ភ្នំពេញ៖ ម៉ាស៊ីនឆូតកាត ឬ Eftpos Machine គឺជាប្រភេទម៉ាស៊ីនដែលទូទាត់សាច់ប្រាក់​ដោយ​ការប្រើនូវប័ណ្ណ​ឥណ​ពន្ធ ឬប័ណ្ណធនាគារ ក្នុងការទូរទាត់ទំនិញ ឬសេវាកម្ម​ដោយមិនចាំបាច់​ប្រើសាច់ប្រាក់ និង បង្កើននូវសុត្ថិភាព​ខ្ពស់​ដល់អ្នកប្រើប្រាស់។​ Eftpos Machine មានប្រភព​មកពី បច្ចេកវិទ្យានៅក្នុងសហរដ្ឋអាមេរិកក្នុងឆ្នាំ១៩៨១ និងត្រូវ​បាន​ប្រើ​ប្រាស់​យ៉ាងឆាប់រហ័ស តាមបណ្តាប្រទេសផ្សេងទៀត ពីព្រោះម៉ាស៊ីននេះបានភ្ជាប់ជាមួយគុណប្រយោជន៏យ៉ាង​ច្រើនជូនប្រជាពលរដ្ឋ។

Eftpos Machine មានគុណប្រយោជន៍ដូចជាសុវត្ថិភាពលើការចំណាយក្នុងពេល​ទូទាត់លើ​ទំនិញឬសេវាកម្មគឺ អ្នកអាចមានទំនុកចិត្តចំពោះប្រតិបត្តិការសាច់ប្រាក់របស់អ្នកគឺមាន​សុវត្ថិភាពដោយប្រើលេខកូដសម្ងាត់រវាងបណ្ណ័ ធនាគាររបស់អ្នក និងម៉ាស៊ីនឆូតកាតនេះ។ការដាក់សាច់ប្រាក់ជាប់ខ្លូនអាច មានភាពប្រថុយប្រថាន ខ្ពស់ក្នុងការ បាត់បង់។ ផ្ទុយមកវិញ​ប្រសិនបើ ទីផ្សារជ្រើសរើស ប្រើប្រាស់ម៉ាស៊ីន​នេះ អ្នកមិនចាំបាច់បារម្ភក្នុងការបាត់បង់សាច់​ប្រាក់​នោះទេ ពីព្រោះអ្នកអាចទិញទំនិញ បានដោយប្រើប្រាស់បណ្ណ័ធនាគារ។​

ម៉្យាងទៀត​ភាពងាយ​ស្រួលដោយអ្នកមិនចាំបាច់យកសាច់ប្រាក់ជាប់ខ្លួន ខណៈ​ពេលចង់​ទិញ​ទំនិញ។ នៅពេល ខ្លះ សាច់ប្រាក់មានទំហំច្រើន ការដាក់ជាប់ខ្លូនចូលក្នុងផ្សារទិញឥវាន់​គឺមាន​ភាព​លំបាក ។ ដូច្នេះការប្រើប្រាស់ បណ័្ណ ធនាគារ និងម៉ាស៊ីនឆូតកាតនេះអាចផ្តល់ភាព​ងាយ​ស្រួល​ជាង។ មិនតែប៉ុណ្ណោះអ្នកនឹងចំណេញពេលវេលា ច្រើន ដោយ មិនចំបាច់ទៅរក​ម៉ាស៊ីន​ដើម្បី​ដកប្រាក់ទេ។

ចំណែកការដក់ប្រាក់ អ្នកក៏អាចដក់ប្រាក់បន្ទាន់ពីអ្នកលក់ប្រចាំហាងជាមួយម៉ាស៊ីននេះ​ផង​ដែរ នៅពេលលោកអ្នក មិនអាចស្វែងរកម៉ាស៊ីនដកប្រាក់ATMបាន។ នៅប្រទេសកម្ពុជា តាមការសិក្សាស្រាវជ្រាវ ឧស្សាហកម្មនៃការប្រើ ប្រាស់បណ្ណ័ធនាគារ មានការកើនឡើង ខ្ពស់ពី៥២៩.៩០០ ក្នុងឆ្នាំ ២០០៨ ដល់១៣០០ ០០០បណ្ណ័ក្នងឆ្នាំ២០១២។ ឧស្សាហកម្មនេះ​ត្រូវបាន​គេព្យាករថាកើនឡើងចំនូន១០,៩៦% ពី ១,៥ លានបណ្ណ័ធនាគារក្នុងឆ្នាំ ២០១៣ ដល់ ២,៣ លានបណ្ណ័ក្នុងឆ្នាំ២០១៧។

ការរីកចម្រើននេះ​គឺបានទទួលឥទ្ធិពល ពីកំណើនប្រជាជនការផ្លាស់ប្តូររបៀបចំណាយ, កម្រិត​ខ្ពស់ក្នុងការផ្តល់
សេ វាធនាគារអេឡិចត្រូនិក​និងការផុសឡើង នៃនិន្នាការទិញឥវ៉ានតាម​ប្រព័ន្ធ​អ៊ីនធើណេត។​យ៉ាងណាមិញនៅ ប្រទេសកម្ពុជាមានធនាគារមួយចំនូនតូចតែប៉ុណ្ណោះ ដែល​បានជុំរុញឲ្យមានការប្រើប្រាស់ម៉ាស៊ីនឆូតកាតនេះ។

នាយកយុទ្ធសាស្រ្តនិងហិរញ្ញវត្ថុនៅធនាគារCIMB​ លោក ហេង វុទ្ធី បានបញ្ជាក់ដឹងថា វាពិតណាស់ដែរ ម៉ាស៊ីន នេះ ត្រូវបានប្រើប្រាស់នៅប្រទេសជាច្រើន។​ ធនាគារCIMB ដែលមាន​វត្តមាន នៅតាមប្រទេសមួយដូចជាម៉ាឡេស៊ី ឬ សឹង្ហបុរីក៏បានដាក់ឲ្យមាន ការប្រើប្រាស់ ម៉ាស៊ីននេះផងដែរ។ ប៉ុន្តែនៅកម្ពុជាធនាគារCIMB​មិនទាន់បានណែនាំ ម៉ាស៊ីននេះនៅ​ឡើយ​ទេ។ តាមការសង្កេត របស់លោក ចំពោះការប្រើប្រាសម៉ាស៊ីននៅកម្ពុជាថា នេះជាជំហ៊ាន​មួយ មិន ទាន់ទូលំទូលាយ ដោយប្រជាជនខ្មែរគឺ មានភាពស្ទាក់ស្ទើរច្រើនក្នុងការប្រើប្រាស់។

ជាពិសេសធនាគារមានការពិបាក ក្នុងការបញ្ចុះបញ្ចូលអ្នកលក់ធ្វើការណែនាំអតិថិជនរបស់​ខ្លូនប្រើប្រាស់ បណ្ណ័ ធនាគារក្នុងការទូទាត់ ទំនិញឬសេវាកម្មនេះនៅឡើយ។ ម៉្យាងវិញទៀត​សេដ្ឋកិច្ច​ស្រុកខ្មែរគឺយកសាច់​ប្រាក់ជា​មូល​ដ្ឋាន។ ក្នុងនោះដែរអ្នកលក់ប្រចាំហាងខ្លូនគាត់​ផ្ទាល់​គឺចង់បានសាច់ប្រាក់ ជាជាងការប្រើប្រាស់ម៉ាស៊ីនឆូត​កាតរ​បស់​ធនាគារ។ ចំណែក​ទស្សនៈរបស់អតិថិជន ចំពោះបណ្ណ័ធនាគារ ដូចជាអេធីអ៊ឹម គឺសម្រាប់ដកសាច់ប្រាក់​ពីធនា​គារ មិនមែនយកមកប្រើប្រាស់ក្នុងការទិញឥវាន់ទេ។

ដូច្នេះការប្រើប្រាស់ម៉ាស៊ីនឆូតកាត ក្នុង​ប្រទេស​កម្ពុជាទាមទាររយៈពេលបន្ថែម ពីព្រោះ​ទាំង​អ្នក​​លក់ និងអ្នក់ទិញ​តម្រូវ​ឲ្យមានការពង្រីកចំណេះដឹង និងការយល់ដឹង​ផ្នែកបច្ចេកវិទ្យា​នេះ​ឲ្យកាន់តែស៊ីជម្រៅ និងទូលំទូលាយថែម​ទៀត៕​​ ដោយ​៖ សស្អាត