ភ្នំពេញៈ រាជរដ្ឋាភិបាលកម្ពុជាចាប់ផ្តើមពិភាក្សាពីដំណើរការបើកឲ្យមានការសុំកូនទៅក្រៅប្រទេសឡើង វិញ បន្ទាប់ពីផ្អាក់មួយរយៈក្នុងការរៀបចំយន្តការការពារឲ្យបានច្បាស់លាស់ក្នុងការធានាឲ្យកុមារ ដែលត្រូវបានគេយកចិញ្ចឹមនោះមានសុវត្ថិភាពស្ថិតក្នុងរង្វង់ច្បាប់និងគ្មានការរំលោភបំពានជាដើម។នៅព្រឹកថ្ងៃទី ២៦ កុម្ភៈ ក្រសួងសង្គមកិច្ចអតីតយុវជន និងយុវនិតិសម្បទាបានបង្ហាញលិខិតបទ ដ្ឋានគតិយុត្តថ្មីៗនៃការសុំកូនទៅក្រៅប្រទេសដល់ស្ថានទូត ភ្នាក់ងារ និងអាជ្ញាធរពាក់ពន្ធ័ ខណៈដែរកម្ពុជានឹងបើកឲ្យមានដំណើរការសុំកូនទៅក្រៅប្រទេសឡើងវិញនាពេលឆាប់ៗនេះ។
លោក វង សូត រដ្ឋមន្រ្តីក្រសួងសង្គមកិច្ចអតីតយុវជននិងយុវនីតិសម្បទាមានប្រសាសន៍ថាការដាក់ពាក្យស្មុំកូនទៅក្រៅប្រទេសលែងពន្យាពេលទៀតហើយ ដោយកម្ពុជាមានច្បាប់ លិខិតបទដ្ឋានគតិយុត្តិ និងនីតិវិធីថ្មីៗដែលធានាឲ្យឧត្តមប្រយោជន៍របស់កុមារដែលត្រូវគេយកទៅចិញ្ចឹមក្នុងនោះមាន សុវត្ថិភាពពេញលេញ និងគ្មានការកេងប្រវញ្ច័គ្រប់រូបភាព។លោករដ្ឋមន្រ្តី បានបញ្ជាក់ថា ការផ្សព្វផ្សាយលិខិតបទដ្ឋានទាំងនេះពិតជាមានសារៈសំខាន់ខ្លាំងណាស់ដើម្បីជាសារដ៏សំខាន់សម្រាប់ចែករំលែកព័ត៌មានដល់អង្គការជាតិ អន្តរជាតិ និងបណ្តាប្រទេសនានាដែលមានបំណងធ្វើប្រតិបត្តិការស្មុំកូនជាមួយកម្ពុជា ដើម្បីធ្វើឲ្យដំណើរការស្មុំកូននេះកាន់តែមានលក្ខណៈល្អប្រសើរ។
ហើយការសុំកូនទៅចិញ្ចឹមនេះ មិនមែនជាការលក់កូននោះទេ ព្រោះតែមានអ្នកខ្លះគ្មានកូន ហើយរដ្ឋាភិបាលត្រូវគិតដល់អនាគតក្មេង។ កុមារគឺជា អនាគតប្រទេសជាតិ ជាកម្លាំងកសាងប្រទេសជាតិនៅថ្ងៃអនាគត ព្រោះពេលកុមារធំឡើង អាចនឹងត្រឡប់មកស្រុកទេសវិញដោយចូលខ្លួនមកបំរើនៅក្នុងអង្គការនានា ព្រោះកន្លងទៅធ្លាប់មានរួចទៅហើយ។ទោះជាយ៉ាងនេះក្តី លោកបានសង្កត់ធ្ងន់ផងដែរថា ការស្មុំកូនអន្តរប្រទេសគឺបានអនុវត្តឡើងក្នុងជម្រើសចុងក្រោយប៉ុណ្ណោះ បន្ទាប់កិច្ចខិតខំប្រឹងប្រែងរកគ្រួសារដើម និងគ្រួសារចិញ្ចឹមក្នុងស្រុកត្រូវបានធ្វើអស់លទ្ធភាពហើយនោះ។
គួររំលឹកថា កម្ពុជាត្រូវបានផ្អាក់មិនឲ្យមានការស្មុំកូនទៅក្រៅប្រទេសចាប់ពីឆ្នាំ២០០៩មកបន្ទាប់ ពីមានជនខិលខូចមួយចំនួនបានឆ្លៀតឱកាសយកការស្មុំកូនធ្វើជាមុខរបរ ហើយបានប្រព្រឹត្តអំពើ ខុសច្បាប់ ដូចជា៖ ការទិញដូរទារក, បង្ខិតបង្ខំស្រ្តីរងគ្រោះឲ្យបោះបង់កូន, ក្លែងបន្លំឯកសារជាក្មេង កំព្រា ឬ ក្មេងបោះបង់ចោលជាដើមដោយគ្មានការតាមដានច្បាស់លាស់។
លោកស្រី Rana Flower ប្រធាយូនីសេហ្វប្រចាំកម្ពុជាបានបញ្ជាក់ថា មុននឹងបើកឲ្យមានការសុំកូនសារជាថ្មីនេះ ចាំបាច់កម្ពុជាត្រូវតែធានាឲ្យមានកិច្ចគំាពារសំខាន់ៗ នឹងការគ្រប់គ្រងករណីការស្មុំកូន បានត្រឹមត្រូវជាមុនសិន ដំដៅធ្វើយ៉ាងណាឲ្យចំនួនពាក្យស្មុំកូន និងការស្នើសុំការអនុញ្ញាតពីស្ថាបន័បរទេសមានការបញ្ជាក់ត្រឹមត្រូវ ហើយអាចគ្រប់គ្រងបានដោយអាជ្ញាធរកម្ពុជា។លោកស្រីបន្តថា នេះការអនុវត្តដ៏រឹងមាំរបស់កម្ពុជា ដែលជាការប្តេជ្ញាចិត្តខ្ពស់ក្នុងការការពារសិទ្ធិរបស់កុមារស្របតាម អនុសញ្ញាក្រុងឡាអេស្តីពីការការពារកុមារ និងសហប្រតិបត្តិការទាក់ទងនឹងស្មុំកូនអន្តរប្រទេស។
សូមបញ្ជាក់ថា កម្ពុជាបានបើកឲ្យមានការស្មុំកូនទៅក្រៅប្រទេសចាប់តាំងពីឆ្នាំ១៩៨៧ ដល់ឆ្នាំ២០០៩ មានចំនួនជិត៣៨០០នាក់ នៅតាមប្រទេសចំនួន២៨ក្នុងនោះប្រទេសដែលទទួលយកកូនពីកម្ពុជាច្រើនជាងគេមានៈ ប្រទេសអីតាលី អាមេរិក បារំាង និងប្រទេសអង់គ្លេស៕ ដោយ៖ ភីន រ៉ា