ភ្នំពេញ៖ ពិព័រណ៍សំខាន់ៗនៃពាណិជ្ជកម្មរបស់ប្រទេសថៃ នៅក្នុងប្រទេសកម្ពុជា សម្រាប់ឆ្នាំ២០១ ៤នេះនឹងត្រូវ ផ្តើមឡើងចាប់ពីថ្ងៃទី៦ខែកុម្ភៈខាងមុខនេះហើយដែលនឹងស្តង់ទំនិញ៣៦៤ស្តង់ត្រូវដាក់តាំងបង្ហាញនិងលក់ផលិត ផលពីរោងចក្រប្រទេសថៃ។ពិព័រណ៍ពាណិជ្ជកម្មថៃលើកដំបូងសម្រាប់ឆ្នាំនេះ នឹងធ្វើឡើងចាប់ពីថ្ងៃទី៦ដល់ ថ្ងៃទី៩ ខែកុម្ភៈ នៅ​​មជ្ឈមណ្ឌលសន្និបាត និងពិព័រណ៍កោះពេជ្រ ក្នុងរាជធានីភ្នំពេញ។

ក្នុងឆ្នាំនេះស្ថានទូតថៃប្រចាំកម្ពុជាសហការជាមួយក្រសួងពាណិជ្ជកម្មនឹងរៀបចំឲ្យមានព្រឹត្តិកា​រណ៍​សំខាន់ៗ ដូចជា ៖ រៀបចំសិក្ខាសាលា ដើម្បីផ្តល់ចំណេះដឹងដល់ពាណិជ្ជករថៃ, កម្មវិធីចាប់ដៃគូពាណិជ្ជកម្ម, រាត្រីសមោសថៃឡង់ដ៍, ការរៀបចំស្តង់ពិព័រណ៍ពាណិជ្ជកម្មថៃ, ការបង្ហាញពីរបៀបធ្វើម្ហូប និងនំថៃ ព្រមជាមួយការលក់ម្ហូបអាហារ, រៀបចំ ស្តង់សម្រាប់ក្រុមហ៊ុនលក់រាយ និងរកតំណាងចែកចាយទំនិញ, ការប្រគុំតន្ត្រីដើម្បីផ្តល់ភាពសប្បាយ រីករាយជូន អតិថិជន ជាដើម។

លោកស្រី ជីរ៉ាណាន់ វង្សមង្គល (Jiranun Wongmongkol) អគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃ​ ប្រចាំ​នៅ​ប្រទេស​កម្ពុជានៅក្នុងសន្និសីទសារព័ត៌មានកាលពីរសៀលថ្ងៃទី២៩ខែមករាបានឲ្យដឹងថា ពិព័រណ៍ ពាណិជ្ជកម្ម ថៃសម្រាប់ឆ្នាំ២០១៤នេះ គឺមានលក្ខណៈខុសប្លែកពីបណ្តា​ឆ្នាំកន្លងទៅ។

លោកស្រីបញ្ជាក់ថា ពិព័រណ៍ដែលត្រូវ ចាប់ផ្តើមនៅដើមខែកុម្ភៈ នឹងមានការដាក់តាំងបង្ហាញ នូវស្តង់ទំនិញ ៣៦៤ ស្តង់ មានផលិតផលទំនិញដូចជា៖ សម្ភារៈសំណង់ គ្រឿងបន្លាស់ម៉ាស៊ីន អាហារ ភេសជ្ជៈ សម្លៀកបំពាក់ និងវាយ នភ័ណ្ឌ ទំនិញផ្នែក​សុខភាព និង សម្ផស្ស​សម្ភារៈ​ប្រើ​ប្រាស់​ក្នុង​ផ្ទះ និងផ្ទះបាយ វត្ថុអនុស្សាវរីយ៍ សម្ភារៈតុបតែងផ្ទះ គ្រឿងបន្លាស់រថយន្ត និងឧបករណ៍ សម្ភារៈធ្វើពីស្បែក និងស្បែកជើង ជាដើម។ ទន្ទឹមការដាក់តាំងនេះ ក៏នឹងមាន ពាណិជ្ជករប្រហែល២០០នាក់ ចូលរួមសម្រាប់ចាប់ដៃគូពាណិជ្ជកម្ម(Business Matching)។

លោក  Touchayoot Pakdi ឯកអគ្គរាជទូតថៃប្រចាំនៅកម្ពុជា មានប្រសាសន៍ថា ពិព័រណ៍ពាណិជ្ជកម្ម នាពេល​ខាង​មុខ​នេះ គឺក្នុងគោលបំណងផ្សព្វផ្សាយផលិតផលរបស់ថៃ ដែលជាផលិតផលមានគុណភាពល្អ តម្លៃសមរម្យ និង​គោលបំណងដើម្បីជាការអរគុណដល់អតិថិជនដែលគាំទ្រទំនិញថៃ មានឱកាសបានទិញទំនិញពីម្ចាស់រោងចក្រ ដោយផ្ទាល់ក្នុងតម្លៃដែលអាចធានាបានថា ថោកជាងនៅលើទីផ្សារយ៉ាងពិតប្រាកដ។

លោកស្រី ជីរ៉ាណាន់ វង្សមង្គល បញ្ជាក់ឲ្យដឹងបន្ថែមថា នៅឆ្នាំ២០១៣ ទំហំពាណិជ្ជកម្មទ្វេភាគីរវាងប្រទេសថៃ និង​កម្ពុជា មានតួលេខប្រហាក់ប្រហែលនឹងកាលពីឆ្នាំ២០១២។ ក្នុងឆ្នាំ២០១២ ទំហំពាណិជ្ជកម្មទ្វេភាគីនេះ មានទឹក​ប្រាក់​ចំនួន៣,៨០០លានដុល្លារអាមេរិក គឺបានការកើនឡើង៤០ភាគរយ បើប្រៀបធៀបជា​មួយ​នឹងឆ្នាំ២០១១។ ពាណិជ្ជកម្មទ្វេភាគីនេះ ខាងប្រទេសថៃបាននាំចូលមកកាន់កម្ពុជា មានទឹកប្រាក់៣,៥០០លានដុល្លារ ហើយកម្ពុជា​វិញបាននាំចេញទៅកាន់ថៃ មានទឹកប្រាក់៣០០លានដុល្លារ។

ទំនិញដែលកម្ពុជា បាននាំចូលពីប្រទេសថៃមានសម្ភារៈកសិកម្ម ជីកសិកម្ម ចំណីសត្វ ប្រេងសាំង ​ម្ហូបអាហារភេស​ជ្ជៈ សម្ភារៈសំណង់ សម្ភារៈ​ប្រើ​ប្រាស់​ក្នុង​ផ្ទះនិងផ្ទះបាយ ជាដើម។ដោយឡែក កម្ពុជាបាននាំចេញ​ទៅ​ប្រទេស​ថៃ​វិញ មានដូចជា ផលិតផលកសិកម្ម មានដូចជា៖  ស្រូវ អង្ករ ពោត ដំឡូងមី ជាដើម។លោកស្រី ជីរ៉ាណាន់ វង្សមង្គល បានថ្លែងថា បញ្ហានយោបាយនៅប្រទេសថៃ មិនបានធ្វើ   ឲ្យរាំងស្ទះដល់ការធ្វើពាណិជ្ជកម្មរវាងកម្ពុជា និងថៃ​នោះ​ឡើយ។ ប៉ុន្តែអ្វីដែលជាបញ្ហានោះ គឺការឡើងថ្លៃនៃពន្ធគយ៕ ដោយ៖ រតនា