ភ្នំពេញ ៖កម្លាំងនគរបាល ការិយាល័យ ប្រឆាំងការជួញដូរមនុស្ស និងការពារអនីតិជន នៃស្នងការដ្ឋាន នគរបាល រាជធានីភ្នំពេញនៅរសៀលថ្ងៃទី១៦ ខែកុម្ភៈ ឆ្នាំ២០១៤ បានបើកប្រតិបត្តិការ តាមចាប់ខ្លួនជនសង្ស័យ៥នាក់ ក្នុង នោះ ជនជាតិចិន២នាក់ និងស្រ្តីជនជាតិខ្មែរ៣នាក់ពីបទនាំនារីក្រមុំខ្មែរ ទៅរៀបការនៅ ប្រទេសចិនខុសច្បាប់ ។

ប្រតិបត្តិការ តាមចាប់ខ្លួន មេខ្លោងជួញដូរមនុស្ស ទៅកាន់ប្រទេសចិនខាងលើនេះ បានធ្វើឡើង នៅក្នុងព្រលាន យន្តហោះ អន្តរជាតិភ្នំពេញតែម្តងខណៈដែលជនសង្ស័យទាំងនេះ កំពុងត្រៀមឡើងយន្តហោះ ដោយនាំនារីក្រមុំ ខ្មែរ២នាក់ទៅជាមួយផងនោះ ។

លោក កែវ ធា នាយការិយាល័យ ប្រឆាំងការជួញដូរមនុស្ស និងការពារអនីតិជនបានថ្លែងឲ្យដឹងថា ក្រោយពីមាន ករណីនាំនារីខ្មែរ ជាច្រើននាក់ ទៅកាន់ប្រទេសចិនដោយខុសច្បាប់រួចមក ស្នងការនគរបាល រាជធានីភ្នំពេញ លោក ឧត្តមសេនីយ៍ ជួន សុវណ្ណបានដាក់បទបញ្ជាឲ្យការិយាល័យ ជំនាញរបស់លោកដឹកនាំដោយ លោក ឧត្តម សេនីយ៍ស្នងការរងម្នាក់ ធ្វើការស្រាវជ្រាវនិងតាមចាប់ ជនសង្ស័យទាំងនេះឲ្យបាន។

លោក កែវ ធា បានបន្តទៀតថាបន្ទាប់ពីមានការស្រាវជ្រាវយ៉ាងយកចិត្តទុកដាក់និងមានការឯកភាពតាមផ្លូវច្បាប់ ពីតំណាងអយ្យការផងនោះកម្លាំងសមត្ថកិច្ចរបស់លោកកាលពីវេលាម៉ោង២និង៣០នាទីបានឃាត់ខ្លួនជន សង្ស័យ ទាំងនេះនៅព្រលានយន្តហោះអន្តរជាតិភ្នំពេញដោយមានសហការ ជាមួយកម្លាំងសមត្ថកិច្ច ព្រលាន យន្ត ហោះ ចាប់ខ្លួនបុរស ជនជាតិចិន ២នាក់ និងស្រ្តីខ្មែរ៣នាក់ក្នុងនោះ មានម្នាក់ ជាអ្នកបកប្រែ។ក្នុងនោះ​ កម្លាំងសមត្ថកិច្ច បានជួយសង្គ្រោះនារីខ្មែរ២នាក់ ផងដែរ ដែលត្រូវជនសង្ស័យទាំងនេះបម្រុងយកទៅ កាន់ប្រទេសចិន ដើម្បីលក់ ព្រហ្មចារីយ

បច្នុប្បន្ន ជនសង្ស័យទាំងនេះ ត្រូវបានឃុំខ្លួន ជាបណ្តោះអាសន្ននៅការិយាល័យ ប្រឆាំងការជួញដូរមនុស្ស និង ការពារ អនីតិជន ដើម្បីកសាងសំណុំរឿងបញ្ជូនទៅតុលាការចាត់ការតាមផ្លូវច្បាប់ ខណៈជនរងគ្រោះ​ទាំង២នាក់ ត្រូវបានសមត្ថកិច្ច ធ្វើការអប់រំ ហើយទាក់ទងទៅក្រុមគ្រួសារអោយមកទទួលពួកគេ ។សមត្ថកិច្ច មិនទាន់ បាន បញ្ជាក់អំពីអត្តសញ្ញាណជនសង្ស័យទាំងនេះ នៅឡើយទេ ខណៈកំពុងសួរនាំបន្តទៀត ពិសេសមានការ ខ្វះខាត អ្នកបកប្រែផងដែរ។កន្លងមក កម្លាំងនគរបាល នៃការិយាល័យ ប្រឆាំងការជួញដូរមនុស្សនិងការពារអនីតិជន បានឃាត់ខ្លួនជន​សង្ស័យ ជាច្រើននាក់ ទាំងខ្មែរ និងចិនជុំវិញការនាំនារីក្រមុំខ្មែរ យកទៅលក់នៅប្រទេសចិន ៕ដោយៈភីនរ៉ា