ថៃ៖ លោក ថាក់ស៊ីន បងប្រុសរបស់លោកស្រី យីងឡាក់ ទទូចឲ្យប្អូនស្រីរបស់ខ្លួនប្រកាន់ជំហរជាដាច់ខាតមិនចុះចេញពីតំណែង ហើយត្រូវធ្វើដំណើរឆ្ពោះទៅរកការបោះឆ្នោតថ្ងៃទី២ ខែកុម្ភៈ ទៅតាមគម្រោងផែនការរបស់គណៈកម្មការរៀបចំការបោះឆ្នោត ដែលបានប្រកាសជាផ្លូវការនោះ។ នេះបើយោងតាមកាសែតថៃ ឌឺណេសិន បានឲ្យដឹងថា លោកស្រី យីងឡាក់ បានទទួលទូរស័ព្ទហៅពីបងប្រុសរបស់លោកស្រី គឺលោក ថាក់ស៊ីន កាលពីថ្ងៃទី១៤ មករា បន្ទាប់ពីលោកស្រីបាត់បង់ស្មារតីក្នុងការទប់ទល់ជាមួយនឹងក្រុមប្រឆាំង ដែលបានឡោមព័ទ្ធទីក្រុងបាងកកចាប់តាំងពីថ្ងៃចន្ទមកនោះ។
កាសែតដដែលនេះមិនបានប្រាប់ថា ប្រភពណាបានអះអាងពីការសន្ទនាគ្នារវាងលោក ថាក់ស៊ីន និងលោកស្រី យីងឡាក់ នោះទេ ប៉ុន្តែបានបញ្ជាក់ថា លោក ថាក់ស៊ីន បានផ្ដល់ដំបូន្មានជាច្រើនឲ្យប្អូនស្រីរបស់លោក ប្រកាន់ជំហរតឹងរ៉ឹងប្រឆាំងនឹងពួកបាតុករ។ ប៉ុន្តែភ្លាមៗនោះ លោកស្រី យីងឡាក់ បានភ្ជាប់ទូរស័ព្ទជាមួយនឹងមេបញ្ជាការកងទ័ព លោកឧត្តមសេនីយ៍ប្រាយុទ្ធ ចាន់អ៊ូចារ ដោយសូមយោបល់ថា តើលោកស្រីគួរតែធ្វើយ៉ាងម៉េចចំពោះស្ថានការណ៍ដ៏លំបាកនេះ។ តែលោកឧត្តមសេនីយ៍មិនបានផ្ដល់ដំបូន្មានឲ្យលោកស្រី យីងឡាក់ មួយមាត់សោះឡើយ។ គ្រាន់តែនិយាយថា ឲ្យលោកស្រីចៀសវាងការប្រើអំពើហិង្សាទៅលើបាតុករតែប៉ុណ្ណោះ។
នៅក្នុងកិច្ចសន្ទនាគ្នារវាងលោកស្រី យីងឡាក់ និងលោក ថាក់ស៊ីន ដែលជាអតីតនាយករដ្ឋមន្ត្រីនិរទេសខ្លួនបានប្រាប់មកប្អូនស្រីរបស់ លោកថា ប្រសិនបើចុះចេញពីតំណែងទៅតាមសម្ពាធរបស់បាតុករ មានន័យថា លោកស្រី យីងឡាក់ នឹងត្រូវបានប្ដឹងទៅខាងតុលាការ ពីបទបំពានអំណាចរដ្ឋ ហើយមិនតែប៉ុណ្ណោះ គណបក្សភឿថៃ នឹងត្រូវបានរំលាយចោលទៀតផង។ លោកថាក់ស៊ីនបញ្ជាក់ថា នេះបើយោងតាមមាត្រា១៥៧ នៃក្រមព្រហ្មទណ្ឌរបស់ព្រះរាជាណាចក្រថៃ។ មកដល់ពេលនេះស្ថានការណ៍នៅទីក្រុងបាងកកកំពុងឡើងកម្ដៅជាខ្លាំង។ មានសេចក្ដីរាយការណ៍ថា បាតុករប្រឆាំងរដ្ឋាភិបាលបានហ៊ុំព័ទ្ធវិមាននាយករដ្ឋមន្ត្រី និងអាគារក្រសួងសុខាភិបាល ខណៈដែលកងទ័ពត្រូវបានបញ្ជូនទៅហ៊ុំព័ទ្ធមន្ទីររដ្ឋមួយចំនួននៅទីក្រុងបាងកក ដើម្បីការពារសន្តិសុខរបស់អ្នកជំងឺ។ មកដល់ពេលនេះ គឺជាថ្ងៃទីបួនហើយ នៃការហ៊ុំព័ទ្ធក្រុងបាងកកដែលធ្វើឡើងដោយក្រុមប្រឆាំងរដ្ឋាភិបាល ដើម្បីដាក់ការគាបសង្កត់ឲ្យលោកស្រី យីងឡាក់ ចុះចេញពីតំណែង៕
ដោយ៖ ភីនរ៉ា