ភ្នំពេញ៖  យុវជន និងប្រជាជនកម្ពុជាជាច្រើនរយនាក់បាននាំគ្នាយកថ្ងៃទិវានៃក្តីស្រលាញ់ ទី១៤ កុម្ភៈ ធ្វើជាយុទ្ធនា​ការបរិច្ចាកឈាម និងទទួលឈាមពីសប្បុរសជននានា ដើម្បីជួយ​ដល់​​ជនរងគ្រោះដែលត្រូវការឈាមជា​ចាំបាច់ក្នុង​សង្គ្រោះជីវិតគឺផ្តល់ឈាមផ្តល់ក្តី​ស្រលាញ់។លោក សេង ម៉ារឌី តំណាងអង្គការសុខភាពពិភពលោក (WHO ) បាន​ថ្លែង​នៅក្នុងយុទ្ធនា​ការបរិច្ចាកឈាមនៅមជ្ឈមណ្ឌលជាតិផ្តល់ឈាមថា ឈាមរបស់អ្នក ពិតជាមានសារៈ​សំខាន់​ណាស់ ដើម្បីជួយសង្រ្គោះជិវិតជនរងគ្រោះ។ ខ្ញុំសូមកោតសរសើរដ៏ស្មោះស្ម័គ្រ ចំពោះ ចំពោះយុវជន ប្រជាជន​កម្ពុជា និងមជ្ឈមណ្ឌលជាតិផ្តល់ឈាម ក្នុងការរៀបចំយុទ្ធនាការនេះ​ឡើង ក្នុងប្រធានបទដ៏មានអត្ថន័យ (ផ្តល់ឈាម ផ្តល់សេចក្តីស្រឡាញ់) ដើម្បីដាក់ការបរិច្ចាគ​ឈាម ដោយស្ម័គ្រចិត្ត និងមិនគិតថ្លៃនៅក្នុងទិវា នៃសេចក្តីស្រឡាញ់​នាថ្ងៃនេះ។

លោកសុំឲ្យថ្ងៃនេះក្លាយជាវប្បធម៌ដ៏ល្អបំផុតតរៀងទៅ ឆ្លើយតបទៅនឹងអត្រាបរិច្ចាគឈាម នៅកម្ពុជា នៅមាន​កម្រិត ដែលអនុសាសន៍របស់អង្គការសុខភាពពិភពលោកតម្រូវឲ្យបាន ១ភាគរយ នៃចំណុះប្រជាជនសរុប ប៉ុន្តែ​សមាមាត្រ ការបរិច្ចាគឈាមដោយស្ម័គ្រចិត្ត សរុប បានត្រឹមតែ ៣៥%ប៉ុណ្ណោះ នៅក្នុង ឆ្នាំ២០១៣​កន្លងទៅ ។លោក វេជ្ជ.ហុក គឹមចេង ប្រធានមជ្ឈមណ្ឌលជាតិផ្តល់ឈាម បានមានប្រសាសន៍ថា​សកម្មភាពរបស់យុវជននាថ្ងៃនេះ​​ពិត​ជា​វិសេសវិសាលខ្លាំងណាស់ក្នុងការជួយសង្គម លោក​ថាយុវជនកម្ពុជាកំពុងដើរលើផ្លូវត្រូវក្នុងការជួយ​ជួយគ្នាក្នុង​សង្គម ទាំងសក្មកភាពគាំទ្រ និងសកម្ម​ភាពចូលរួមរបស់ពួកគេឃើញស្របគ្នាតែម្តង។ លោករំពឹងថា នៅថ្ងៃនេះនឹង​ផ្តល់​​ឈាមមិនតិចជាង៤០០ផ្លោក ហើយបើលើសពីនេះក៏មជ្ឈមណ្ឌលមានលទ្ធភាពអាច​ទទួល​បានដែរ។

លោកប្រធានបញ្ជាក់ថា ជាមធ្យមក្នុងមួយថ្ងៃៗយើងត្រូវការឈាមពី៨០ទៅ១០០ផ្លោកនៅតា​ម​មន្ទីពេទ្យនានា​ក្នុងរាជ​ធានីភ្នំពេញនិង១៥០ផ្លោកនៅទូទាំងប្រទេស ដូច្នេះជារៀងរាល់ថ្ងៃដែល​ក្នុង១ម៉ោងៗមានឈាមប្រមាណ​ជា៧ផ្លោក​ដែលត្រូវការផ្តល់ទៅដល់អ្នកជំងឺទាំងអស់។ រហូត មកដល់ថ្ងៃនេះមជ្ឈមណ្ឌលជាតិផ្តល់ឈាម មានឈាមគ្រប់​គ្រាន់​ក្នុង​​​ការជួយសង្រ្គោះជីវិត​មនុស្ស។លោកស្រី ឡាវ ខេង អនុប្រធានទី១ កាកបាទក្រហមកម្ពុជា សាខារាជធានីភ្នំពេញ មាន​ប្រសាសន៍ថា ថ្ងៃនេះគឺជាថ្ងៃផ្តល់នៃសេចក្តីស្រឡាញ់ ជាទិវាមួយ ដែលពិភពលោក​គោរព​ទាំងអស់គ្នា រំលឹក​អនុស្សាវរីយ៍​​​​​​ចំពោះ អ្នកដែលយើងស្រឡាញ់ ដែលគេច្រើនប្រើជា​ថ្ងៃ​បុណ្យសង្សារ។ ប៉ុន្តែប្រទេសកម្ពុជា យើងបាន​យក​​ថ្ងៃនេះ ចូលរួមជាមួយ យុវជន ប្រជាជន​ទាំងអស់គ្នា ដោយការផ្តល់សេចក្តីស្រឡាញ់ តាមរយៈការផ្តល់ឈាម​របស់​យើងទាំងអស់​គ្នាឲ្យទៅអ្នកដែលត្រូវការឈាមជួយជីវិតមនុស្ស។

លោកស្រីបន្តថា ថ្ងៃនេះគឺជាកិត្តិយសណាស់ សម្រាប់យុវជន និងប្រជាជនកម្ពុជា ដែល​មាន​ឆន្ទៈដ៏មុះមុត ដើម្បី​ផ្លាស់​​ប្តូរនូវបរិបទចាស់ ដែលធ្លាប់មានសម្រាប់យុវជនពីមុនមក នៅលើ​ថ្ងៃនេះ ដែលគេហៅថា ថ្ងៃបុណ្យសង្សារ ពួក​គេ​​តែងតែនាំគ្នាទៅដើរលេង នាំគ្នាទៅប្រព្រឹត្តអ្វីៗ ប្រាកចាកពីសីលធម៌ និងប្រពៃណី ហើយបានងាកមកធ្វើកិច្ចការ​មនុស្សធម៌ ដើម្បីមនុស្ស និង សង្គម ។សូមបញ្ជាក់ថា កម្មវិធីបរិច្ចាគឈាមដោយស្ម័គ្រចិត និងមិនគិតកម្រៃនាថ្ងៃនេះ គឺមានការ​ឧបត្ថម្ភពី​សប្បុរសជននានា មានក្រុម​ហ៊ុនកូកាកូឡា, ក្រុមហ៊ុនទូរស័ព្ទLG ទឹកបរិសុទ្ធវីតាល់ និងអង្គការដៃ​គូរ​​​ពាក់ព័ន្ធជាច្រើន​ទៀត៕

ដោយ៖ ស.ស្អាត