ភ្នំពេញ៖ មន្រ្តីជាន់ខ្ពស់ នៃគណបក្សកុម្មុយនីស្តចិន បានមកបំពេញទស្សនកិច្ចជាផ្លូវការ នៅប្រទេសកម្ពុជា  ដើម្បី​ពង្រឹង​ពង្រីកទំនាក់ទំនងទ្វេភាគី រវាងរដ្ឋាភិបាលកម្ពុជានិងសាធារ​ណៈរដ្ឋប្រជាមានិតចិន ក៏ដូចជា​គណបក្សជា​សម្ព័ន​មិត្តរបស់ខ្លួន គឺគណបក្សប្រជាជនកម្ពុជា និងគណបក្សហ៊្វុនស៊ិនប៉ិច។លោក កែវ ពុទ្ធរស្មី ឧត្តមទីប្រឹក្សាជាន់ខ្ពស់​គណបក្ស ហ៊្វុនស៊ិនប៉ិច បានប្រាប់ក្រុម​អ្នក​សារព័ត៌មាន នៅក្រោយជំនួប រវាង សម្តេច ព្រះអនុជ នរោត្តម អរុណរស្មី ប្រធានគណបក្ស ហ៊្វុនស៊ិនប៉ិច ជាមួយលោក Chen Feng  xian អនុប្រធាននាយកដ្ឋានអន្តរជាតិ នៃគណៈ​មជ្ឈឹមបក្ស​កុម្មុយនីស្តចិន នៅដំណាក់ក្បែវិមានឯករាជ្យ នាព្រឹកថ្ងៃទី២៤ខែ កុម្ភៈ​នេះថា  លោក Chen Feng  xian បានរំលឹកពី​ព្រះរាជ​​ស្នាដៃដឹកនាំដ៏ប៉ិនប្រសព និងព្រះបញ្ញាញ្ញាណ ឈ្លាសវៃ​ របស់ព្រះបរមរតនកោដ្ឋក្នុងការដឹកនាំ​ប្រទេស​ក៏​ដូច​ជាការផ្សះផ្សារជាតិ នាពេល​កន្លងមក ពិសេសទំនាក់ទំនងការទូតយ៉ាងល្អបំផុតរវាងប្រទេសទាំងពីរកម្ពុជា-ចិន។

លោកកែវ ពុទ្ធរស្មីបន្តថា ដំណើរទស្សនកិច្ចរបស់ អនុប្រធាននាយកដ្ឋានអន្តរជាតិ នៃគណៈ​មជ្ឈឹម​បក្សកុម្មុយ​នីស្ត​ចិន ក្នុងរយៈពេលប៉ុន្មានថ្ងៃនេះនឹងចូលជួបសម្តែងការគួរសម ជាមួយ​ប្រមុខដឹកនាំ និងឥស្សរជនជាន់ខ្ពស់ នៃ​ព្រះរាជា​ណាចក្រកម្ពុជា ជាច្រើនរូប រួមមាន សម្តេច នាយករដ្ឋមន្រ្តី លោកឧបនាយករដ្ឋមន្រ្តី សុខ អាន លោក សាយ ឈុំ អគ្គលេខាធិការ គណបក្សប្រជាជនកម្ពុជា ព្រមទាំងសម្តេច ព្រះរាជបុត្រី ព្រះអនុជ នរោត្តម អរុណរស្មី ព្រះប្រធានគណបក្សហ៊្វុនស៊ិនប៉ិច នាពេលនេះ។ លោកបន្តទៀតថា ក្នុងជំនួបនេះដែរ លោក Chen Feng  xian បាន​បញ្ជាក់ពីជំហរ បន្តគាំទ្រជា​និច្ចចំពោះគណបក្សរាជានិយម ហ៊្វុនស៊ិនប៉ិច នៅគ្រប់កាលៈទេសៈ និង​ជម្រុញឲ្យ​គណបក្ស ហ៊្វុនស៊ិនប៉ិច ចូលរួមក្នុងការផ្សះផ្សារ និងសម្របសម្រួលជាមួយគណបក្សប្រជាជនកម្ពុជា និង គណបក្ស​សង្រ្គោះ​ជាតិ ដើម្បីដោះស្រាស្ថានភាពនយោបាយនៅកម្ពុជានាពេលបច្ចុប្បន្ននេះ ហើយភាគីចិន ក៏ដូចជាគណបក្ស​កុំម្មុយនីស្តចិន នឹងខិតខំរួមសហការសម្របសម្រួលឲ្យ​មាន​ការ​ដោះស្រាយស្ថានការណ័ដ៏តឹងតែងនេះ​ឲ្យបានល្អ​ប្រសើរ​​តាមតែអាចធ្វើទៅបាន។

ជាមួយក្នានោះ សម្រាប់ការពង្រឹងកិច្ចសហប្រតិបត្តិការរវាងគណបក្សទាំងពីរវិញ លោក Chen Feng  xian បានស្នើរ​ឲ្យ​​មានការផ្លាស់ប្តូរគណៈប្រតិភូជាន់ខ្ពស់នៃគណ​បក្សទាំងពីរឲ្យ​ញឹកញាប់​ក្នុងមួយឆ្នាំៗ។ សុំឲ្យបញ្ជូនមន្រ្តី ហ៊្វុនស៊ិន​ប៉ិច ទៅបណ្តុះបណ្តាល និងធ្វើទស្សនកិច្ចសិក្សា នៅប្រទេសចិនយ៉ាងតិច៣០នាក់ក្នុងមួយឆ្នាំលើផ្នែកអភិបាលកិច្ច តាមក្រខណ្ឌដែលបាន​ចុះអនុស្សារណៈជាមួយគ្នាកាលពីឆ្នាំ២០១១កន្លងទៅនោះ។  ចំពោះចំនួនមន្រ្តីគណ​បក្ស​​ទៅ​​សិក្សា​នៅប្រទេសចិន ចិនគ្រោងនឹងបន្ថែមឲ្យបានច្រើនលើសពីនេះក្នុងឆ្នាំ​បន្ត​បន្ទាប់ ដើម្បី​ជួយ​​បណ្តុះបណ្តាល​ធន​ធាន​មនុស្សរបស់គណបក្សឲ្យកាន់តែសម្បូរបែប។

លោកឧត្តមទីប្រឹក្សាជម្រាបថា ជាការឆ្លើយតប សម្តេច ប្រធានគណបក្សហ៊្វុនស៊ិនប៉ិច បានសម្តែងនូវអំណរគុណ ចំពោះមហាមិត្តចិន ពិសេសគណបក្សកុំម្មុយនីសចិនដែលតែងតែ យកចិត្តទុកដាក់ ជួយ​ដល់គណបក្សទាំង​កម្លាំង​កាយ​ចិត្ត និងសម្ភារៈកន្លងមក ហើយនៅតែ​បន្តគាំទ្រឥតងាករេចំពោះចំណងមិត្តភាព សាមគ្គីភាពដែលមាន​ជាយូរ​យាមកហើយនោះ ឲ្យ នៅគង់វង់យូរអង្វែងតទៅទៀត។ សម្តេចនូវមិនភ្លេចពីការអរគុណចំពោះការយកចិត្តទុកដាក់ ពីមិត្តចិនដែលបានថែរក្សាព្រះរាជសុខភាព ព្រះបរម រតនកោដ្ឋ កាលមានព្រះជន្មនៅឡើយ ព្រមទាំងព្រះវររាជ​​មាតា​ជាតិខ្មែរ (សម្តេចម៉ែ)និងព្រះមហាក្សត្រនៃយើងសព្វថ្ងៃនេះ។ សូមជម្រាបផងដែរ នៅក្នុងជំនួបនោះ គណ​ប្រតិភូ​​ជាន់ខ្ពស់នៃគណបក្សកុំម្មុយនីស្តចិន បានផ្តល់ជូននូវជំនួយមួយចំនួនរួមមាន ម៉ូតូដែលកម្លាំង១២៥​​​សេសេ​ចំនួន១៥គ្រឿង និង កង់អេឡិចត្រូនិច (កង់ប្រើអាគុយ) ចំនួន ៨០ គ្រឿង ដល់គណបក្សហ៊្វុនស៊ិនប៉ិច ដើម្បី​យកទៅ​ប្រើប្រាស់ជាមធ្យោបាយធ្វើដំណើរចុះពង្រឹងសមាជិកនៅតាមមូលដ្ឋានរបស់ខ្លួន៕

ដោយ៖ ស.ស្អាត