ភ្នំពេញ៖ កុមារមានជម្ងឺ បេះដូងប្រហោង ចំនួន៣០នាក់ ទទួលបានការវះកាត់ ដោយឥត​​គិត​ថ្លៃ នៅ​មន្ទីរពេទ្យកាល់ម៉ែត្រ នៅថ្ងៃនេះ។ ថវិកានៃ ការវះកាត់នេះ ទទួលបាន ពីស​មា​​ជិកចលនាយុវជនកម្ពុជា ក្រុម១៥៧ និងសប្បុរសជន​នានា។ថវិកាជិត ៦ម៉ឺនដុល្លារ អាមេរិក ត្រូវបាន លោក ម៉ឹង ពន្លក ប្រធានចលនា យុវជនកម្ពុជា ក្រុម១៥៧ ប្រគល់អោយ លោក Peter Chhun ប្រធានអង្គការបេះដូង គ្មានព្រំដែន សម្រា​ប់ យកទៅជួយ សង្គ្រោះកុមារកម្ពុជា ដែលខ្វះ លទ្ធភាព ក្នុងការព្យាបាល ជម្ងឺ បេះដូង ប្រហោង។

លោក ម៉ឹង ពន្លក បានអោយដឹងថា ថវិកាទាំងនោះ នឹងត្រូវយកទៅរួមចំណែក ជួយដ​ល់​​កុមារ មានជម្ងឺ បេះដូងប្រហោង ចំនួន​៣០​នាក់ នៅពេលនេះ ហើយកន្លងមក ចល​នាយុវជនកម្ពុជា ក្រុម១៥៧ ក៏បានជួយវះកាត់កុមារ មានជម្ងឺបេះដូង ប្រហោង នៅខេត្តសៀមរាប បានចំនួន១៤នាក់ រួចមកហើយដែរ។

បើតាមការ អោយដឹងពី លោក Peter Chhun ប្រធានអង្គការបេះដូង គ្មានព្រំដែន ក្នុងរយៈ ពេ​ល​៧ ឆ្នាំនេះ ក្មេងចំនួន១៣៤នាក់ បានទទួលការវះកាត់ ហើយ៤នាក់ ត្រូវបានបញ្ជូ​ន​ទៅ វះកាត់ នៅអាម៉េរិក ដោយសារតែស្ថានភាពជម្ងឺ ធ្ងន់ធ្ងរជាងគេ។ចំពោះក្មេង​ដែលបញ្ជូនទៅវះកាត់ នៅក្រៅប្រទេសនោះ លោក Peter Chhun បានប្រាប់ថា គ្រូពេ​ទ្យ យើងមានសមត្ថភាពដែរ ប៉ុន្តែខ្វះ​សម្ភារៈ​​​។

លោក ឈាង រ៉ា ប្រធានមន្ទីរពេទ្យកាល់ម៉ែត្រ បានមានប្រសាសន៍ថា មជ្ឈមណ្ឌលព្យា​បា​លជម្ងឺ បេះដូងនៃមន្ទីរពេទ្យ កាល់ម៉ែត្រ គឺជាកន្លែងមួយ ដែលផ្តល់សេវា ព្យាបាលនិ​ង​​​វះកាត់ជម្ងឺ បេះដូងដល់កុមារ។គួរបញ្ជាក់ថា ក្នុងមួយថ្ងៃៗ មានអ្នកពិគ្រោះជម្ងឺ ប្រមាណ​១០០នាក់ នៅមន្ទីរពេទ្យកាល់ម៉ែត្រ ហើយក្នុងរយៈពេល១ខែ កុមារមាន ជម្ងឺបេះដូង ប្រហោង ប្រហែលពី២០ ទៅ ៣០នាក់ ​អាចទទួលបាន សេវាវះកាត់នេះ៕ ដោយ ៖ រតនា