ភ្នំពេញ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាននិងជាអ្នកនាំពាក្យរាជរដ្ឋាភិបាលកម្ពុជា បានមានប្រសាសន៍នៅថ្ងៃទី១១ ខែធ្នូ ឆ្នាំ២០១៣នេះថា កម្ពុជាមានទំនាក់ទំនងល្អជាមួយថៃ គឺទាំងសង្ខាងទាំងភាគីយោធានិងស៊ីវិលគឺរក្សាទំនាក់ទំនគ្នាបានល្អជាធម្មតា។ចំណែកឯគម្រោងចរចាជាមួយរដ្ឋាភិបាលថៃ ដើម្បីអនុវត្តសាលក្រមតុលាការយុត្តិធម៌ នៅពេលនេះ ត្រូវបានពន្យាពេលដោយត្រូវរង់ចាំពេលរាជរដ្ឋាភិបាលថៃមានភាពនឹងនឡើងវិញ ទើបជជែកគ្នា ប៉ុន្តែអ្វីដែលសំខាន់បំផុតត្រូវរក្សាស្ថានភាពឲ្យបានល្អសិននៅពេលនេះ។ទាក់ទិននិងការលើកឡើងរបស់ លោក សម រង្ស៊ី ប្រធានគណបក្សសង្គ្រោះជាតិ ដែលបានទាមទារឲ្យមានការបោះឆ្នោតឡើងវិញ និងទាមទារឲ្យនាយករដ្ឋមន្ត្រីអាណត្តិទី៥ គឺ សម្តេច តេជោ ហ៊ុន សែន ចុះចេញពីតំណែងនោះ ត្រូវបានលោក ខៀវ កាញារីទ្ធ តបទៅវិញយ៉ាងដូច្នេះថា មេដឹកនាំគណបក្សសង្រ្គោះជាតិរូបនេះតែងតែនិយាយថា ការបោះឆ្នោតមាន ភាពមិនប្រក្រតីយ៉ាងធ្ងន់ធ្ងរ តែមកដល់ឥឡូវនេះគណបក្សប្រឆាំងរកភាពប្រក្រតីធ្ងន់ធ្ងរអត់ទាន់ឃើញទេដើម្បីបង្ហាញភស្តុតាងដល់មហាជន ចេះតែត្រឹមស្រែកមិនប្រករតីៗ។
លោក ខៀវ កាញ្ញារីទ្ធ បញ្ជាក់ថា យើងឃើញហើយការទៅរាប់សន្លឹកឆ្នោតនៅកន្លែងណា អត់មានប្រែប្រួលទេ អ៊ីចឹងគាត់បានពាក្យធ្ងន់ធ្ងរហ្នឹងមួយគាត់យកមកស្រែករហូត ហើយអ្វីដែលចំឡែកជាងនេះទៀតនោះគឺអ្នកចាញ់ឆ្នោតទាមទារឲ្យអ្នកឈ្នះឆ្នោតចុះពីតំណែង។លោករដ្ឋមន្រ្តីបន្តថា នៅប្រទេសថៃបានរំលាយសភា ដើម្បីរៀបចំការបោះឆ្នោតម្តងទៀតហើយរដ្ឋាភិបាលលោកស្រី យីង ឡាក់ ក៏បានក្លាយទៅជារដ្ឋាភិបាលចាំផ្ទះ ស្ថានភាពបាតុកម្មក្នុងប្រទេសថៃនៅតែបន្តទាក់ទងនឹងបញ្ហានយោបាយនៅប្រទេសថៃ ។ លោក ខៀវ កាញារីទ្ធ បានបន្ថែមថា ចំពោះស្ថានភាពនយោបាយនៅកម្ពុជានឹងនជាងនៅប្រទេសថៃ ដោយសារប្រជាពលរដ្ឋកម្ពុជា មានភាពចាស់ខាងនយោបាយទុំច្រើន ហើយជាផ្លូវច្បាប់ យើងមានគ្រប់គ្រាន់ ។ រាជរដ្ឋាភិបាលនេះ មានភាពស្របច្បាប់គ្រប់គ្រាន់មានទាំងគណៈប្រតិភូធំៗមកទស្សនកិច្ចផ្លូវការនៅកម្ពុជា ហើយមានទាំងការអញ្ជើញ សម្តេច តេជោ ហ៊ុន សែនទៅទស្សនកិច្ចនៅប្រទេសជាច្រើនក្នុងតំបន់និងសកលលោក ។ និយាយរួមប្រទេសភាគច្រើន ពុំបានខ្វល់ខ្វាយនឹងព្រួយបារម្មណ៍ពីការតវ៉ារបស់គណបក្សប្រឆាំងនោះទេ។ ព្រោះថានៅគ្រប់ការិយាល័យបោះឆ្នោតទាំងអស់សុទ្ធតែមានការចុះហត្ថលេខាទទួលស្គាល់ ពីសំណាក់មន្ត្រី តំណាងគណបក្សនយោបាយ ហើយការបោះឆ្នោតនៅកម្ពុជាបានប្រព្រឹត្តទៅដោយមានភាពធម្មតា គ្មានអំពើហិង្សា ដូច្នេះគណបក្សប្រឆាំងប្រើតែពាក្សមិនប្រក្រតីធ្ងន់ធ្ងរ តែគណបក្ស នោះពុំមានភស្តុតាងបង្ហាញនូវអ្វីដែលជាភាពធ្ងន់ធ្ងរនោះ។លោករដ្ឋមន្រ្តីសង្កត់ធ្ងន់ថា កន្លងមក ក៏ដូចជាពេលនេះមេដឹកនាំគណបក្សប្រឆាំងគ្មានចំណុចអ្វីធ្វើឲ្យរដ្ឋាភិបាលស្របច្បាប់ដែលកើតពីការបោះឆ្នោត និងមានការទទួលស្គាល់ពីបណ្តារប្រទេសជាច្រើននៅក្នុងតំបន់ និងពិភពលោក ឲ្យចុះចេញពីតំណែងនោះឡើយ៕ ដោយ ៖ ស.ស្អាត