ភ្នំពេញ៖អង្គការអន្តរជាតិទេសន្តរប្រវេសន៍ IOM សន្យាថានឹងធ្វើកិច្ចសហប្រតិបត្តិការជាមួយ ក្រសួងការងារក្រោយពេលបញ្ចប់ការសិក្សាស្រាវជ្រាវនិងរកនៅយុទ្ធសាស្រ្តដើម្បីធ្វើកិច្ចសហប្រតិបត្តិការដោះស្រាយបញ្ហាទេសន្តរប្រវេសន៍។ ការសន្យានេះបានធ្វើឡើងកាលពីម្សិលមិញនោទីស្តីការក្រសួងការងារ រវាងឯ/ឧបណ្ឌិត អ៊ិត សំហេង រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និង លោកវេជ្ជបណ្ឌិត Leul A. MEKONNENប្រធានបេសកកម្មនៃអង្គការអន្តរជាតិទេសន្តរប្រវេសន៍ IOM ប្រចាំកម្ពុជាចូលជួបសម្តែងការគួរសម និងពិភាក្សា ការងារ។
ឯកឧត្តមបណ្ឌិត អ៊ិត សំហេង បានមានប្រសាសន៏ថា បច្ចុប្បន្ន បញ្ហទេសន្តរប្រវេសន៍ គឺជាប្រធានបទមួយដ៏ធំរបស់ក្រសួងការងារ និងបណ្តុះបណ្តាលវិជ្ជាជីវៈក្រសួងក៏កំពុងរៀបចំឲ្យប្រសើរឡើងនូវប្រព័ន្ធគ្រប់គ្រងទិន្នន័យពលករក្រៅប្រទេស ព្រោះថាមានពលករកម្ពុជា ច្រើនកំពុងធ្វើការងារនៅក្រៅប្រទេស ដូចជា ថៃ ម៉ាឡេស៊ី និងកូរ៉េ ជាដើម ហើយក្នុងនោះ ក្រសួងមានការគ្រប់គ្រងល្អចំពោះពលករនៅប្រទេសមួយចំនួន ឯមួយចំនួន ទៀតកំពុងជួបបញ្ហាប្រឈម។
ឯ/ឧអ៊ិត សំហេង បន្តថា សកម្មភាពបេសកកម្មរបស់អង្គការIOMពិត ជាមានអត្តប្រយោជន៍ខ្លាំងណាស់សម្រាប់កម្ពុជា ពិសេសបញ្ហាពលករទេសសន្តរប្រវេសន៍រវាងកម្ពុជា-ថៃ ព្រោះថានៅប្រទេសថៃមានពលករកម្ពុជាជាច្រើនទាំងស្របច្បាប់ និងមិនស្របច្បាប់កំពុងធ្វើការនៅទីនោះ។ទន្ទឹមនឹងនេះ ឯកឧត្តម បានលើកឡើងថា បញ្ហាពលករទេសន្តរប្រវេសន៍ទៅធ្វើការនៅប្រទេសម៉ាឡេស៊ី ក៏ជាបញ្ហាប្រឈមដ៏ស្មុគស្មាញរបស់ក្រសួង ពិសេសការងារបំរើតាមផ្ទះ ដែលរងនូវការរំលោភបំពាន់សិទ្ធិយ៉ាងធ្ងន់ធ្ងរជាច្រើនករណី និងបញ្ហាពលករដែលទៅធ្វើការមិនស្របច្បាប់នៅម៉ាឡេស៊ី។
ឯកឧត្តម បន្តថា ក្រសួងកំពុងខិតខំស្វែងរកនូវកិច្ចព្រមព្រៀងរួមគ្នាមួយរវាងកម្ពុជា-ម៉ាឡេស៊ី ដើម្បីដោះស្រាយបញ្ហាទាំងនេះដោយបានគូសបញ្ជាក់យ៉ាងច្បាស់ថា ក្នុងពេលដ៏ខ្លីខាងមុខនេះ នឹងមានការផ្លាស់ប្តូរនូវទស្សនកិច្ចការងារមួយរវាងថ្នាក់ដឹកនាំក្រសួងការងារកម្ពុជា និងក្រសួងការងារម៉ាឡេស៊ី ដើម្បីបញ្ចប់នូវកិច្ចពិភាក្សានិងឈានទៅដល់ការចុះអនុស្សារណលើកិច្ចព្រមព្រៀងរួមគ្នាមួយដោយខិតខំបង្កើននូវចំនួនពលករខាងផ្នែកឧស្សាហកម្មផ្សេងៗ ជាជាងការងារបំរើតាមផ្ទះ សំដៅធ្វើយ៉ាងណាឲ្យពលករកម្ពុជាទទួលបានប្រាក់ខែខ្ពស់ និងមានចំណេះជំនាញពេលត្រឡប់មកកម្ពុជាវិញ។ឯកឧត្តមបណ្ឌិត រដ្ឋមន្រ្តីក្រសួងការងារ និងបណ្តុះ បណ្តាលវិជ្ជាជីវៈ យល់ឃើញថា ទោះជាយ៉ាងណាក៏ដោយ បញ្ហាសម្រាប់កម្ពុជាគឺត្រូវពង្រឹង ប្រព័ន្ធគ្រប់គ្រងពលករទេសន្តរប្រវេសន៍ឱ្យបានល្អ ហើយអង្គការIOM ពិតជាដៃគូមួយដ៏សាក សមបំផុត។ទន្ទឹមនឹងនេះ ឯកឧត្តមបណ្ឌិតរដ្ឋមន្រ្តីនឹងខិតខំដោះស្រាយនូវ បញ្ហាការងារក្នុង ប្រទេសតាមរយៈការផ្តល់ព័ត៌មានទីផ្សារការងារឱ្យអស់ពីសមត្ថភាព មុនពេលពលករកម្ពុជា សម្រេច ចិត្តទៅធ្វើការនៅក្រៅប្រទេស ព្រោះថាលក្ខ័ណការងារនៅកម្ពុជាបច្ចុប្បន្ន ក៏កំពុងមាន ភាពល្អប្រសើរច្រើន ។
លោកវេជ្ជបណ្ឌិតMEKONNEN បានមានប្រសាសន៍ថា អង្គការមានគម្រោងជាច្រើននៅ កម្ពុជា ហើយកន្លងមកអង្គការIOMបានធ្វើការជាមួយក្រសួងលើប្រព័ន្ធគ្រប់គ្រងទិន្នន័យពល ករទេសសន្តរប្រវេសន៍។ តាមរយៈប្រព័ន្ធគ្រប់គ្រងទិន្នន័យនេះក្រសួងអាចគ្រប់គ្រងនូវចំនួនពលករក្រៅប្រទេស ប្រភេទការងារទីកន្លែងដែលពួកគាត់ធ្វើការ ក៏ដូចជាចំនួនពលករ និង ហេតុផលនៃការវិលត្រឡប់របស់ពួកគាត់មកកម្ពុជាវិញផងដែរ។
អង្គការIOMក៏ធ្លាប់បានធ្វើ យុទ្ធនាការផ្សព្វផ្សាយបញ្ហាទេសសន្តរប្រវេសន៍ការបើកវគ្គបណ្តុះបណ្តាល និងបានបោះពុម្ពសៀវភៅណែនាំអំពីការធ្វើចំណាកស្រុកដោយសុវត្តិភាពនៅទូទាំងប្រទេសកម្ពុជាទៀតផង។អង្គការIOMក៏កំពុងធ្វើការសិក្សាស្រាវជ្រាវអំពីការអនុវត្តន៍អនុស្សារណយោគយល់គ្នារវាងកម្ពុជា-ថៃស្តីពីពលករទេសសន្តរប្រវេសន៍៕ ដោយ៖ អភិរក្ស