ភ្នំពេញ៖ យុវជនចម្រុះជាតិសាសន៍ប្រមាណជាង២០០០នាក់ មកពីតាមគ្រឹះស្ថានសិក្សា រដ្ឋនិងឯកជនទូទាំងរាជ ធានីភ្នំពេញ រួមទាំងនិស្សិតមកពីសាធារណរដ្ឋកូរ៉េ រុស្សី ម៉ាឡេស៊ីនិងមកពីបណ្តាប្រទេសអឺរ៉ុបមួយចំនួនទៀតបាន មកជួបជុំបោះជំរំអន្តរជាតិឆ្នាំ២០១៤នៅវិទ្យាស្ថានបច្ចេកវិទ្យាកម្ពុជា(តិចណូ) ថ្ងៃទី១០ ខែកុម្ភៈ ឆ្នាំ២០១៤នេះ ក្រោមការរៀបចំរបស់ អង្គការសម្ព័ន្ធយុវជនអន្តរជាតិ នៃសាធារណរដ្ឋកូរ៉េ សហការជាមួយនាយកដ្ឋានគ្រប់គ្រងមជ្ឈមណ្ឌលយុវជន អគ្គនាយកដ្ឋានយុវជន នៃក្រសួងអប់រំ យុវជន និងកីឡា។
លោកបណ្ឌិ្តត ប៉ាក អ៊ុកស៊ូ ប្រធានស្ថាបនិក អង្គការសម្ព័ន្ធយុវជនអន្តរជាតិ នៃសាធារណរដ្ឋកូរ៉េបាន មានប្រសាសន៍ នៅក្នុងឱកាសបើកជាផ្លូវការនូវការបោះជំរំអន្តរជាតិឆ្នាំ២០១៤ ក្រោមប្រធានបទ «យុវជន និងភាពជាអ្នកដឹកនាំ» នា រាត្រីថ្ងៃទី១០ ខែកុម្ភៈ ឆ្នាំ២០១៤ នៅវិទ្យាស្ថានបច្ចេកវិទ្យាកម្ពុជាថា នេះជាលើកទី៤ ដែលបានរៀបចំកម្មវិធីបោះជំរំ អន្តរជាតិនៅកម្ពុជា ក្នុងគោលបំណងលើកកម្ពស់នៃការចូលរួមរបស់យុវជន ក្នុងភាពជាអ្នកដឹកនាំ ដើម្បីកសាងនូវ លក្ខណៈសម្បត្តិរបស់យុវជនឲ្យកាន់តែល្អប្រសើរឡើងថែមទៀត សំដៅប្រែក្លាយពួកគេឲ្យទៅជាយុវជនគំរូ ក្នុងការ ធ្វើសេចក្តីសម្រេចចិត្ត ដ៏ត្រឹមត្រូវសម្រាប់អនាគតរបស់ខ្លួននិងសង្គម។
លោក គឹម ហាន់ស៊ូ ឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជាបានមានប្រសាសន៍ថាចំពោះការជួបជុំបោះជំរំ អន្តរជាតិលើកទី៤ឆ្នាំ២០១៤នេះ ដែលមាន សិស្ស និស្សិត មកចូលរួមដ៏ច្រើនកុះករ។មន្ត្រីការទូតរូបនេះបន្តថាបើ ទោះបីប្រវត្តិសាស្ត្រពីបុរាណ្យកាលប្រទេសកូរ៉េ និងប្រទេសកម្ពុជាពុំមានទំនាក់ទំនងនឹងគ្នាអ្វីជាយូរលុងក៏ដោយ។ ក៏ទំនាក់ទំនងដែលចាប់ផ្តើមថ្មីនេះមានកិច្ចសហប្រតិបត្តិការយ៉ងល្អជាមួយគ្នាដែរ។ ហើយមកដល់ពេលនេះ ប្រជា ពល រដ្ឋកូរ៉េមានការរាប់អានពិតៗជាមួយប្រជាជនកម្ពុជា។ ទំនាក់ទំនងវប្បធម៌ប្រពៃណីរវាងប្រទេសកូរ៉េ និងកម្ពុជា មានលក្ខណៈស្រដៀងៗគ្នា និងមានប្រវត្តិសាស្ត្រឈឺចាប់ដូចគ្នាដែរ។
ថ្វីបើប្រទេសកូរ៉េមិនជាធំប៉ុន្មាន ប៉ុន្តែប្រទេសកូរ៉េមានចិត្តជួយឧបត្ថម្ភដល់ប្រទេសកម្ពុជាជានិច្ច ពិសេស លើវិស័យ អប់រំ ពីព្រោះការអប់រំនេះនឹងបង្កើតឲ្យមានធនធានមនុស្សដ៏សំខាន់សម្រាប់ការអភិវឌ្ឍន៍ប្រទេស។ក្រៅពីនេះ ប្រជាជន កូរ៉េ តាមរយៈអង្គការក្រៅរដ្ឋាភិបាលជាច្រើននៅកម្ពុជា បាននិងកំពុងធ្វើការសហការជួយ លើវិស័យទឹកស្អាត ជីកអណ្តូងទឹក សាងសង់សាលារៀន និងមណ្ឌលសុខភាពជូនដល់ប្រជាជនកម្ពុជាផងដែរ។
ការបោះជំរំអន្តរជាតិឆ្នាំ២០១៤ នាពេលនេះពិតជាមានសារសំខាន់ណាស់ ក្នុងការរួមចំណែកជួយលើក កម្ពស់ ភាព ជាអ្នកដឹកនាំ ដល់យុវជន ធ្វើឲ្យប្រទេសកម្ពុជាមានការរីកចម្រើនខ្លាំងឡើងថែមទៀតនាពេលខាងមុខ។
លោក ស៊ាន បូរ៉ាត រដ្ឋលេខាធិការក្រសួងអប់រំ យុវជន និងកីឡា ថ្លែងថា ការបោះជំរំអន្តរជាតិនេះ គឺជាព្រឹត្តិការណ៍ដ៏មានសារសំខាន់មួយថ្មីទៀត សម្រាប់យុវជនកម្ពុជា ព្រោះថាប្រធានបទដែលបានដាក់ចេញនេះ គឺផ្តល់ឱកាសដល់យុវជនក្នុងការលើកកម្ពស់តួនាទីរបស់ខ្លួនក៏ដូចជាការងារសង្គម ។ក្នុងស្មារតីនេះដើម្បីអភិវឌ្ឍន៍ភាពជាអ្នកដឹកនាំប្រកបដោយប្រសិទ្ធភាពនោះ ដំបូងឡើយយុវជនត្រូវស្គាល់ខ្លួនឯងឲ្យបានច្បាស់ថា ខ្លួនឯងជាអ្នកណា? មកពីណា? កំពុងធ្វើអ្វី? ហើយធ្វើដើម្បីអ្វី ជាមុនសិន ទើបអាចសម្រេចគោលដៅរបស់ខ្លួនបាន។
លោករដ្ឋលេខាធិការបញ្ចាក់ថក្រោមការដឹកនាំប្រកបដោយគតិបណ្ឌិតដ៏ខ្ពង់ខ្ពស់ និងគុណធម៌ដ៏ថ្លៃថ្លារបស់សម្តេចតេជោ ហ៊ុន សែន ក៏បានធ្វើឲ្យសង្គមជាតិ មានកិត្យានុភាពល្បីល្បាញទាំងក្នុងកម្រិតជាតិ កម្រិតតំបន់ និងពិភពលោក។ រាជរដ្ឋាភិបាលកម្ពុជានីតិកាលទី៥នេះ មានឆន្ទៈដ៏មោះមុត និងការអនុវត្តដ៏ត្រឹមត្រូវ ក្នុងគោលដៅជាសារវ័ន្ត ដើម្បីបន្តបំពេញនូវបេសកកម្មជាប្រវត្តិសាស្ត្រក្នុងការបំរើជាតិមាតុភូមិ និងប្រជាជន ពោលគឺបានប្រែក្លាយប្រទេសកម្ពុជា ឲ្យក្លាយទៅជាទឹកដីដ៏ពិសិដ្ឋប្រកបដោយសុខសន្តិភាព និងវិបុលភាព ព្រមជាមួយនិងការអភិវឌ្ឍដ៏រស់រវើកលើគ្រប់វិស័យចាប់ទាំងពីទីក្រុង ដល់ជនបទទូទាំងប្រទេស។
ទន្ទឹមនឹងនេះរាជរដ្ឋាភិបាលបានដើរតួនាទីយ៉ាងសំខាន់ក្នុងការផ្តល់នូវសេចក្តីសង្ឃឹមគ្រប់បែបយ៉ាងដល់ប្រជាជន ក្នុងនោះការលើកម្ពស់កម្រិតជីវភាពរស់នៅ ជាប្រចាំ តាមរយៈយន្តការដែលបានដាក់ចេញ នៅក្នុងកម្មវិធីនយោបាយ និងយុទ្ធសាស្ត្រចតុកោណរបស់រាជរដ្ឋាភិបាល ។
លោកបន្តថា យុវជនជាកម្លាំងចលករសម្រាប់បន្តការកសាង ការការពារ និងអភិវឌ្ឍប្រទេស ដូច្នេះរាជរដ្ឋាភិបាលបានយកចិត្តទុកដាក់ខ្ពស់ បន្តការការពារសន្តិសុខ សុវត្ថិភាព និងយុត្តិធម៌ដល់យុវជន ដោយបញ្ចូលតម្រូវការរបស់យុវជនទៅក្នុផែនការអភិវឌ្ឍគ្រប់កម្រិត ពិសេសពង្រីកការបណ្តុះបណ្តាលភាពជាអ្នកដឹកនាំ និងជំរុញការអនុវត្តជាជំហានៗនូវទិសដៅយុវភាវូបនីយកម្ម ក្នុងការផ្តល់ការទទួលខុសត្រូវនូវគ្រប់លំដាប់ថ្នាក់ដល់យុវជន ដើម្បីឲ្យពួកគេកាន់តែពង្រឹងនិងពង្រីកបាននូវឱកាស និងសមត្ថភាពរបស់ខ្លួននៅក្នុងការអភិវឌ្ឍប្រទេសជាតិប្រកបដោយចីរភាព។
លោក ហ៊ុន ម៉ានី ប្រធានសហភាព សហព័ន្ធយុវជនកម្ពុជា មានប្រសាសន៍ថា ការកសាងនិងការពង្រីកសមត្ថភាពកភាពជាអ្នកដឹកនាំគឺជាកត្តាដ៏ចាំបាច់បំផុតសម្រាប់យើងទាំងអស់គ្នាជាយុវជនព្រោះថាបើយើងមានទេពកោសល្យ និងមានមនសិការនៃភាពជាអ្នកដឹកនាំ យើងពិតជាមានជំនឿលើខ្លួនឯង ហើយនឹងអាចឈានទៅសម្រេចបាននូវភាពជោគជ័យលើកិច្ចការធំៗ ដែលជាភារកិច្ចរបស់យុវជនក្នុងការទទួលខុសត្រូវយ៉ាងពិតប្រាកដ ហើយយុវជនត្រូវមើលឲ្យបានគ្រប់ជ្រុងជ្រោយមុននឹងសម្រេចចិត្តលើការងារអ្វីមួយ ព្រោះយុវជនជាសរសរទ្រូងនៃប្រទេសជាតិ។
ផ្ទុយទៅវិញបើជំនឿទុកចិត្តលើខ្លួនឯងត្រូវបានបាត់បង់ដោយសារកត្តាផ្សេងៗ ឬក៏អសមត្ថភាពក្នុងភាពជាអ្នកដឹកនាំនោះ ការបរាជ័យរបស់យើងនឹងក្លាយទៅជាស្រមោលឋិតនៅចំពោះមុខយើងជានិច្ច ហើយភាពអស់សង្ឃឹម និងបញ្ហាប្រឈមនានា ពិតជានឹងកើតមានឡើងនៅក្នុងជីវភាពការងារ ក៏ដូចជាការរស់នៅជាក់ជាមិនខាន។
ដូច្នេះលើមូលដ្ឋាននេះ ទន្ទឹមនឹងការសិក្សានៅក្នុងសាលារៀន យុវជនគប្បីផ្សាភ្ជាប់ខ្លួនទៅនិងការសិក្សាស្រាវជ្រាវលើគ្រប់ទិដ្ឋភាពរបស់សង្គម ហើយត្រូវការសម្របសម្រួលនិងពិចារណាឲ្យបានត្រឹមត្រូវ ពោលគួរប្រើប្រាស់នូវគតិបណ្ឌិតជាមូលដ្ឋាន ក្នុងការវិនិច្ឆ័យបញ្ហាអ្វីមួយ ដែលយើងបានចាត់ទុកថាជាបញ្ហាសំខាន់។
ក្រៅពីនេះយុវជនត្រូវចេះគោរពប្រណិប័តន៍ចំពោះឪពុកម្តាយ អ្នកមានគុណ ចាស់ព្រឹទ្ធាចារ្យ និងចេះរៀបចំខ្លួនឲ្យបានស្អាតស្អំ ដោយប្រព្រឹត្តិតែអំពើល្អ មិនបៀតបៀនអ្នកដ៏ទៃ និងអប់រំផ្លូវចិត្តឲ្យបានល្អបរិសុទ្ធ ប្រកបដោយមនសិការស្នេហាជាតិ និងប្រជាជន។
សូមបញ្ជាក់ថា កម្មវិធីបោះជុំរុំឆ្នាំនេះ មានរបាំវប្បធម៌នៃព្រះរាជាណាចក្រកម្ពុជា និងរបាំវប្បធម៌នៃបណ្តាប្រទេសចូលរួម ដែលសម្តែងដោយ សិស្ស និស្សិតខ្មែរ និងបរទេស។ ក្រុមតន្ត្រីលំដាប់ពិភពលោកក៏ត្រូវបានអញ្ជើញមកប្រគុំតូរ្យតន្ត្រី ដើម្បីទទួលស្វាគមន៍និស្សិត ដែលចូលរួមក្នុងកម្មវិធីការបោះជំរំអន្តរជាតិលើកទី៤ឆ្នាំ២០១៤នេះផងដែរ៕ ដោយ៖ សស្អាត