ភ្នំពេញ៖ តំបន់ចំនួន៤ ដែលមានរាជធានីភ្នំពេញ ខេត្តព្រះវិហារ មណ្ឌលគិរី និងខេត្តកោះកុង ត្រូវបាន​រាយ ការណ៍​​អំពី​​ចំនួន បទល្មើសកើនឡើងរហូតដល់ទៅ១ភាគរយ នៃចំនួនបទល្មើសសរុបដែល​បានកើត​ឡើងនៅទូ​ទាំងប្រទេស នៅក្នុងពិធី​បើក​សន្និ​បាតបូកសរុបការងារប្រចាំឆ្នាំ២០១៣ និងលើកទិសដៅការងារឆ្នាំ២០១៤នៅក្រសួង​ មហាផ្ទៃ កាលពីរសៀលថ្ងៃទី១៨ ខែកុម្ភះ ឆ្នាំ២០១៤ ឯកឧត្តម ស ខេង ឧបនាយករដ្ឋមន្ត្រី រដ្ឋ​មន្ត្រី​ក្រសួង​មហាផ្ទៃបានធ្វើការវាយតម្លៃទៅលើករណីបទល្មើសខាងលើនេះថាមានការកើនឡើងតិចតួច។

ទាក់ទងនឹងបញ្ហាបទល្មើសទូទាំងប្រទេសក្នុងឆ្នាំ២០១៣មានការកើនឡើង​១ភាគ​រយ ក្នុងឆ្នាំ២០១៣ បើ​ធៀប​នឹងឆ្នាំ២០១២ មូលហេតុនៃការកើនឡើងនេះគឺបណ្តាលមកពីសមត្ថកិច្ចបានដាក់កម្លាំង​ប្រឹងប្រែងទប់ស្កាត់​ទៅលើក្រុមបង្កភាពវឹកវរអនាធិប​តេយ្យ​ក្នុង​ប្រទេស។

បើតាមរាយការណ៍របស់អគ្គស្នងការនគរបាលជាតិនៃក្រសួងមហាផ្ទៃបានអោយដឹងថា បទល្មើសព្រហ្ម​ទណ្ឌរួមក្នុងឆ្នាំ២០​១៣ មាន​២​ពាន់​៧១៦​លើក កើន២៧លើក ធៀបឆ្នាំ២០១២មានចំនួន ២ពាន់៦៨៩លើកស្មើនឹង​១ភាគ​រយប៉ុណ្ណោះ។ កំណើន​១​ភាគ​​រយ​នេះត្រូវគេរាយការណ៍ថា បានកើតមានតែក្នុងរាជធានីភ្នំពេញ ខេត្តព្រះ​វិហារ មណ្ឌលគិរី និងខេត្តកោះកុង ​ដោយ​​ហេតុ​ផលនយោបាយ និងកំណើនចេញចូលរបស់ប្រជាពលរដ្ឋនិង អ្នកទេសចរ។

ពិធី បើកសន្នីបាតនៅថ្ងៃ​នេះ​ដែរប្រព្រឹត្តទៅ​ក្រោម​អធិបតីភាពឯកឧត្តមឧបនាយករដ្ឋមន្ត្រី ស ខេង រដ្ឋមន្ត្រីក្រសួង​មហា​ផ្ទៃ​និង​អាជ្ញាធរខេត្ត មន្ត្រីពាក់ព័ន្ធ គ្រប់ក្រសួង​ស្ថាប័នពាក់ព័ន្ធប្រមាណជាង៧០០នាក់។ ជាមួយ​គ្នានេះ ឯកឧត្តម ស ខេង បានហៅ​កំណើន​​​​បទ​​ល្មើសតិចតួចនេះ ថាជាជោគជ័យរបស់កងកម្លាំង សមត្ថកិច្ច​គ្រប់លំដាប់ក្នុងការថែរក្សា​ពង្រឹង​​សន្តិភាពស្ថិរ​ភាព សន្តិ​សុខ និងសណ្តាប់​ធ្នាប់រៀបរយ​ក្នុងសង្គម​ទាំង​មូលវិលមករកភាពប្រក្រតីវិញ។ លោកឯកឧត្តមឧបនាយករដ្ឋមន្ត្រីសខេង​ក៏​បានមានប្រសាសន៍កោកសរសើរកងកម្លាំងនគរបាលជាតិកម្លាំងសមត្ថកិច្ចនានា ពិសេសកងរាជអាវុធហត្ថ​ជាតិក្រសួង​ស្ថា​បន័​នានាអាជ្ញាធរគ្រប់ថ្នាក់ដែលបានប្រឹងប្រែងសម្រេចបាននូវសមិទ្ធផលទាំងឡាយនេះ។
ដោយ៖ អភិរក្ស