ភ្នំពេញ៖ ដោយមានកិច្ចសហប្រតិបត្តការសេដ្ឋកិច្ចជាមួយកម្ពុជា រដ្ឋាភិបាលជប៉ុន បានផ្តល់ ជំនួយឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ) ជាទឹកប្រាក់ចំនួន ១១២,៤២៣ដុល្លារអាមេរិក ដល់មន្ទីរឧស្សហ្សកម្ម រ៉ែ និងថាមពលខេត្តកែប សម្រាប់គម្រោងតំឡើងប្រព័ន្ធផ្គត់ផ្គង់ទឹកស្អាត នៅក្រុងកែប និងស្រុកដំណាក់ចង្អើរ ។
នៅក្នុងពិធីចុះហត្ថលេខាផ្តល់គម្រោងនាព្រឹកថ្ងៃទី១៦ខែមករាឆ្នាំ២០១៤ នៅស្ថានទូតជប៉ុនប្រចាំកម្ពុជា លោក គូម៉ាម៉ារ៉ូយូជិ ឯកអគ្គរាជទូតវិសាមញ្ញនិងពេញសមត្ថភាពរបស់ប្រទេសជប៉ុនបានមានប្រសាសន៍ថា គម្រោងនេះមានគោលបំណងកែលម្អរការទទួលបានទឹកស្អាតសម្រាប់ផឹកក្នុងតំបន់២ នៃខេត្តកែប ដោយការតំឡើងប្រព័ន្ធចម្រោះទឹកដែលមានសមត្ថភាពអាចច្រោះទឹកបាន ២៥០០លីត្រក្នុង១ម៉ោង ។ ហើយទឹកស្អាតដែលច្រោះបានដោយប្រព័ន្ធនេះនិងត្រូវរក្សាទុកក្នុងបាសាំងស្តុកទឹកធំៗចំនួន៣ ដែលផ្តល់ជូនដោយគម្រោងសម្រាប់ចែកចាយដល់ប្រជាពលរដ្ឋក្នុងមូលដ្ឋានប្រើប្រាស់។
លោកឯកអគ្គរាជទូតបន្តថា គម្រោងនេះនឹងផ្តល់ផលប្រយោជន៍ដល់ប្រជាជនជាង៨៥០០នាក់ក្នុងមូលដ្ឋាន និង ភ្ញៀវទេសចរណ៍ប្រមាណ៧៦០,០០០នាក់ដែលមកកំសាន្តក្នុងតំបន់នេះ ជារៀងរាល់ឆ្នាំ លោកថា បច្ចុប្បន្ននៅតំបន់នេះពុំទាន់មានទឹកស្អាតប្រើប្រាស់នៅឡើយទេ ។ ហើយការកែលម្អរការទទួលបានទឹកស្អាតពិសារ គឺជាតម្រូវការចាំបាច់ក្នុងមូលដ្ឋានរបស់មនុស្សជាតិ និងជាគោលដៅមួយក្នុងចំណោមគោលដៅអភិវឌ្ឍន៍សហសវត្សរបស់កម្ពុជា។ រដ្ឋាភិបាលជប៉ុនបានផ្តល់អទិភាពខ្ពស់ទៅលើវិស័យនេះ និងកំពុងបន្តកិច្ចគាំទ្រដល់ការខិតខំ ប្រឹងប្រែងរបស់កម្ពុជា តាមរយៈការសាងសង់រោងចក្រផលិតទឹកស្អាត និងការផ្គត់ផ្គង់កិច្ចសហប្រតិបត្តិការបច្ចេកទេសនៅក្នុងតំបន់ជាច្រើននៃប្រទេសនេះ។លោក យស់ មុន្នី ប្រធានមន្ទីរឧស្សាហកម្ម រ៉ែ និងថាមពល ខេត្តកែប បានមានប្រសាសន៍ថា ក្រោយពីទទួលបានជំនួយនេះ មន្ទីរនឹងយកមកអនុវត្តគម្រោងដោយទិញរថយន្ត សម្រាប់ច្រោះទឹកស្អាត ១គ្រឿង សាងសង់ជើងទម្រ និងស៊ីទែនស្តុកទឹកចំនួន៣កន្លែង ទិញរឺម៉កម៉ូតូសម្រាប់ដឹកទឹកចំនួន៣គ្រឿង ប៊ីដុងទឹកចំណុះ៣០លីត្រចំនួន១២០ និងសម្ភារៈផ្សេងៗទៀត ដែលបានកំណត់នៅក្នុងគម្រោងនេះ។
លោក យស់ មុន្នី បានបង្ហាញថា ក្រោយគម្រោងនេះចាប់ផ្តើម ដំណើរការ ប្រជាពលរដ្ឋដែលរស់នៅទីតាំងទាំង៣ខាងលើនឹងទទួលបានផលប្រយោជន៍ពីគម្រោងនេះ។ ក្នុងនោះ ទីតាំងស្រះទឹកនៅមុខមន្ទីរឧស្សាហកម្ម ប្រជាពលរដ្ឋនៅភូមិកែបប្រមាណជា២៦៤៩នាក់ និងភូមិថ្មី ប្រមាណ២៣៣៥នាក់ នឹងរួមទាំងសណ្ឋាគារ ផ្ទះសំណាក់ជាច្រើនទៀតនឹងទទួលបានផលពី គម្រោងនេះ។ សម្រាប់ស្រះទឹកភ្នំព្រួស គឺភូមិកំពង់ត្រឡាច និងភូមិដំណាក់ចង្អើរដែលមានប្រជាពលរដ្ឋប្រមាណជា៥០០០នាក់ និងទីតាំងទំនប់ទឹកវាលវង់ សម្រាប់ភូមិក្រាំងលាវ និងភូមិកោះសោម ដែលមានប្រជាពលរដ្ឋជាង២ពាន់គ្រួសារនឹងត្រូវទទួលបានទឹកស្អាតប្រើប្រាស់ពីគម្រោងនេះផងដែរ។លោក បញ្ជាក់ថា បច្ចុប្បន្ននេះខេត្តកែប ពុំទាន់មានប្រព័ន្ធផ្គត់ផ្គង់ទឹកស្អាតប្រើប្រាស់នៅឡើយ ទេ ប្រជាជននៅទីតាំងទាំងបី ពីមុនប្រើប្រាស់ទឹកពីស្រះ ត្រពាំង ទំនប់ និងអណ្តូងផ្ទាល់ខ្លួន ប្រើប្រាស់តែប៉ុណ្ណោះ ហើយចាប់ពីទទួលបានគម្រោងនេះទៅប្រជាពលរដ្ឋនឹងឈប់ប្រើប្រាស់ ទឹកបែបមុនទៀតហើយ គឺប្រើប្រាស់ទឹកស្អាតដើម្បីលើកស្ទួយជីវភាព និងសុខមាលភាពជាប្រចាំថ្ងៃ ដែលនឹងចាប់ដំណើរការពីអំឡុងចុងឆ្នាំ២០១៤នេះតទៅ។
លោក កែន សន្ថា អភិបាលនៃគណអភិបាលខេត្តកែប បានសម្តែងនូវជំនឿចិត្តយ៉ាងមុតមាំថា ក្រោយពីគម្រោងនេះដំណើរការ ពលរដ្ឋដែលរស់នៅក្នុតតំបន់ទាំងនោះលែងប្រឈម លើកង្វះទឹកស្អាតជាក់ជាពុំខានឡើយ ទោះជាពុំទាន់អាចផ្គត់ផ្គង់ទូទាំងខេត្តបានក៏ដោយ តែបានជួយរំលែកការខ្វះខាតទឹកស្អាតបានមួយចំណែកធំ។ តែទោះជាយ៉ាងនេះក៏ដោយ ក៏លោកនូវតែរំពឹងទៅលើការសាងសង់ប្រព័ន្ធផ្គត់ផ្គង់ទឹកស្អាតខា្នតធំសម្រាប់បំពេញសេចក្តីត្រូវរបស់ប្រជាពលរដ្ឋទូទាំងខេត្ត ប៉ុន្តែជាត្រូវការចំណាយថវិកាច្រើនសម្រាប់សាងសង់អាងស្តុកទឹក និងស្ថានីយ៍ថ្មី។ចំណែកលោក ឯក សុនចាន់ រដ្ឋលេខាធិការក្រសួងឧស្សាហកម្ម និងសិប្បកម្ម វិញបានមានប្រសាសន៍អរគុណចំពោះរដ្ឋាភិបាលជប៉ុនដែលបានផ្តល់គម្រោងដ៏មានសារៈសំខាន់នេះ ដល់ ប្រជាជនកម្ពុជាដែលកំពុងតែត្រូវការទឹកស្អាតចាំបាច់សម្រាប់ប្រើប្រាស់ក្នុងមូលដ្ឋាន ។ លោកថាជប៉ុនជាប្រទេសដែលផ្តល់ជំនួយច្រើនជាងគេតាំងពីឆ្នាំ១៩៩៣មកម្ល៉េះ ហើយសម្រាប់វិស័យទឹកស្អាតនេះវិញ ជប៉ុនបានជួយទាំងស្រុងដែលគិតរហូតមកដល់ពេលនេះ ប្រជាជនកម្ពុជារស់នៅតាមទីប្រជុំជនបានទទួលទឹកស្អាតកើនឡើងដល់ប្រមាណជា៦៨ភាគរយ ក្នុង កំរិតទូទាំងប្រទេស៕
ដោយ៖ ស.ស្អាត