ភ្នំពេញ ៖ អង្គការជនពិការកម្ពុជា នៅព្រឹកថ្ងៃទី០៨ ខែវិច្ឆិកា ឆ្នាំ២០១៣នេះបានរៀបចំធ្វើការផ្សព្វផ្សាយផែនការយុទ្ធ សាស្រ្តរយៈពេល៥ឆ្នាំរបស់ខ្លួនចាប់ពីឆ្នាំ២០១៤ ដល់ឆ្នាំ២០១៨។ ពិធីនេះបានរៀបចំធ្វើឡើងនៅទីស្នាក់ការអង្គការ ជនពិការកម្ពុជាក្នុងវត្តនួនមណីយរាម ហៅវត្តថាន់ ក្បែរស្តុបចំការមន។
ផែនការយុទ្ធសាស្រ្តរយៈពេល៥ឆ្នាំរបស់អង្គការជនពិការកម្ពុជានោះ មានដូចជា ការបង្កើនការដាក់បញ្ចូលជនពិការ គ្រប់ប្រភេទ រួមទាំងស្រ្តីពិការផងទៅក្នុងក្រសួង និងស្ថាប័នរាជរដ្ឋាភិបាល វិស័យឯកជន ម្ចាស់ជំនួយ និងអង្គការ សង្គមស៊ីវិល។ ក្នុងនោះក៏មានការបង្កើនចំនួនអ្នកពាក់ព័ន្ធ រួមមានជនពិការគ្រប់ប្រភេទស្រ្តីពិការ ក្រុមជនជាតិភាគ តិច និសាធារណជន ឲ្យមានលទ្ធភាពទទួលបានព័ត៌មានស្តីពីពិការភាព និងយល់ដឹងពីសិទ្ធិជនពិការផងដែរ។
.jpg)
សម្រាប់នៅឆ្នាំ២០១៨ បន្ទាប់ពីអនុវត្តនូវផែនការយុទ្ធសាស្រ្តនេះ អង្គការជនពិការកម្ពុជាសង្ឃឹមថា ខ្លួននឹងក្លាយជា កម្លាំងសម្រាប់ការផ្លាស់ប្តូរសង្គម សមធម៌ និងយុត្តិធម៌ ដែលមានប្រសិទ្ធភាពសម្រាប់ជនពិការនៅក្នុងប្រទេសកម្ពុជា ដោយមានការចូលរួមគាំទ្រពីសំណាក់សម្ព័ន្ធភាព និងដៃគូដ៏រឹងមាំក្នុងការជួយអង្គការនេះ ឆ្ពោះទៅរកការសម្រេចនូវ ការបង្កើនការចូលរួមរបស់ជនពិការ និងការរស់នៅក្នុងភាពថ្លៃថ្នូរនៅក្នុងសង្គមកម្ពុជា។
សូមបញ្ជាក់ថា អង្គការជនពិការកម្ពុជានេះ ត្រូវបានបង្កើតឡើងកាលពីឆ្នាំ១៩៩៤មកម្ល៉េះដែលវាគឺជាចលនារបស់ជន ពិការកម្ពុជា ព្រមទាំងជាសមាជិកភាពនៃអង្គការមិនមែនរដ្ឋាភិបាលតំណាងឲ្យជនពិការនៅក្នុងប្រទេសកម្ពុជា ព្រម ទាំងធ្វើការដើម្បីជាសំឡេង នៃជនពិការក្នុងប្រទេសកម្ពុជា៕ ដោយ៖ សស្អាត