន​ភាពច្បាស់លាស់ និងតម្លាភាព ពាក់ព័ន្ធទៅនឹងបញ្ហាទ្រព្យសម្បត្តិ និងចូលរួមចំណែក​ក្នុងការពង្រឹង​គោលការណ៏សមភាពយ៉េនឌ័រ នៅក្នុងសង្គមកម្ពុជា ។

            កញ្ញា អ៊ីសូអិ មីហា ទីប្រឹក្សាច្បាប់របស់ទីភា្នក់ងារសហប្រតិបត្តិការអន្ដរជាតិនៃប្រទេសជប៉ុន បានលើក​ឡើង​ថា ប្រកាសស្ដីពីនីតិវិធីនៃកិច្ចសន្យាទ្រព្យសម្បត្តិប្ដីប្រពន្ធនេះ ផ្ដល់នូវសារៈសំខាន់ ណាស់ សម្រាប់ការពារផល​ប្រយោជន៏​របស់ប្រជាពលរដ្ឋក្នុងការគ្រប់គ្រងទ្រព្យសម្បត្តិ ឬអចលនវត្ថុ ដែលជាទ្រព្យសម្បត្តិដោយឡែក និងរួម​របស់ប្ដី ឬប្រពន្ធ ដែលបានចុះបញ្ជីរួចហើយ ដើម្បីងាយស្រួល ក្នុងការដោះស្រាយទៅតាមផ្លូវច្បាប់ នៅពេលដែល​គូភាគីទាំងពីរមានបញ្ហា និងជម្លោះកើតឡើង។

            ជាមួយគ្នានេះ ក្រសួងយុត្តិធម៌ បានធ្វើការសិក្សាជាមួយអ្នកជំនាញការនៃអង្គការចៃកា ក្នុងការ រៀបចំ​ប្រកាស ទម្រង់គំរូចុះបញ្ជី និងពាក្យសុំ ដែលតាមរយៈការផ្សព្វផ្សាយនេះ ក្រសួងបានត្រៀមខ្លួន រួចជាស្រេចក្នុងការ​ទទួលពាក្យសុំចុះបញ្ជី កិច្ចសន្យាទ្រព្យសម្បត្តិប្ដី ប្រពន្ធ ចាប់ពីពេលនេះតទៅ ។

            សូមបញ្ជាក់ថា ក្រសួងយុត្តិធម៌ បានផ្សព្វផ្សាយប្រកាសស្ដីពីនីតិវិធីនៃការចុះបញ្ជីកិច្ចសន្យា ទ្រព្យសម្បត្តិប្ដី​ប្រពន្ធ ត្រូវបានផ្សព្វផ្សាយជាលើកដំបូង នៅក្នុងប្រទេសកម្ពុជា ដើម្បីឲ្យប្រជាពលរដ្ឋ មានការយល់ដឹង និងជ្រួត​ជា្រប​ព័ត៌មាន កាន់តែច្បាស់លាស់ទាក់ទងនឹងតម្លៃ និងអត្ថប្រយោជន៏ សម្រាប់ការពារទ្រព្យសម្បត្តិស្របច្បាប់រវាងប្ដី និងប្រពន្ធ ខណៈពេលដែលអ្នកទាំងពីរមានបញ្ហា ឬវិវាទ កើតឡើង ការលែងលះគ្នាក្នុងគ្រួសារ និងការប្ដឹងទាមទារ​ទ្រព្យសម្បត្តិពីតតីយជន នាពេលខាងមុខ៕

ដោយ៖ ស.ស្អាត